Arvind Kejriwal | అరవింద్ కేజ్రీవాల్​ కి కలిసి రాని జైల్ టు సీఎం సెంటిమెంట్

Arvind Kejriwal | భారత రాజకీయాలను గమనిస్తే ఓ ఆసక్తికర పరిణామం అర్థమవుతుంది. ప్రతిపక్షంలో ఉండి జైలుకెళ్లిన నేతలు అందరూ బయటికొచ్చిన తర్వాత ఎన్నికల్లో పోటీ చేసి గెలిచి ముఖ్యమంత్రులైన ఉదాహరణలు చాలానే ఉన్నాయి. తెలంగాణ ముఖ్యమంత్రి రేవంత్ రెడ్డి, ఏపీ సీఎం చంద్రబాబు, అంతకుముందు జగన్​ ఇలా పలువురు నేతలు ఏవో ఆరోపణలతో జైలు జీవితం గడిపి ఆ తర్వాత సీఎం పీఠాన్ని అధిరోహించారు.

కానీ ఈ సెంటిమెంట్​ ఢిల్లీ మాజీ సీఎం అరవింద్ కేజ్రీవాల్​ (Arvind Kejriwal)కు కలిసి రాలేదు. రేవంత్​, బాబు, జగన్​ లు ప్రతిపక్షంలో ఉండగా చెరసాలకు వెళ్తే కేజ్రీవాల్​ ఒక్కరే సీఎం హోదాలో వెళ్లారు. అంతేగాదు అక్కడి నుంచే కొంతకాలం పాలించారు కూడా. స్వతంత్ర భారత చరిత్రలో ముఖ్యమంత్రిగా ఉండి అరెస్టై జైలుకెళ్లిన వ్యక్తిగా కూడ ఆయన చరిత్రకెక్కారు.

ఝార్ఖండ్​ ముఖ్యమంత్రి హేమంత్ సోరెన్​ సైతం తన పదవికి రాజీనామా చేసి ఆరు నెలలకు పైగా జైలులో ఉండి మళ్లీ ఎన్నికల్లో పోటీ చేసి గెలిచి సీఎం అయ్యారు. అంతకుముందు తమిళనాడులో కరుణానిధి, జయలలితల విషయంలోనూ ఇదే జరిగింది. కేజ్రీవాల్​ విషయంలోనూ ఇదే రిపీట్​ అవుతుందని రాజకీయ విశ్లేషకులు భావించారు. కానీ ఆ సెంటిమెంట్​ కు ఓటమితో బ్రేక్​ పడింది.

రేవంత్ రెడ్డి, జగన్​, చంద్రబాబు నాయుడుల అరెస్టులను కక్ష సాధింపు చర్యలని విశ్వసించిన జనం సానుభూతితో వాళ్లను గెలిపించారు. హేమంత్ సోరెన్​ కు సైతం అదే కలిసొచ్చింది. అదే తరహాలో బీజేపీ తనను టార్గెట్ చేయడం కలిసి వస్తుందని కేజ్రీవాల్ ఊహించారు. ప్రజలు మరోలా ఆలోచించారు. ఫలితం భిన్నంగా వచ్చింది. చివరికి ఆయన ఎమ్మెల్యే గా కూడా గెలవలేకపోయారు. దానికి తోడు ఆయనతో పాటు లిక్కర్​ స్కాంలో జైలుకు వెళ్లిన మనీశ్​ సిసోడియా, సత్యేంద్ర జైన్​ లు కూడా ఓడిపోవడం కొసమెరుపు. దీన్ని బట్టి … అవినీతి వ్యతిరేక ఉద్యమాలకు వ్యతిరేకంగా రాజకీయాల్లోకి వచ్చిన కేజ్రీవాల్​ పై అవే అవినీతి ఆరోపణలు రావడం జనం సమర్థించలేదు.