Imran Khan Health: ఇమ్రాన్ ఖాన్ బతికే ఉన్నాడు.. పాకిస్థాన్ చట్టసభ్యుడి సంచలన వ్యాఖ్యలు

Imran Khan Health: జైలుజీవితం గడుపుతున్న పాకిస్థాన్ మాజీ ప్రధానమంత్రి, తెహ్రీక్-ఇ-ఇన్సాఫ్ (PTI) పార్టీ అధినేత ఇమ్రాన్ ఖాన్ (Imran Khan) చనిపోయారంటూ గత రెండు మూడు రోజులుగా జోరుగా కథనాలు వెలువడుతున్న విషయం తెలిసిందే. ఈ వదంతులపై పీటీఐ సెనేటర్ ఖుర్రం జీషాన్ స్పందించారు. ఇమ్రాన్ ఖాన్ మరణించారనే ప్రచారాన్ని (Imran Khan Health) ఆయన ఖండించారు. ఇమ్రాన్ ఖాన్ బతికే ఉన్నారని, ప్రస్తుతం ఆయన అదియాలా జైలులో ఉన్నారని స్పష్టం చేశారు. అయితే, పాకిస్థాన్‌ను విడిచి వెళ్లిపోవాలంటూ ఆయనపై ఒత్తిడి తెస్తున్నారని, ఆ వ్యూహంలో భాగంగానే ఇమ్రాన్ ఖాన్‌ను జైలులో ఏకాంతంగా ఉంచుతున్నారని ఆయన ఆరోపించారు. దేశంలో ప్రస్తుత పాలక వర్గానికి ఇమ్రాన్ ఖాన్ ప్రజాదరణ చూసి భయం పట్టుకుందని, అందుకే ఆయనకు సంబంధించిన ఏ ఒక్క ఫొటో, లేదా వీడియోను కూడా విడుదల చేయకుండా అడ్డుకుంటున్నారని చెప్పారు. ఈ మేరకు భారత్‌కు చెందిన ఓ జాతీయ మీడియా సంస్థతో ఖుర్రం జీషాన్ మాట్లాడారు.

చాలా దురదృష్టకరం

ఇమ్రాన్ ఖాన్‌ను జైలులో (Adiala Jail) ఒంటరిగా ఉంచడం, దాదాపు నెల కావొస్తున్నా, ఆయన కుటుంబ సభ్యులు, న్యాయవాదులు, చివరికి పీటీఐ పార్టీకి చెందిన సీనియర్ నాయకులను కూడా ఆయనను కలవడానికి అనుమతించడం లేదని, ఇది చాలా దురదృష్టకరమని ఖుర్రం జీషాన్ ఆగ్రహం వ్యక్తం చేశారు. ఇది మానవ హక్కుల ఉల్లంఘనేనని, ఏదో ఒక దానికి అంగీకరించాలంటూ ఆయనను బలవంతం చేయడానికి జరుగుతున్న ప్రయత్నం ఇదని ఆయన అభిప్రాయపడ్డారు. ఇమ్రాన్ సజీవంగానే ఉన్నారని, ప్రస్తుతం అదియాలా జైలులో ఉన్నారంటూ గత కొద్ది రోజులుగా తమకు హామీ ఇచ్చి చెబుతున్నారని జీషాన్ వివరించారు. ఆయన ఆరోగ్యంగానే ఉన్నారని, వదంతులను నమ్మవొద్దని పేర్కొన్నారు.

Read Also- Local Body Elections: చివరిరోజు భారీగా నామినేషన్లు.. ఒక్కరోజే సర్పంచ్‌కి 20 వేల నామినేషన్లు

దేశం విడిచి.. మౌనంగా ఉండమంటున్నారు

పాకిస్థాన్ ప్రభుత్వం ఇమ్రాన్ ఖాన్‌తో ఎలాంటి ఒప్పందం కోసం ప్రయత్నిస్తోందని అడగగా, దేశం విడిచిపెట్టి వెళ్లి మౌనంగా బతకాలని ఆయనను కోరుతున్నారని సెనేటర్ ఖుర్రం జీషాన్ చెప్పారు. ఇమ్రాన్ ఖాన్‌తో ఒక డీల్ కుదుర్చుకోవడానికి ప్రయత్నిస్తున్నారని, దేశం విడిచి వెళ్లిపోవాలని అడుగుతున్నారని ఆరోపించారు. ఆయన విదేశాలకు వెళ్లి, తనకు నచ్చిన చోట మౌనంగా ఉంటే రాయితీలు ఇస్తామని కూడా హామీ ఇస్తున్నారని ఆరోపించారు. కానీ, ఇమ్రాన్ ఖాన్ ఎప్పటికీ దీనికి అంగీకరించబోరని, ఆయన ఎలాంటి నాయకుడో అందరికీ తెలుసునన ప్రశంసించారు. ఆయన ఈ ప్రతిపాదనను ఎప్పటికీ ఆమోదించబోరని జీషాన్ విశ్వాసం వ్యక్తం చేశారు. ఇమ్రాన్ ఖాన్ జైలులోనే ఉన్నప్పటికీ ఆయన ప్రభావం పెరుగుతూనే ఉందని, పీటీఐ పార్టీకి పాకిస్థాన్ యువతలో బలమైన పునాది ఉందని చెప్పారు. పీటీఐకి ఉజ్వల భవిష్యత్తు ఉందని ధీమా వ్యక్తం చేశారు.

Read Also- Alleti Maheshwar Reddy: హెచ్ఐఎల్‌టీ పై సాక్ష్యాధారాలతో నిరూపిస్తే రాజీనామా చేస్తా: ఏలేటి మహేశ్వర్ రెడ్డి

ఇమ్రాన్ ఖాన్ ఖైదీగా మారినప్పటి నుంచి ఇప్పటివరకు కనీసం ఒక్క ఫొటో కూడా ఎందుకు బయటకు రాలేదని ప్రశ్నించగా, ఒకే ఒక్క ఫొటో కూడా ప్రజల మద్దతును సమీకరించగలదని, దీనికి భయపడి పాకిస్థాన్‌లోని పాలక వర్గ నేతలు కలవరపడుతున్నట్లు కనిపిస్తోందని జీషాన్ వ్యాఖ్యానించారు. కాగా, ఆఫ్ఘనిస్తాన్‌కు చెందిన అనేక సోషల్ మీడియా ఖాతాలలో ఇమ్రాన్ ఖాన్ జైలులో హత్యకు గురయ్యారంటూ పెద్ద సంఖ్యలో సోషల్ మీడియా పోస్టులు వెలిశాయి. మరోవైపు, కోర్టు ఆదేశాలు ఉన్నప్పటికీ, గత నెల రోజులుగా ఇమ్రాన్ ఖాన్ సోదరీమణులను కూడా ఆయనను కలుసుకోవడానికి అధికారులు అనుమతించకపోవడంతో వదంతులు మరింతగా వ్యాపించిన విషయం తెలిసిందే.