Epaper 
Local Body Elections: రాష్ట్రంలో తొలి విడుత నామినేషన్ల దాఖలు శనివారం ముగిసింది. సర్పంచ్, వార్డు పదవులకు అభ్యర్థులు పోటాపోటీగా నామినేషన్లు దాఖలు చేశారు. చివరి రోజు అభ్యర్థులు ర్యాలీగా వెళ్లి అందజేశారు. ఒక్కరోజే సర్పంచ్ స్థానాలకు 20 వేల పైగా నామినేషన్లు, వార్డు స్థానాలకు 51 వేలకు పైగా నామినేషన్లు దాఖలు అయ్యాయని అధికారులు అంచనా వేశారు. అర్ధరాత్రి వరకు కూడా జిల్లాల నుంచి పూర్తి సమాచారం రాలేదని, ఇవాళ మొత్తం నామినేషన్ల వివరాలు తెలుస్తాయని అధికారులు పేర్కొన్నారు. రాష్ట్రవ్యాప్తంగా మొదటి విడుతలో 4,236 పంచాయతీలకు ఎన్నికలు జరుగుతుండగా సర్పంచ్ స్థానాల కోసం భారీగా నామినేషన్లు దాఖలయ్యాయి. ఇక, 37,440 వార్డులకు కూడా భారీ స్పందన వచ్చింది.
నేడు నామినేషన్ల పరిశీలన
గ్రామ పంచాయతీ ఎన్నికల్లో పోటీ చేసేందుకు అభ్యర్థులు దరఖాస్తు చేసిన నామినేషన్లను అధికారులు ఆదివారం పరిశీలన చేయనున్నారు. స్క్రూటినీ పూర్తయ్యాక చెల్లుబాటు అయ్యే అభ్యర్థుల జాబితా రెడీ చేస్తారు. తిరస్కరణ నామినేషన్లపై అప్పీలు చేసుకునే అవకాశం కల్పించారు. సర్పంచ్, వార్డు మెంబర్‌ అభ్యర్థి నామినేషన్ తిరస్కరణకు గురైతే సంబంధిత రెవెన్యూ డివిజనల్‌, సబ్ కలెక్టర్ దగ్గర రిటర్నింగ్‌ అధికారి నిర్ణయంపై అప్పీలు చేసుకోవచ్చని అధికారులు తెలిపారు. తిరస్కరించిన నామినేషన్లపై డిసెంబర్ 1న సాయంత్రం వరకు అప్పీల్ చేసుకోవచ్చు. డిసెంబర్ 2న పరిష్కరిస్తారు. డిసెంబర్ 3న మధ్యాహ్నం 3 గంటల వరకు నామినేషన్ల ఉపసంహరణకు గడువు ఉన్నది. అదేరోజు మధ్యాహ్యం 3 గంటల తర్వాత బరిలో నిలిచిన అభ్యర్థుల జాబితాను ఎన్నికల అధికారులు ప్రకటిస్తారు. డిసెంబర్ 11న పంచాయతీల్లో పోలింగ్ జరగనున్నది.
నేటి నుంచి రెండో విడుత నామినేషన్లు
ఇక, రాష్ట్రంలో రెండో విడుత నామినేషన్ల ప్రక్రియ ఇవాళ ప్రారంభం అవుతుంది. రెండో విడుతలో 4,333 సర్పంచ్, 33,350 వార్డు సభ్యుల స్థానాలకు ఎన్నికలు జరుగనున్నాయి. 3వ తేదీన పరిశీలన చేస్తారు. 4వ తేదీన అప్పీల్, 6న ఉపసంహరణ, అదే రోజు బరిలో ఉండే అభ్యర్థులను అధికారులు ప్రకటించనున్నారు. డిసెంబర్ 14న రెండో విడుత పోలింగ్ జరుగనున్నది. అదే రోజు ఫలితాలను అధికారులు ప్రకటించనున్నారు.
Also Read: Gaddam Prasad Kumar: శారీరక వ్యాయామమే కాదు.. ఒక జీవన విధానం : స్పీకర్ గడ్డం ప్రసాద్ కుమార్
