Seethakka: దీక్షా దివస్ పేరుతో బీఆర్ఎస్ డ్రామాలు.. దీని వెన‌క ఆంత‌ర్యం ఎంటి? మంత్రి సీతక్క ఫైర్!

Seethakka: బీఆర్ఎస్ పార్టీ ‘దీక్షా దివస్’ పేరుతో ప్రజలను మోసం చేసే డ్రామాలు చేస్తుందని మంత్రి సీత‌క్క (Seethakka) మండిపడ్డారు. అధికారంలో ఉన్నప్పుడు ఒక్క రోజే నిర్వహించిన దీక్షా దివస్‌ను, ఇప్పుడు అధికారం పోయాక పది రోజుల పాటు నిర్వహించడం వెన‌క ఆంత‌ర్యం ఎంట‌ని ఆమె ప్రశ్నించారు. అధికార పార్టీని దూషించడం కోసమే దీక్షా దివ‌స్ నిర్వహిస్తున్నారా? అని నిల‌దీశారు. కేసీఆర్ దీక్ష సంగతి నిమ్మరసానికి తెలుసు అని ఎద్దేవా చేశారు. నాంపల్లిలో మీడియాతో మాట్లాడారు. ప్రజా ప్రభుత్వానికి రెండేళ్లు పూర్తైందని, ఈ సందర్భంగా రాష్ట్రవ్యాప్తంగా తొమ్మిది రోజుల విజయోత్సవాలు నిర్వహిస్తున్నామని తెలిపారు. ప్రజల కోసం కాంగ్రెస్ ప్రభుత్వం చేసిన ఎన్నో పనులు ప్రజల్లో నమ్మకాన్ని పెంచాయన్నారు. ‘బీఆర్ఎస్ అబద్ధాల పునాదులపై మా వ్యక్తిత్వాన్ని కించపరుస్తూ తప్పుడు ప్రచారం చేస్తోంది. జూబ్లీహిల్స్ ఉప ఎన్నికల్లో ప్రజలు బీఆర్ఎస్ తప్పుడు ప్రచారాన్ని తిప్పికొట్టారు. అయినా వారి బుద్ధి మారలేదు’ అని ఆమె విమర్శించారు.

సోనియా గాంధీ దయతో

సోష‌ల్ మీడియాను సేవా వేదికగా ఉపయోగించాల్సిన చోట బీఆర్ఎస్ తప్పుడు ప్రచారానికి వాడుకుంటోందని, మీడియా అనే ఫోర్త్ ఎస్టేట్‌ను బీఆర్ఎస్ సొంత ఎస్టేట్‌లా మార్చుకుని విషం చిమ్ముతుందని ఆగ్రహం వ్యక్తం చేశారు. అధికారం పోగానే ఫామ్‌హౌస్‌ల్లో ఉండే నేతలు ప్రజానాయకులు కాలేరని సీతక్క వ్యాఖ్యానించారు. సోనియా గాంధీ దయతో ఏర్పడిన తెలంగాణలో బీఆర్ఎస్ అన్ని వర్గాలను వంచించిందని, యువతకు ఉద్యోగాలు లేక రైతులు అప్పుల బాధలో ఆత్మహత్యలకు పాల్పడే పరిస్థితి నెలకొల్పిందని ఆరోపించారు.

Also Read:Seethakka: సమ్మక్క సారల‌మ్మ మ‌హా జాత‌ర‌కు రండి.. రాష్ట్రపతిని ఆహ్వానించిన మంత్ర సీతక్క! 

74 వేల ప్రభుత్వ ఉద్యోగాలను భర్తీ

బీఆర్ఎస్ పాలనలో ఆడబిడ్డల పొదుపు అయిన రూ.1500 కోట్ల అభయహస్తం నిధులను దోచుకున్నారని, రూ.3000 కోట్ల వడ్డీలను కూడా బీఆర్ఎస్ పాలకులు దోచుకున్నారని మండిపడ్డారు. ఇందిరమ్మ ఇండ్లు 4.5 లక్షలు మంజూరు చేయడం, 74 వేల ప్రభుత్వ ఉద్యోగాలను భర్తీ చేయడం, లక్షల కుటుంబాలకు రేషన్ కార్డులు జారీ చేయడం, నాణ్యమైన ఇందిరమ్మ చీరలు పంపిణీ, ఏకకాలంలో రెండు లక్షల పంట రుణమాఫీ, సన్నబియ్యం పంపిణీ, సన్న వరిబియ్యం బోనస్ వంటి ఎన్నో కార్యక్రమాలు తమ ప్రభుత్వం చేపట్టిందని వివరించారు.

బీజేపీ–బీఆర్ఎస్ కలిసి కుట్రలు

బీసీ రిజర్వేషన్ల పెంపు కోసం స్థానిక ఎన్నికలను రెండు సంవత్సరాలు వాయిదా వేయాల్సి వచ్చిందని, 15వ ఆర్థిక సంఘం నిధులైన రూ.3000 కోట్లు ఆలస్యం అవుతున్నాయని తెలిపారు. మార్చి 31, 2026లో ఆర్థిక సంఘం గడువు ముగియనున్న నేపథ్యంలో ఇప్పటికైనా ఎన్నికలు జరపకపోతే రాష్ట్రానికి నష్టం తప్పదని పేర్కొన్నారు. రిజర్వేషన్ పెంపుకోసం అవసరమైన అన్ని ప్రక్రియలు పూర్తయ్యాయని, కానీ బీజేపీ –బీఆర్ఎస్ కలిసి కుట్రలు చేస్తున్నాయన్నారు. కుల గణనలో బీఆర్ఎస్ పెద్దలు పాల్గొనకపోవడం దీనికి నిదర్శనం అని చెప్పారు. జర్వేషన్లను రద్దు చేస్తామని చెప్పే బీజేపీ నాయకులు, బీసీ రిజర్వేషన్ల పెంపు కోసం దొంగ దీక్షలు చేస్తుండటం హాస్యాస్పదం. రిజర్వేషన్ పెంపు ఢిల్లీలో పెండింగ్‌లో ఉంది. నిజంగా ప్రధాని మోదీ బీసీ అయితే వెంటనే నిర్ణయం తీసుకోవాలని మంత్రి సీతక్క డిమాండ్ చేశారు. రిజ‌ర్వేష‌న్ల పెంపుపై కేంద్రం ఆలస్యం చేస్తున్నందున, పార్టీ పరంగా బీసీలకు 42 శాతం సీట్లను కేటాయిస్తామని ప్రకటించారు.

Also Read: Seethakka: మహిళా సమాఖ్యలతో కొత్త చరిత్ర.. గ్రామీణ మహిళల ఉత్పత్తులకు గ్లోబల్ మార్కెటింగ్