Cyclone Ditwah: ఏపీకి దిత్వా ముప్పు.. డేంజర్‌లో ఆ జిల్లాలు.. అకస్మిక వరదలు పక్కా!

Cyclone Ditwah: ఆంధ్రప్రదేశ్ కు దిత్వా తుపాను ముప్పు అంతకంతకు పెరుగుతోంది. నైరుతి బంగాళాఖాతంలో ఏర్పడిన ఈ సైక్లోన్.. శ్రీలంక తీరానికి ఆనుకొని ప్రయాణిస్తోంది. ఆదివారం తెల్లవారుజామున తీవ్ర వాయుగుండంగా మారి.. తమిళనాడు, పుదుచ్చేరి, దక్షిణ కోస్తాంధ్ర తీర ప్రాంతాలను తాకే అవకాశముంది. ఈ నేపథ్యంలో ఏపీలోని  మూడు జిల్లాల్లో వాతావరణ శాఖ హై అలర్ట్ ప్రకటించింది. అక్కడ అకస్మిక వరదలు (ఫ్లాష్ ఫ్లడ్స్) సంభవించొచ్చని హెచ్చరించింది.

ఆ జిల్లాల్లో భారీ వర్షాలు

ఏపీలోని నెల్లూరు, చిత్తూరు, కడప జిల్లాలపై దిత్వా తుపాను ప్రభావం అధికంగా ఉండొచ్చని వాతావరణ శాఖ అంచనా వేసింది. రానున్న 24 గంటల్లో ఈ జిల్లాల్లో భారీ వర్షాలు కురుస్తాయని హెచ్చరించింది. తుపాను కారణంగా తీరం వెంబడి 50 కి.మీ వేగంతో ఈదురుగాలులు వీస్తాయని తెలిపింది. ఆయా జిల్లాల్లోని పలు ప్రాంతాల్లో అకస్మిక వరదలు సైతం సంభవిస్తాయని పేర్కొంది. కాబట్టి లోతట్టు ప్రాంతాల ప్రజలు అప్రమత్తంగా ఉండాలని, వరద ముప్పును అధిగమించేందుకు ఆయా జిల్లాల యంత్రాంగం సంసిద్ధంగా ఉండాలని దిశానిర్దేశం చేసింది. మరోవైపు ప్రకాశం, తిరుపతి, అన్నమయ్య జిల్లాల్లో కూడా అక్కడకక్కడా మోస్తరు నుంచి భారీ వర్షాలు కురుస్తాయని విపత్తుల ప్రతిస్పందన సంస్థ ఎండీ ప్రఖర్ జైన్ స్పష్టం చేశారు.

సముద్రంలోకి వెళ్లొద్దు

దిత్వా తుపాను ఆదివారం ఉదయం తీరాన్ని తాకే సమయంలో సముద్రపు అలలు ఉవ్వెత్తున ఎగసిపడతాయని వాతావరణ శాఖ తెలిపింది. దిత్వా  తుపాను తీరంకు చేరే కొద్ది కోస్తాంధ్ర ప్రాంతంలోని సముద్ర తీరం అల్లకల్లోలంగా మారే ప్రమాదముందని హెచ్చరించింది. కాబట్టి మత్స్యకారులు సముద్రంలోకి వేటకు వెళ్లొద్దని సూచించింది. మరోవైపు భారీ వర్షాల నేపథ్యంలో ప్రజలు, రైతులు సైతం అప్రమత్తంగా ఉండాలని విజ్ఞప్తి చేసింది. కాగా నైరుతి బంగాళాఖాతంలో ఏర్పడ్డ దిత్వా తుపాను.. ప్రస్తుతం 7 కి.మీ వేగంతో తమిళనాడు, పుదుచ్చేరి, దక్షిణ కోస్తాంధ్ర వైపుగా కదులుతోంది. పుదుచ్చేరికి 300 కి.మీ, చెన్నైకి 400 కి.మీ దూరంలో తుపాను కేంద్రీకృతమై ఉన్నట్లు వాతావరణ శాఖ పేర్కొంది.

Also Read: Chief Minister Issue: కలిసి టిఫిన్ చేసిన సిద్ధరామయ్య, డీకే శివకుమార్… రాజీ కుదిరిందా? తెరపైకి కొత్త అంశం

శ్రీలంకలో దిత్వా బీభత్సం..

మరోవైపు దిత్వా తుపాను కారణంగా శ్రీలంకలో భారీ ఎత్తున వర్షాలు కురుస్తున్నాయి. ఎడతేరిపి లేని కారణంగా చాలా చోట్ల అకస్మిక వరదలు సంభవించాయి. కొన్ని ప్రాంతాల్లో కొండచరియలు విరిగిపడి పలువురు మృత్యువాత పడ్డారు. దిత్వా తుపాను కారణంగా 123 మంది ప్రాణాలు కోల్పోయిన్నట్లు అక్కడి అధికారులు ప్రకటించారు. పలువురి ఆచూకి గల్లంతైనట్లు పేర్కొన్నారు. వరదల కారణంగా 43 వేల మందిని పైగా సురక్షిత ప్రాంతాలకు తరలించినట్లు శ్రీలంక విపత్తు నిర్వహణ సంస్థ వెల్లడించింది.

Also Read: Metro Smart Lockers: మెట్రోలో సరికొత్త సేవలు.. అందుబాటులోకి స్మార్ట్ లాకర్లు.. లగేజీ సమస్య తీరినట్లే!