Eagle Team: ఈగల్ టీమ్ ‘ఢిల్లీ ఆపరేషన్‌’లో సంచలన విషయాలు వెలుగులోకి

Eagle Team: కింగ్​ పిన్ నైజీరియా దేశస్తులే

దేశవ్యాప్తంగా 2 వేల మందికి పైగా డ్రగ్స్ చేరవేత
వందలాది మ్యూల్ అకౌంట్ల ద్వారా నగదు ట్రాన్స్‌ఫర్​

తెలంగాణ బ్యూరో, స్వేచ్ఛ: ఈగల్​ టీం (Eagle Team) అధికారులు ఢిల్లీ క్రైం బ్రాంచ్​ పోలీసులతో కలిసి దేశ రాజధాని ఢిల్లీలో నెలరోజులపాటు జరిపిన ఆపరేషన్‌లో సంచలన వివరాలు వెలుగు చూశాయి. ఈ రాకెట్‌లో నైజీరియాకు చెందిన నిక్ అనే వ్యక్తి​ కింగ్​ పిన్​ అని తేలింది. దేశవ్యాప్తంగా ఉన్న 2 వేల మందికి పైగా డ్రగ్​ పెడ్లర్లకు నిక్​ మాదక ద్రవ్యాలను సరఫరా చేస్తూ వచ్చినట్టు తేలింది. డబ్బును వందలాది మ్యూల్​ అకౌంట్లలో జమ చేయించి, ఆ తరువాత తన ఖాతాల్లోకి ట్రాన్స్‌ఫర్​ చేసుకునే వాడని నిర్ధారణ అయ్యింది. ఇక, రెగ్యులర్‌గా డ్రగ్స్ సేవిస్తున్న పలువురు హైదరాబాదీలను కూడా అధికారులు గుర్తించారు.

మల్నాడు రెస్టారెంట్ కేసుతో…

విశ్వసనీయంగా అందిన సమాచారం మేరకు కొంతకాలం క్రితం కొంపల్లిలోని మల్నాడు రెస్టారెంట్​ యజమానిని ఈగల్ టీం అధికారులు అరెస్ట్​ చేసిన విషయం తెలిసిందే. దాంతోపాటు మహీంద్ర యూనివర్సిటీలో జరుగుతున్న డ్రగ్ దందాలో కూడా నిందితులను పట్టుకున్నారు. ఈ కేసుల్లోని నిందితులను విచారించినప్పుడు ఢిల్లీలో ఉంటున్న నైజీరియన్ల ద్వారా మాదక ద్రవ్యాలు ఇక్కడకు చేరుతున్నాయన్న విషయం వెల్లడైంది. ఈ క్రమంలో వంద మందికి పైగా ఈగల్ టీం అధికారులు, సిబ్బంది ఢిల్లీకి చేరుకున్నారు. స్పెషల్​ ఆపరేషన్‌కు సహకరించాలని ఢిల్లీ క్రైమ్ బ్రాంచ్​ అధికారులను కోరారు. ఈ నేపథ్యంలో వందమందికి పైగా ఢిల్లీ క్రైం బ్రాంచ్​ పోలీసులు కూడా రంగంలోకి దిగారు. నెలరోజులపాటు ముమ్మరంగా విచారణ జరిపి వీసాల గడువు ముగిసినా, ఇక్కడే అక్రమంగా ఉంటూ డ్రగ్స్​ దందా చేస్తున్న 50మంది నైజీరియన్లను అరెస్ట్ చేశారు. వీరి నుంచి 3.50 కోట్ల రూపాయల విలువ చేసే డ్రగ్స్‌ను స్వాధీనం చేసుకున్నారు. వీరిని విచారించగా కింగ్​ పిన్​ నిక్​ పేరు వెలుగులోకి వచ్చింది.

Read Also- DK Shivakumar: సోనియానే అధికారాన్ని త్యజించారు.. సీఎం సిద్ధూ సమక్షంలోనే డీకే అసంతృప్తి.. ముదిరిన పోరు

హైదరాబాదీలు…

ఇక, విచారణలో హైదరాబాద్​ కు చెందిన 11మంది నేరుగా నిక్​ నుంచి డ్రగ్స్ తెప్పించుకుంటున్నట్టుగా వెల్లడైంది. వీరిలో ఏ.సాయిగోపాల్​ డానిష్​ ఎలియాస్​ ఉప్పాడ దానేశ్వరరావు, పవన్​ టంగుటూరి, శేషు చౌదరి, మణి, బాబీ చౌదరి, సైఫ్​ ఇబ్రహీంన సూర్య అన్నమనేని, సగిరాజు దినేశ్​,న సాయి సత్యరాం భాస్కర్, సిద్ధం శశాంక్ సాగర్​, అలీలు ఉన్నారు. వీరితోపాటు దేశవ్యాప్తంగా ఉన్న 2వేల మంది డ్రగ్ పెడ్లర్లు, వినియోగిస్తున్న వారి వివరాలు కూడా ఆపరేషన్​ లో బయట పడ్డాయి.

కొరియర్ల ద్వారా…

నైజీరియా నుంచి డ్రగ్స్ ను ఇక్కడకు కొరియర్ ద్వారా చేరవేస్తున్నట్టుగా ఈగల్ విచారణలో నిర్ధారణ అయ్యింది. బూట్లు, దుస్తులు, కాస్మోటిక్ వస్తువులు, చెప్పుల్లో దాచి పెట్టి డ్రగ్స్ ను మన దేశానికి సప్లయ్​ చేస్తున్నట్టుగా తేలింది. దీని కోసం శ్రీ మారుతి కొరియర్స్, డీటీడీసీ, ప్రొఫెషనల్​ కొరియర్స్, ఫిష్ రాకెట్​, ఇండియా పోస్ట్​, ఢల్లీ వేరీ, బ్లూ డార్ట్​, ట్రాక్​ ఆన్​ తదితర కొరియర్​ సంస్థల నెట్​ వర్క్​ ను నైజీరియన గ్యాంగ్​ ఉపయోగించుకున్నట్టుగా తేలింది.

Read Also- Case on Minister Son: మంత్రి సంధ్యరాణి కొడుకు, పీఏలపై కేసు.. పార్వతీపురం ఎస్పీ కీలక ఆదేశాలు

భారీగా డ్రగ్స్​ సీజ్​…

ఇక, ఢిల్లీలో జరిపిన ఆపరేషన్ లో భారీగా డ్రగ్స్ ను స్వాధీనం చేసుకున్నారు. కొత్త సంవత్సరం రానున్న నేపథ్యంలో సిద్ధంగా పెట్టుకున్న 5,340 ఎక్టసీ పిల్స్, 250 గ్రాముల కొకైన్, 109గ్రాముల హెరాయిన్, 250 గ్రాముల మెథంఫెటామైన్ ను సీజ్ చేశారు. ఈ మాదక ద్రవ్యాల విలువ 3.5‌‌0 కోట్ల రూపాయలు ఉంటుందని అధికారులు తెలిపారు. అరెస్ట్ చేసిన నిందితులను పీటీ వారెంట్​ పై హైదరాబాద్ తీసుకోనున్నారు. ఇప్పటికే హైదరాబాద్ కు చెందిన 11మందితోపాటు దేశవ్యాప్తంగా రెండు వేల మంది డ్రగ్ సప్లయర్స్​, వినియోగిస్తున్న వారిని గుర్తించిన నేపథ్యంలో ఈ కేసులో ముందు ముందు మరిన్ని అరెస్టులు జరుగనున్నాయి. తెలంగాణను డ్రగ్ ఫ్రీ స్టేట్ గా మార్చటమే లక్ష్యంగా ఈ ఆపరేషన్ నిర్వహించినట్టు ఈగల్​ టీం డైరెక్టర్​ సందీప్​ శాండిల్య చెప్పారు. సహరించిన ఢిల్లీ క్రైం బ్రాంచ్​ అధికారులకు కృతజ్ఞతలు తెలియచేశారు.