Supari Killing: మాజీ సర్పంచ్ హత్య కేసులో నమ్మలేని నిజాలు

Supari Killing: మొత్తం 10 మంది అరెస్టు

నిందితుల‌ నుంచి రూ.8.50 లక్షల నగదు స్వాధీనం
4 కార్లు, 1-బొలేరో, 2 బైక్‌లు, 11 మొబైల్ ఫోన్లు, 13 సిమ్ కార్డులు సైతం స్వాధీనం

గద్వాల, స్వేచ్ఛ: జోగులాంబ గద్వాల జిల్లా కేటిదొడ్డి మండలం నందిన్నె గ్రామ మాజీ సర్పంచ్ బోయ చిన్న భీమరాయుడు హత్య కేసు (Ex Sarpanch Murder Case) మిస్టరీ వీడింది. ప్రధాన నిందితులను అరెస్టు చేసి రిమాండ్‌కు తరలించినట్లు జిల్లా ఎస్పీ టీ.శ్రీనివాస రావు గురువారం వెల్లడించారు. నిందితుల నుంచి రూ.8.50 లక్షల నగదు, 4 కార్లు, 1-బొలేరో, 2 బైక్ లు, 11 మొబైల్స్, 13 సిమ్ కార్డులు స్వాధీనం చేసుకున్నట్టు తెలిపారు.

వివరాలు వెల్లడించిన ఎస్పీ శ్రీనివాస రావు

కేటిదొడ్డి మండలం నందిన్నె గ్రామానికి చెందిన కుర్వ వీరన్నకు రైస్ మిల్లు నిర్వహిస్తున్నాడు. అదే గ్రామానికి చెందిన మాజీ సర్పంచ్ బోయ చిన్న భీమరాయుడు (మృతుడు) తనను రాజకీయంగా, భూమి పంచాయతీలు ఇబ్బంది పెట్టడమే కాకుండా, తన రైస్ మిల్లుపై కేసులు పెట్టించి వ్యాపారానికి అడ్డుతగులతున్నాడని కసి పెంచుకున్నాడు. ఎలాగైనా చంపాలనే ఉద్దేశంతో మరికొందరితో చర్చించి హత్య వ్యూహం పన్నారు. ఈ క్రమంలో కర్నూల్ జిల్లాకు చెందిన ఈశ్వరయ్య గౌడ్‌ను సంప్రదించగా రూ.25 లక్షలకు డీల్ (Supari Killing) కుదిరింది. ఇందులో భాగంగా రూ.15 లక్షలు ముందస్తుగా తీసుకున్నారు. గత కొంత కాలంగా చిన్న భీమ రాయుడు కదలికలపై నిఘా పెట్టారు. ఈనెల 21న నందిన్నె భీమరాయుడు సొంత పనుల కోసం గద్వాలకు వెళ్ళి, పనులు ముగించుకుని నందిన్నెకు బైక్‌పై వెళ్తున్న క్రమంలో ధరూర్ మండలం జాంపల్లి వద్ద బైక్‌ను బొలేరో వాహనంతో ఢీకొట్టి సుఫారీ గ్యాంగ్ పరారైంది. ఈ ఘటనలో చిన్న భీమరాయుడు ఘటనా స్థలంలోనే మృతి చెందాడు.

మొదట రోడ్డు ప్రమాదమని అంతా భావించారు‌. కానీ, మృతుడికి అప్పటికే ప్రాణహానీ ఉందని, తెలిసిన వారే హత్య చేయించారని మృతుడి అన్న పెద్ద భీమరాయుడు ఫిర్యాదు మేరకు ధరూర్ పోలీసులు కేసు నమోదు చేసి దర్యాప్తు చేపట్టారు. జిల్లా ఎస్పీ టి.శ్రీనివాస రావు ఆదేశాల మేరకు గద్వాల డీఎస్పీ వై.మొగులయ్య పర్యవేక్షణలో గద్వాల సీఐ టి.శ్రీను ఆధ్వర్యంలో ధరూర్ ఎస్ఐ శ్రీహరి, గద్వాల రూరల్ ఎస్ఐ శ్రీకాంత్, మల్దకల్ ఎస్ఐ నందీకర్, గట్టు ఎస్ఐ కే.టి మల్లేష్,‌ తదితరులు ప్రత్యేక బృందాలుగా ఏర్పడి కేసు దర్యాప్తు చేపట్టారు. దర్యాప్తులో భాగంగా సుఫారీ గ్యాంగ్‌లోని కీలక నిందితులను అదుపులో తీసుకుని విచారించారు.

ఇందులో భాగంగా ప్రధాన నిందితులు నందిన్నెకు చెందిన మిల్లు యజమాని వీరన్న, అతని కుమారుడు కుర్వ సురేందర్‌లను హైదరబాద్‌లోని ఓ లాడ్జీలో పట్టుకున్నారు. హత్య కేసులో అనుమానిస్తున్న బోయ వీరన్నను అదుపులోకి తీసుకుని విచారించారు. ఈ హత్య తామే చేయించామని వివరాలు వెల్లడించారు‌. హత్య కేసులో మిల్లు వీరన్న, కుర్వ సురేందర్, బోయ వీరన్న తెలుగు మధు బాబు, తెలుగు కృష్ణ, సంజీవులు, బైరీ సుంకన్న, బైరీ కేశన్న, ప్రభుస్వామి, హరిజన్ రాజేశ్‌లను అరెస్టు చేసి రిమాండ్‌కు తరలించారు. కర్నూల్ జిల్లాకు చెందిన ఈశ్వర్య గౌడ్ పరారీలో ఉన్నాడని, త్వరలోనే పట్టుకుంటామని జిల్లా ఎస్పీ వెల్లడించారు. హత్య కేసును చేధించిన ఎస్ఐలను, పోలీస్ సిబ్బందిని జిల్లా ఎస్పీ‌ ప్రత్యేకంగా అభినందించి, రివార్డులు అందజేశారు. ఈ సమావేశంలో గద్వాల ఏఎస్పీ శంకర్ గద్వాల డీఎస్పీ వై.మొగులయ్య, గద్వాల సీఐ టంగుటూరి శ్రీను, ఎస్ఐలు , పోలీస్ సిబ్బంది పాల్గొన్నారు.