Epaper 
Venkaiah Naidu: తెలుగు రాష్ట్రాలు పోటా పోటీగా ఉచిత పథకాలు ప్రకటిస్తున్న వేళ మాజీ ఉపరాష్ట్రపతి, బీజేపీ నేత వెంకయ్యనాయుడు సంచలన వ్యాఖ్యలు చేశారు. ప్రభుత్వాలు ఉచితంగా ఏదీ ఇవ్వకూడని వ్యాఖ్యానించారు. ఉచితాలు అటు దేశానికి, ఇటు రాష్ట్రాలకు మంచివి కాదని అభిప్రాయపడ్డారు. ఈ సందర్భంగా మహిళల ఉచిత బస్సు ప్రయాణం గురించి వెంకయ్య నాయుడు ప్రస్తావించారు. ఫ్రీ బస్సు కావాలని మహిళలు ఏమైనా అడిగారా? అంటూ పరోక్షంగా ఏపీ, తెలంగాణ ప్రభుత్వాలను ప్రశ్నించారు.
‘అలా ఇచ్చి.. ఇలా తీసుకుంటారు’
ఏపీలోని గుంటూరు జిల్లా తెనాలిలో జరిగిన సేవా జ్యోతి పురస్కార కార్యక్రమానికి వెంకయ్య నాయుడు ముఖ్య అతిథిగా హాజరయ్యారు. ఈ సందర్భంగా మాట్లాడుతూ కేంద్ర, రాష్ట్ర ప్రభుత్వాలు ఇస్తున్న ఉచితాలపై తన అభిప్రాయాలను వ్యక్తం చేశారు. ప్రజలు ఉచితాలు తీసుకోవడం వల్ల తనకు ఎలాంటి నష్టం లేదని వ్యాఖ్యానించారు. అయితే ఉదయం ఉచితాలు ఇచ్చి.. సాయంత్రం మద్యం రూపంలో ప్రభుత్వాలు మళ్లీ ప్రజల నుంచే రాబడుతున్నాయని వ్యాఖ్యానించారు. ఈ క్రమంలో సభలో ఒక్కసారిగా నవ్వులు పూశాయి. దీంతో వెంకయ్య నాయుడు స్పందిస్తూ ఇదేమి నవ్వులాట కాదని.. భయంకరమైన సత్యమని చెప్పుకొచ్చారు.
ఉచితాలపై సామెత
పేదలకు విద్య, వైద్యం మాత్రమే ఉచితంగా ఇవ్వాలని వెంకయ్యనాయుడు సూచించారు. ఈ సందర్భంగా ఒక సామెతను ఆయన ప్రస్తావించారు. ‘చేపలు పట్టేది నేర్పించు.. చేపలు మాత్రం ఉచితంగా ఇవ్వొద్దు’ అంటూ పేర్కొన్నారు. ఒకవేళ మీరు చేప ఉచితంగా ఇస్తే సాయంత్రానికి అరిగిపోతుందని అన్నారు. ‘మీరు మధ్యాహ్నం కొరమీను ఇస్తే.. సాయంత్రానికి బొచ్చె కావాలని అంటారు. వారికి ఏంపోయింది.. మీరు ఇస్తున్నారు కాబట్టి ప్రజలు అడుగుతారు’ అని వెంకయ్య సైటెర్లు వేశారు.
Also Read: Telangana High Court: సిగాచీ పేలుడు ఘటన.. దర్యాప్తుపై హైకోర్టు అసహనం.. పోలీసులకు చివాట్లు!
‘అభివృద్ధి దృష్టి సారించండి’
ప్రస్తుతం రెండు తెలుగు రాష్ట్రాలు ఆర్థిక సమస్యలతో కొట్టుమిట్టాడుతున్నాయని వెంకయ్య నాయుడు పేర్కొన్నారు. కాబట్టి ప్రజలకు ఉచితాలు ఇచ్చే విషయంలో రెండు రాష్ట్రాల ముఖ్యమంత్రులు పునరాలోచన చేయాలని హితవు పలికారు. రాష్ట్రానికి అయిన అప్పులు తీర్చే మార్గం, సంపద సృష్టి, ప్రజలను అభివృద్ధి పథంలోకి తీసుకెళ్లే మార్గాలను అన్వేషించాలని సూచించారు. ఆడవాళ్లు ఎప్పుడైనా ఫ్రీ బస్సు కావాలని కోరారా? అంటూ మరోమారు వేదికపై నుంచి నిలదీశారు. కాళ్లు, చేతులు సరిగా లేని వారికి ఇలాంటి సదుపాయం కల్పిస్తే ఒక అర్థముంటుందని చెప్పుకొచ్చారు.
ప్రభుత్వాలు ఏవీ ఎవరికీ ఉచితంగా ఇవ్వకూడదు. ఫ్రీగా విద్యా, వైద్యం ఒకటే ఇవ్వాలి. ఉచితాలు దేశానికి, రాష్ట్రానికి మంచిది కాదు. తెలుగు రాష్ట్రాల్లో ఫ్రీ బస్సు పెట్టమని మహిళలు అడిగారా?
– మాజీ ఉపరాష్ట్రపతి వెంకయ్య నాయుడు pic.twitter.com/11syLPmnJx
— BIG TV Breaking News (@bigtvtelugu) November 27, 2025
