Epaper 
Ramchander Rao: బీజేపీ రాష్ట్ర అధ్యక్షుడు రాంచందర్ రావు అన్నంత పని చేశారు. పార్టీకి నష్టం కలిగించేలా వ్యవహరించిన వారు ఎవరైనా సరే ఎలాంటి ముందస్తు సమాచారం లేకుండా తొలగిస్తామని చెప్పిన మరుసటి రోజే పార్టీ నుంచి ఒక నేతను సస్పెండ్ చేశారు. పార్టీ నిబంధనలు పాటించకుండా, సిద్ధాంతాలకు వ్యతిరేకంగా, ప్రతిష్టకు భంగం కలిగించేలా, సీనియర్ నాయకులకు వ్యతిరేకంగా సోషల్ మీడియాలో తప్పుడు పోస్టులు పెట్టి క్రమ శిక్షణా రాహిత్యానికి పాల్పడినందుకు జగిత్యాల జిల్లా కోరుట్ల పట్టణ బీజేపీ అధ్యక్షుడు బింగి వెంకటేశ్‌పై వేటు వేశారు. రాంచందర్ రావు అలా వార్నింగ్ ఇచ్చి ఇలా యాక్షన్‌లోకి దిగి వేటు వేయడం ఇప్పుడు పార్టీలో చర్చనీయాంశంగా మారింది. సోషల్ మీడియాలో బీఆర్ఎస్, కాంగ్రెస్ ఇప్పటికే బీజేపీ నాయకులను డీ ఫేమ్ చేసేలా కుట్ర పన్నుతున్నాయని పార్టీ భావిస్తున్నది. ఈ తరుణంలో పార్టీలో ఉండి కూడా వ్యతిరేకంగా కార్యకలాపాలకు పాల్పడడంపై ఆయన ఆగ్రహంగా ఉన్నారు. దాని పర్యవసానమే ఈ వేటు అనే చర్చ జరుగుతున్నది.
మాటల్లో కాదు.. చేతల్లో..
ఇటీవల పార్టీ రాష్ట్ర కార్యాలయంలో సోషల్ మీడియా, ఐటీ, లీగల్ సెల్‌తో రాంచందర్ రావు కీలక సమావేశం నిర్వహించారు. ప్రత్యర్థి పార్టీలపై విమర్శనాస్త్రాలకు పదును పెట్టడంపై దిశానిర్దేశం చేయడంతో పాటు సీరియస్ వార్నింగ్ సైతం ఇచ్చారు. కొద్ది రోజులుగా ఇతర పార్టీల సోషల్ మీడియా విభాగాలతో పోలిస్తే బీజేపీ విభాగం వెనుకబడిపోయిందనే చర్చ పొలిటికల్ సర్కిల్స్‌లో జరుగుతున్నది. పార్టీలో తనను తిట్టినా అది అందరినీ అవమానించడమే అవుతుందని, దానికి అనుగుణంగా పని చేయాలని దిశానిర్దేశం చేశారు. అలాగే, ప్రత్యర్థి పార్టీలు బీజేపీని బ్లేమ్ చేయాలని చూస్తే వారికి కమలం నేతలు ఎవరైనా మద్దతిచ్చినా, రీట్వీట్ చేసినా సీరియస్ యాక్షన్ ఉంటుందని రాంచందర్ రావు హెచ్చరించారు. ఇదే క్రమంలో మాటలకే పరిమితం కాకుండా చేతల్లో చేసి చూపించారు. ఒక నేతను సస్పెండ్ చేసి మరోసారి నాయకులు, కార్యకర్తలకు వార్నింగ్ ఇచ్చారు.
Also Read: Ramchander Rao: దమ్ముంటే ఇండియాకు రండి.. విదేశాల్లో ఉండి విమర్శించడం కాదు : రాంచందర్ రావు
ప్లాన్ వర్కవుట్ అవుతుందా?
తెలంగాణలో గతంతో పోలిస్తే బీజేపీ గ్రాఫ్ క్రమంగా పెరుగుతున్నది. 8 అసెంబ్లీ స్థానాల్లో, 8 పార్లమెంట్ స్థానాల్లో గెలిచింది. రాజాసింగ్‌ను సస్పెండ్ చేయడంతో ఎమ్మెల్యేల సంఖ్య 7గా ఉన్నది. త్వరలో లోకల్ బాడీ, జీహెచ్ఎంసీ ఎన్నికలు రానున్న నేపథ్యంలో రాంచందర్ రావు దూకుడు పెంచినట్లుగా తెలుస్తున్నది. పార్టీ బలంగా ఎదుగుతున్న నేపథ్యంలో ప్రత్యర్థి పార్టీల సోషల్ మీడియా విభాగాలు నైతికంగా దెబ్బ తీసేందుకు కుట్రలు చేస్తాయని, అందుకు ముందే సన్నద్ధమై వాటిని తిప్పి కొట్టాలని, లేదంటే తెలంగాణలో భవిష్యత్ ఉండబోదని నాయకులకు ఆయన దిశానిర్దేశం చేశారు.
ఆఖరికి అభివృద్ధి పనులపై మంత్రిని కలిసినా దానిపైనా ఫలానా పార్టీలోకి పోతున్నారంటూ బ్లేమ్ చేస్తున్నారని, వీటిని తిప్పి కొట్టకపోతే కష్టమని సూచించారు. అలాంటి వారికి బలంగా కౌంటర్ ఇవ్వాల్సిందేనని తేల్చిచెప్పారు. మనం కూడా సోషల్ మీడియా వార్ మొదలెట్టాల్సిందేనని స్పష్టం చేశారు. తప్పుడు వార్తలు రాస్తే పరువు నష్టం కేసు వేసేందుకు కూడా సిద్ధమని రాంచందర్ రావు హెచ్చరించారు. మొత్తంగా లోకల్ బాడీ ఎన్నికలకు ముందు పార్టీని మరింత బలోపేతం చేయడంలో భాగంగా వ్యతిరేక కార్యకలాపాలకు పాల్పడుతున్న వారిని ఏరేసి సక్సెస్ అయ్యేందుకు తీసుకుంటున్న ఈ నిర్ణయాలు ఎంతమేరకు సక్సెస్ అవుతాయనేది చాడాలి.
Also Read: Ramchander Rao: ఒకరిది కాంట్రాక్టర్ల పాలన ఇంకొకరిది కుటుంబ పాలన.. ఇదేం విచిత్రం..!
