Minister Srihari: మహిళల ఆర్థికాభివృద్ధే ప్రభుత్వ ధ్యేయం

Minister Srihari: కోటిమంది మహిళలను కోటీశ్వరులుగా తీర్చిదిద్దాలన్న సంకల్పంతో ప్రభుత్వం ముందుకెళ్తున్నదని రాష్ట్ర పశు సంవర్ధక, క్రీడలు, యువజన సర్వీసుల శాఖ మంత్రి వాకిటి శ్రీహరి పేర్కొన్నారు. గురువారం అలంపూర్ చౌరస్తాలోని ఫంక్షన్ హాల్‌లో ఇందిరా మహిళా శక్తి, రేషన్ కార్డు పంపిణీ కార్యక్రమంలో జిల్లా కలెక్టర్ సంతోష్, అలంపూర్ శాసన సభ్యులు విజయుడుతో కలిసి పాల్గొని జ్యోతి ప్రజ్వలన చేశారు. ఈ సందర్భంగా మంత్రి మాట్లాడుతూ, తెలంగాణ రాష్ట్రంలో ప్రజా ప్రభుత్వం ఏర్పడినప్పటి నుంచి మహిళలకు అత్యంత ప్రాధాన్యత ఇస్తూ వారి పేరు మీద అన్ని పథకాలు అమలు చేయడం జరుగుతోందన్నారు. గతంలో ఏడాదికి ఒకసారి కళ్యాణ లక్ష్మి చెక్కులు ఇస్తే, ఇప్పుడు మూడు నెలలకు ఇస్తున్నామని చెప్పారు.

మహిళల కోసం..

ప్రభుత్వం 2,600 మహిళా సంఘాలకు వడ్డీ లేని రూ.3.15 కోట్ల రుణాలను అందించిందని మంత్రి వెల్లడించారు. తాము నియోజకవర్గానికి 3,500 ఇందిరమ్మ ఇండ్లను రూ.175 కోట్లతో పార్టీలకతీతంగా, అవినీతికి తావు లేకుండా నిర్మించి ఇస్తున్నామన్నారు. గృహ అవసరాలకు నెలకు 200 యూనిట్ల ఉచిత విద్యుత్ అందించడం జరుగుతోందని పేర్కొన్నారు. పెట్రోల్ బంకులు, 1000 బస్సులకు యజమానులుగా చేసి మహిళలను నెలకు 59 వేల రూపాయల ఆదాయం కల్పించేందుకు కృషి చేయడం జరుగుతుందన్నారు. భవిష్యత్ తరాల కోసం విద్యకు ప్రాధాన్యత ఇస్తున్న ప్రభుత్వం, యంగ్ ఇండియా ఇంటిగ్రేటెడ్ పాఠశాలను నిర్మిస్తున్నట్టు చెప్పారు. అర్హులైన వారికి నూతన రేషన్ కార్డులు అందజేస్తున్నామని తెలిపారు.

సన్నబియ్యం పంపిణీ చారిత్రాత్మకం 

సన్న బియ్యం పథకాన్ని దేశంలోనే ప్రత్యేకంగా అమలు చేస్తున్నామని మంత్రి శ్రీహరి పేర్కొన్నారు. ఇంకా అనేక మంది మహిళా సంఘాల్లో సభ్యులుగా చేరి రాష్ట్ర ప్రభుత్వం అమలు చేస్తున్న పథకాల ద్వారా అభివృద్ధి చెందాలన్నారు. ప్రభుత్వం అమలు చేస్తున్న పథకాలను సద్వినియోగం చేసుకొని, ఆర్థికంగా ముందుకు సాగాలని పిలుపునిచ్చారు. ప్రభుత్వం ఏర్పడిన 18 నెలలలోనే ఆరు గ్యారంటీలను ఒక్కొక్కటిగా నెరవేర్చడం జరుగుతోందన్నారు. నియోజకవర్గంలో అవసరం మేరకు అన్ని వర్గాల వారికి కమ్యూనిటీ హాల్స్ ఏర్పాటు చేస్తున్నామని, పేద బడుగు బలహీన వర్గాల అభివృద్ధి ధ్యేయంగా రాష్ట్ర ప్రభుత్వం చర్యలు చేపడుతున్నట్టు తెలిపారు.

Read Also- Rahul Gandhi: డొనాల్డ్ ట్రంప్ వ్యాఖ్యలను సమర్థించిన రాహుల్ గాంధీ!

అన్నీ సద్వినియోగం చేసుకోవాలి

జిల్లా కలెక్టర్ సంతోష్ మాట్లాడుతూ, మహిళల ఆర్థిక అభివృద్ధికి రాష్ట్ర ప్రభుత్వం బలమైన చర్యలు తీసుకుంటోందని తెలిపారు. వడ్డీ లేని రుణాలు, ఉపాధి అవకాశాలు, యూనిఫామ్ తయారీ, వడ్ల కొనుగోలు కేంద్రాల వంటి పథకాలు విజయవంతంగా అమలవుతున్నాయని పేర్కొన్నారు. మహిళలు ఆర్థికంగా అభివృద్ధి చెందేందుకు రూ.3 కోట్ల వ్యయంతో సోలార్ పవర్ ప్లాంట్, పెట్రోల్ బంకులు, బస్సులకు యజమానులుగా చేసి ఆదాయం సమకూర్చడం జరుగుతుందన్నారు. అలంపూర్ నియోజకవర్గానికి 3 కొత్త రేషన్ కార్డుల మంజూరు, 19 వేల పేర్లను కొత్తగా నమోదు చేస్తున్నట్టు తెలిపారు. రేషన్ కార్డుల ద్వారా అందిస్తున్న ఉచిత సన్న బియ్యాన్ని బాధ్యతగా వినియోగించుకోవాలని ప్రజలను కోరారు.

అర్హులకు చెక్కుల పంపిణీ

అలంపూర్ నియోజకవర్గంలోని 2,041 మహిళా సంఘాల సభ్యులకు 30.58 కోట్ల బ్యాంకు లింకేజీ రుణాల చెక్కును, 2,600 సంఘాలకు 3.15 కోట్ల వడ్డీ లేని రుణాల చెక్కును అందజేశారు. మృతి చెందిన 23 మంది మహిళా సంఘాల సభ్యుల కుటుంబాలకు రూ.13.89 లక్షల బీమా చెక్కులను, కొత్త రేషన్ కార్డుల లబ్ధిదారులకు ఉత్తర్వులను అందజేశారు. తదనంతరం జాతీయ పశువ్యాధుల నివారణ కార్యక్రమంలో భాగంగా గొర్రెలకు నీలినాలుక వ్యాధి నిరోధక టీకాలను పంపిణీ చేశారు. ఈ కార్యక్రమంలో అలంపూర్ శాసనసభ్యుడు విజయుడు, అదనపు కలెక్టర్లు లక్ష్మి నారాయణ, నర్సింగ రావు, ఆర్డీవో అలివేలు, గ్రంథాలయ సంస్థ చైర్మన్ నీలి శ్రీనివాసులు, అలంపూర్ మార్కెట్ యార్డ్ చైర్మన్ దొడ్డప్ప, జిల్లా సమాఖ్య అధ్యక్షురాలు ప్రభావతి, సంబంధిత శాఖల అధికారులు, మహిళా సంఘాల సభ్యులు, మహిళలు, స్థానిక ప్రజా ప్రతినిధులు తదితరులు పాల్గొన్నారు.

కార్యక్రమంలో వాగ్వాదం

ఇదిరమ్మ మహిళా శక్తి సంబురాలు కార్యక్రమంలో స్వల్ప వివాదం జరిగింది. ఇందిరమ్మ ఇళ్ల విషయంలో డబ్బులు తీసుకుని పర్మిషన్ ఇచ్చారంటూ మంత్రి శ్రీహరి సమక్షంలో అలంపూర్ ఎమ్మెల్యే విజయుడు కాంగ్రెస్ నాయకులతో వాగ్వాదానికి దిగారు. మంత్రి జోక్యంతో వివాదం సద్దుమణిగింది. ఎటువంటి తప్పులు జరిగినా ఉపేక్షించేది లేదని మంత్రి స్పష్టం చేశారు.

Read Also- Telangana: ఫిరాయింపు ఎమ్మెల్యేలపై సుప్రీంకోర్టు వ్యాఖ్యలు.. రాష్ట్ర నేతల రియాక్షన్ ఇదే!