Phone Tapping Case: విచారణలో ప్రభాకర్ రావు ఏం చెప్తాడో.. టెన్షన్‌లో గులాబీ బాస్‌!

Phone Tapping Case: ఫోన్​ ట్యాపింగ్​ కేసులోని తాజా పరిణామం బీఆర్​ఎస్​వర్గాల్లో గుబులు రేపుతోంది. విచారణలో ప్రభాకర్ రావు ఏం చెప్తారో? ఎవరెవరి మెడకు ఈ వ్యవహారం చుట్టుకుంటుందో? అన్న ఆందోళన వ్యక్తమవుతోంది. క్రితంసారి జరిగిన ఎన్నికల్లో హ్యాట్రిక్​ విజయం సాధించాలని బీఆర్​ఎస్ సర్వశక్తులూ ఒడ్డిన విషయం తెలిసిందే. అయితే, పదేళ్ల బీఆర్ఎస్​ పాలనతో విసిగిపోయిన ఓటర్లు కాంగ్రెస్​ పార్టీకి ఘన విజయాన్ని కట్టబెట్టారు. ఆ తరువాత ప్రజా పాలన ప్రారంభమైన కొన్నాళ్లకే వెలుగు చూసిన ఫోన్​ట్యాపింగ్ ఉదంతం తీవ్ర సంచలనం సృష్టించింది. బీఆర్ఎస్​ప్రభుత్వంలోని కొందరు పెద్దల ఆదేశాల మేరకే అప్పట్లో ఎస్​ఐబీ ఛీఫ్​గా ఉన్న ప్రభాకర్ రావు ఫోన్​ట్యాపింగ్​వ్యవహారాన్ని నడిపించినట్టుగా అనుమానాలు వ్యక్తమయ్యాయి. అప్పట్లో పీసీసీ అధ్యక్షునిగా ఉన్న ప్రస్తుత ముఖ్యమంత్రి రేవంత్ రెడ్డితోపాటు కాంగ్రెస్​ పార్టీకి చెందిన పలువురు అగ్రనేతలు, వారి బంధుమిత్రులతోపాటు పలువురు పారిశ్రామిక వేత్తలు, చివరకు జడ్జిల ఫోన్లను కూడా ట్యాప్​ చేసినట్టుగా వార్తలు వచ్చాయి.

రూంలు పెట్టి మరీ ఫోన్​ ట్యాపింగులు

ఇక, ఈ కేసులో మొదటగా అరెస్టయిన ఎస్​ఐబీ మాజీ డీఎస్పీ ప్రణీత్ రావును జరిపిన విచారణలో సంచలన వివరాలు వెలుగు చూశాయి. కేసు విచారిస్తున్న బృందంలోని ఓ అధికారి తెలిపిన ప్రకారం గత అసెంబ్లీ ఎన్నికల సమయంలో బీఆర్​ఎస్ పార్టీ కీలక నేతలు పోటీ చేసిన అసెంబ్లీ సెగ్మెంట్లలో వార్​ రూంలు పెట్టి మరీ ఫోన్​ ట్యాపింగులు చేశారు. వీలు పడని చోట్ల వాహనాల్లో ఫోన్​ట్యాపింగ్ పరికరాలను అమర్చి వ్యవహారాన్ని నడిపించారు. ఇదంతా ఎస్​ఐబీ మాజీ డీఎస్పీ ప్రణీత్ రావు పర్యవేక్షణలోనే నడిచింది. బీఆర్​ఎస్​ నాయకుడు, మాజీ మంత్రి ఎర్రబెల్లి దయాకర్ రావు పోటీ చేసిన పాలకుర్తి నియోజకవర్గంలో ఏకంగా విజిలెన్స్ విభాగంలో పని చేసిన ఓ అధికారి ఇంట్లో వార్​రూం పెట్టి కాంగ్రెస్​అభ్యర్థి యశస్వినీ రెడ్డి, ఆమె అత్త ఝాన్సీ రెడ్డితోపాటు పలువురి ఫోన్లను ట్యాప్​చేశారు. సిరిసిల్ల, సిద్దిపేట, కామారెడ్డితోపాటు పలు నియోజకవర్గాల్లో ఈ వ్యవహారాన్ని నడిపించారు.

Also Read: MLA Mallareddy: ఇదేందయ్యా ఇది.. టైమ్ ట్రావెల్ చేసిన మల్లారెడ్డి.. బుద్ధుడితో భేటి!

ఫోన్​ట్యాపింగ్ పరికరాలు ఇజ్రాయిల్

దాంతోపాటు జూబ్లీహిల్స్​లోని రేవంత్ రెడ్డి ఇంటి సమీపంలో కూడా ఇలాంటి వార్​రూంను నడిపించారు. ఇక్కడ గమనించాల్సిన అంశం ఏమిటంటే బీఆర్ఎస్​లోని కొందరు నాయకులతోపాటు కాంగ్రెస్, బీజేపీ పార్టీలకు చెందిన పలువురి ఫోన్లను కూడా ట్యాప్​ చేయటం. కాంగ్రెస్​ పార్టీకి సానుకూలంగా ఉన్న పలువురు పారిశ్రామిక వేత్తలు, బడా వ్యాపారులను కూడా టార్గెట్ చేయటం. ఈ క్రమంలో ముప్పయి మందికి పైగా నగల వ్యాపారులు, రియల్టర్లు, నిర్మాణ కంపెనీల ప్రతినిధులను బెదిరించి పెద్ద మొత్తాల్లో డబ్బు కూడా వసూలు చేసినట్టుగా ఆరోపణలు వచ్చాయి. ఫోన్​ట్యాపింగ్​కోసం అవసరమైన పరికరాలను ఇజ్రాయిల్​నుంచి తెప్పించుకున్నట్టుగా వెల్లడైంది.

ప్రభాకర్​రావు పెదవి విప్పితే!

ఈ నేపథ్యంలోనే ప్రభాకర్​రావు సిట్​విచారణకు హాజరు కానుండటం బీఆర్ఎస్ వర్గాల్లో కలవరాన్ని కలిగిస్తోంది. ఈ కేసులో అరెస్టయిన ప్రణీత్​రావు తనకు పై అధికారుల నుంచి ఫోన్ నెంబర్లు వచ్చేవని, వాటిని ట్యాప్​చేసి ఎప్పటికప్పుడు వివరాలను వారికే పంపించే వాన్నని వెల్లడించారు. ఆ పై అధికారుల్లో ఒకరు ప్రభాకర్​రావు అని దర్యాప్తు అధికారులు చెబుతున్నారు. ఈ నేపథ్యంలో ప్రభాకర్​రావు పెదవి విప్పితే ఎవరి ఆదేశాల మేరకు ఫోన్​లను ట్యాపింగ్​ చేయించారన్నది స్పష్టమవుతుందని అంటున్నారు. ట్యాప్​ చేయాల్సిన ఫోన్​ నెంబర్లు ఎవరిచ్చేవారు? అన్నది తేలుతుందని చెబుతున్నారు.

Also Read:AP Politics: ప్రజా జీవితంలో ఫెయిల్ అయ్యిందెవరు.. జగన్ వర్సెస్ లోకేష్!