Telangana PCB: కాలుష్యం వెదజల్లే కంపెనీల చర్యలు.. 1,234 పరిశ్రమలకు నోటీసులు

Telangana PCB: : పర్యావరణ చట్టాలు, నియమాల అమలును తెలంగాణ కాలుష్య నియంత్రణ మండలి (టీజీపీసీబీ) కట్టుదిట్టం చేసింది. చట్టబద్ధమైన అధికారాలకు మరింత పదును పెడుతున్నది. కాలుష్య తీవ్రత ఆధారంగా సెంట్రల్ పొల్యూషన్ కంట్రోల్ బోర్డు(సీపీసీబీ) పరిశ్రమలను నాలుగు రకాలుగా విభజించారు. తెలంగాణలో ఈ నాలుగు కేటగిరీలకు సంబంధించిన పరిశ్రమలు 12,264 ఉన్నాయి. పరిశ్రమల్లో పెట్టుబడులకు ముందుకు వస్తున్న పారిశ్రామిక వేత్తలను ప్రోత్సహించడంలో భాగంగానే కొత్త పరిశ్రమలకు అనుమతులు ఇస్తున్నారు. అంతేకాకుండా పీసీబీ చట్టాలను, నిబంధనలను పరిశ్రమలు పాటిస్తున్నాయా అనే అంశాలపై నిరంతరం మానిటరింగ్ చేస్తున్నారు. నిబంధనలు పాటించని కంపెనీలకు నోటీసులు జారీ చేయడం, జరిమానా విధిస్తున్నారు. కాలుష్యం పెరుగకుండా ప్రత్యేక చర్యలు తీసుకుంటున్నారు.

కాంగ్రెస్ ప్రభుత్వంలో కొత్త అనుమతులు

కాంగ్రెస్ ప్రభుత్వం అధికారంలోకి వచ్చిన తర్వాత పారిశ్రామిక వేత్తలను ప్రోత్సహిస్తున్నది. రాయితీలు సైతం ప్రకటిస్తున్నది. అందులో భాగంగానే జనవరి 2024 నుంచి అక్టోబర్ 2025 వరకు కొత్త కంపెనీలు అనుమతులకు దరఖాస్తు చేసుకుంటే పీసీబీ ఓకే చెప్పింది. పరిశ్రమ నుంచి వచ్చే కాలుష్య కారకాలు, పర్యావరణ ప్రమాణాలకు అనుగుణంగా ఉన్నాయా లేదా అని నిర్ధారించడంతోపాటు నీరు, వాయు కాలుష్యాన్ని నివారించడానికి అనుమతి జారీ చేస్తున్నది. జనవరి 2024 నుంచి అక్టోబర్, 2025 వరకు 2620 కంపెనీల స్థాపనలకు అనుమతి ఇచ్చింది. 3,521 కంపెనీలకు కాన్సెప్ట్ ఫర్ ఆపరేషన్స్(సీఎఫ్ఓ) జారీ చేసింది. రాష్ట్రంలో మొత్తం నీటి కాలుష్య కారకాల పరిశ్రమలు 2,193. వాయు కాలుష్య కారకాల పరిశ్రమలు 3,164. ఈ పరిశ్రమల పనితీరును పీసీబీ అధికారులు నిత్యం పర్యవేక్షిస్తున్నారు. జనవరి 2024 నుంచి అక్టోబర్ 2025 వరకు మొత్తం 7,966 మురుగు నీటి/ప్రమాదకర వ్యర్థాల నమూనాలు, 3,807 గాలి కాలుష్య కారకాల నమూనాలను సేకరించినట్లు అధికారులు తెలిపారు. ఈ పరీక్షల్లో పీసీబీ నిబంధనలు ఏ కంపెనీ అయినా ఉల్లంఘించినట్లు తేలితే చర్యలు తీసుకుంటామని పేర్కొంటున్నారు.

Also Read: Telangana PCB: ఆ శాఖలో అధికారులదే పెత్తనం.. మంత్రిని సైతం లెక్క చేయని వైనం..!

305 కంపెనీలపై వేటు

పొల్యూషన్ పెరగకుండా ప్రభుత్వం తీసుకుంటున్న చర్యలతో ఈ రెండేళ్లలో రాష్ట్రంలో 305 కంపెనీలకు మూసి వేయాలని, ఉత్పత్తిని నిలిపి వేయాలని పీసీబీ ఉత్తర్వులు జారీ చేసింది. కాలుష్య నియంత్రణలో భాగంగా 2,069 పరిశ్రమలకు సంబంధించిన కాలుష్య కారకాలను సమీక్షించారు. వీటిలోనూ 1,234 పరిశ్రమలకు నోటీసులు జారీ చేయగా, పీసీబీ నిబంధనలు పాటిస్తున్నారని నిర్ధారించుకున్న తర్వాత 697 పరిశ్రమలకు మూసివేత రద్దు ఉత్తర్వులు జారీ చేసినట్టు అధికారులు తెలిపారు. పరిశ్రమల నుంచి వెలువడే ఉద్గారాలు, కాలుష్య కారకాలను గుర్తించడానికి 24 గంటలు ఆన్ లైన్ మానిటరింగ్ సెల్ ఏర్పాటైంది. 501 అత్యంత కాలుష్య కారక పరిశ్రమల నుండి ఉద్గారాలు, కాలుష్య కారకాలను ఆన్‌లైన్ మానిటరింగ్ సిస్టమ్‌ల ద్వారా ట్రాక్ చేస్తున్నారు. ఉద్గారాలు, కాలుష్య కారకాల నిబంధనలను అధిగమించినందుకు టాస్క్‌ఫోర్స్ కమిటీ 108 పరిశ్రమలను సమీక్షించింది. నిబంధనలు పాటించని వాటిపై చట్టపరమైన చర్యలు తీసుకునేందుకు సిద్ధమవుతున్నది. మరోవైపు, ఆయా కంపెనీలకు నియంత్రణ చర్యలు చేపట్టాలని లేకుంటే చర్యలు తప్పని ఆదేశాలు జారీ చేసింది.

కాలుష్యాన్ని నివారించేందుకు చర్యలు

ఈజ్ ఆఫ్ డూయింగ్ బిజినెస్(ఈఓడీపీ) కింద కంప్యూటరైజ్డ్ తనిఖీల కేటాయింపు కోసం సెంటర్ ఫర్ గుడ్ గవర్నెన్స్(సీజీజీ) ఒక ‘టూల్’ను అభివృద్ధి చేసింది. ఈ తనిఖీల అమలు డిసెంబర్ 2015 నుంచి ప్రారంభించారు. రాష్ట్రవ్యాప్తంగా యాదృచ్ఛిక ప్రాతిపదికన అధికారులకు తనిఖీ కోసం రెడ్ పరిశ్రమల కేటాయింపు జరుగుతున్నది. 2024 జనవరి నుంచి 2025 అక్టోబర్ వరకు టాస్క్ ఫోర్స్ కమిటీ 1,664 పరిశ్రమలను తనిఖీ చేసింది. 324 పరిశ్రమలను సమీక్షించడంతోపాటు చర్యలు తీసుకున్నట్టు సమాచారం.

మరోవైపు, ఫిర్యాదుల పరిష్కారం కోసం టీజీపీసీబీ టోల్ ఫ్రీ నంబర్ 10741, ఆన్‌లైన్ ఫిర్యాదు యాప్ ‘జనవాణి – కలుష్య నివారిణి’ని ఏర్పాటు చేసింది. పారిశ్రామిక ప్రాంతాలలో రాత్రి పెట్రోలింగ్ కూడా నిర్వహిస్తున్నారు. బల్క్ డ్రగ్, రసాయన పరిశ్రమల నుంచి వచ్చే ప్రధాన నీటి కాలుష్యాన్ని జీరో లిక్విడ్ డిశ్చార్జ్ వ్యవస్థలను అమలు చేస్తున్నారు. పరిశ్రమలలో శుద్ధి చేసిన మురుగు పునర్వినియోగాన్ని ప్రోత్సహిస్తున్నట్టు అధికారులు తెలిపారు. సురక్షిత వ్యర్థాల నిర్వహణకు 5 కామన్ ఎఫ్లూయెంట్ ట్రీట్‌మెంట్ ప్లాంట్లు, 26 ఈ వేస్ట్ రీసైక్లింగ్ ప్లాంట్లు, 4 కన్‌స్ట్రక్షన్, డెమోలిషన్ (సీ అండ్ డీ) వేస్ట్ ఫెసిలిటీలు, 12 బయో మెడికల్ వేస్ట్ ట్రీట్‌మెంట్ ప్లాంట్లను ప్రభుత్వం ఏర్పాటు చేసింది.

Also Read: Jangaon Crime: జనగామ జిల్లాలో ఘోరం.. తల్లి కూతురు దారుణ హత్య!