Shalibanda Fire Accident: శాలిబండలో అసలేం జరిగింది? గోమతి ఘటనపై ఎన్నో అనుమానాలు!

Shalibanda Fire Accident: శాలిబండలోని గోమతి ఎలక్ట్రానిక్స్​ షోరూంలో జరిగిన భారీ అగ్నిప్రమాదం వెనుక కుట్ర ఉన్నట్టుగా అనుమానాలు వ్యక్తమవుతున్నాయి. పేలుళ్ల ధాటికి షాపు షట్టర్లు ముక్కలు ముక్కలై 70 అడుగుల దూరానికి పైగా విసిరేసినట్టుగా పడిపోవడం, దారిన పోతున్న కారు పల్టీ కొట్టడం, దుకాణం ఉన్న రోడ్డుకు అవతలి వైపు ఉన్న రెండు కార్లు ధ్వంసం కావడం ఈ అనుమానాలకు బలాన్ని చేకూరుస్తున్నాయి. స్థానికులు కూడా ఇదే అంటున్నారు. చెవులు చిల్లులు పడేలా పేలుళ్ల శబ్ధాలు వినిపించాయని, కిటికీల అద్దాలు ధ్వంసం కావడంతోపాటు వంటింటిలో ఉన్న సామన్లు కింద పడ్డాయని చెప్పారు. షార్ట్​ సర్క్యూట్​ కారణంగా అగ్నిప్రమాదం జరిగి షాపులోని ఎలక్ట్రానిక్​ పరికరాలు పేలితే ఇంత పెద్ద శబ్ధం ఎలా వెలువడుతుందని, ఆ ధాటికి కిటికీల అద్దాలు ఎలా పగిలిపోతాయని ప్రశ్నిస్తున్నారు.

అధికారులకే కన్ఫ్యూజన్

ఘటనపై నిర్దిష్ట కారణాలు ఏమిటన్నది ఇటు పోలీస్, అటు అగ్నిమాపక శాఖ అధికారులు చెప్పలేక పోతున్నారు. షార్ట్​ సర్క్యూట్ కారణంగానే దుర్ఘటన జరిగినట్టుగా భావిస్తున్నామని అంటున్నారు. అత్తాపూర్ వాస్తవ్యుడైన ఓం ప్రకాశ్ బన్సల్‌కు ముగ్గురు సంతానం. పెద్ద కుమారుడైన పవన్, రెండో కుమారుడు శివకుమార్ కలిసి శాలిబండ క్లాక్ టవర దగ్గర కొన్నేళ్ల క్రితం గోమతి ఎలక్ట్రానిక్స్ షోరూంను ప్రారంభించారు. మూడో కుమారుడు రవి గోమతి స్కూల్ నడిపిస్తున్నాడు. కొన్నాళ్లపాటు కలిసి వ్యాపారం చేసిన పవన్ , శివకుమార్ మధ్య కొంతకాలం క్రితం విభేదాలు తలెత్తాయి. దాంతో భాగస్వామ్యం నుంచి విడిపోయిన పవన్ పాత షోరూంకు ఎదురుగానే గోమతి ఎలక్ట్రానిక్స్​ పేర మరో షోరూం పెట్టుకున్నాడు.

మూడు పేలుళ్లు.. అనుమానాలెన్నో

సోమవారం రాత్రి శివకుమార్ బన్సల్ నడిపిస్తున్న షోరూంలో పేలుళ్లు జరిగాయి. ప్రస్తుతం డీఆర్​డీవో ఆస్పత్రిలో చికిత్స పొందుతున్న అతను పోలీసులకు ఇచ్చిన వాంగ్మూలం ప్రకారం, సోమవారం రాత్రి ఒకదాని వెనుక మరొకటిగా మూడు పేలుళ్లు జరిగాయి. దాంతో వ్యాపించిన మంటలు చూస్తుండగానే షాపు మొత్తాన్ని చుట్టేశాయి. అయితే, జరిగిన ప్రమాదంపై ఎన్నో అనుమానాలు వ్యక్తమవుతున్నాయి. ప్రాథమిక విచారణలో షార్ట్ సర్క్యూట్ కారణంగా త​లెత్తిన మంటలు షోరూంలోని ఎలక్ట్రానిక్ పరికరాలకు వ్యాపించడం వల్లనే ప్రమాదం జరిగిందని పోలీస్ అధికారులు చెబుతున్నారు. మంటలు అంటుకున్న వాటిలో ఏసీలు, ఫ్రిడ్జ్‌లు, గీజర్లు ఉండడం, వాటిల్లో ఉండే గ్యాస్‌కు అవి అంటుకోవడం వల్లనే తీవ్రత పెరిగిందని అంటున్నారు.

ముక్కలై దాదాపు 70 అడుగుల దూరం

అయితే, సీనియర్ ఏసీ మెకానిక్​, సైదాబాద్ వాస్తవ్యుడైన మహ్మద్ అబ్దుల్లాతో మాట్లాడితే, ప్రస్తుతం ఎక్కువగా ఏసీల్లో ఆర్ 32, ఆర్ 410 ఏ గ్యాస్​ ఉంటున్నదని చెప్పాడు. ఇక, గీజర్లలో కార్బన్ మోనాక్సైడ్ ఉంటుందని తెలిపాడు. ఫ్రిడ్జిల్లో ఆర్ 134ఏ గ్యాస్ ఉంటుందని వివరించాడు. శాలిబండలో జరిగిన అగ్నిప్రమాదాన్ని చూస్తే షోరూంలోని ఫ్రిడ్జిలు, గీజర్లు, ఏసీల్లో ఉండే గ్యాస్‌కు మంటలు అంటుకోవడం వల్లనే అంత విధ్వంసం జరిగినట్టుగా అనిపించడం లేదని చెప్పాడు. దీనికి కారణం ఆయా పరికరాల్లో కొంత మొత్తం మాత్రమే గ్యాస్ ఉంటుందని తెలిపాడు. ఒకేసారి పది, ఇరవై ఫ్రిడ్జిలు, ఏసీలు, గీజర్లు అంటుకున్న తీవ్రత ఇంత ఉండదని వివరించాడు. అవి పేలడం వల్ల షాపు షట్టర్ ముక్కలు ముక్కలై దాదాపు 70 అడుగుల దూరం పడడం, దారిన వెళుతున్న కారు పల్టీకొట్టడం, రోడ్డుకు అవతలి వైపు పార్క్ చేసి ఉన్న కార్లు దెబ్బతినడం జరగదన్నాడు. ఇంత విధ్వంసం జరగాలంటే ఒకేసారి మంటలు అన్ని పరికరాలకు వ్యాపిస్తేనే సాధ్యమని తెలిపాడు.

Also Read: Hyderabad Fire Accident: శాలిబండలో భారీ అగ్నిప్రమాదం.. స్పాట్‌లో ఒకరి మృతదేహం!

ఎలక్ట్రానిక్​ పరికరాలు పేలితే ఇంత ఇంపాక్ట్ ఉంటుందా?

ఇక్కడ గమనించాల్సిన అంశం ఏమిటంటే గోమతి ఎలక్ట్రానిక్స్ షోరూం యజమాని శివకుమార్ బన్సల్ పోలీసులకు ఇచ్చిన వాంగ్మూలంలో ఒకదాని వెనుక మరొకటిగా మూడు పేలుళ్లు జరిగాయని అన్నాడు. ఈ నేపథ్యంలోనే జరిగింది అసలు ప్రమాదమేనా అనే అనుమానాలు వ్యక్తమవుతున్నాయి. ఇక, స్థానికులు చెబుతున్న ప్రకారం భారీ శబ్ధాలతో పేలుళ్లు జరిగాయి. ఇళ్ల కిటికీల అద్దాలు పగిలిపోవడంతోపాటు వంటింటిలోని సామన్లు సైతం పేలుళ్ల ధాటికి కింద పడిపోయాయి. ఎలక్ట్రానిక్​ పరికరాలు పేలితే ఇంత ఇంపాక్ట్ ఉంటుందా అనేది కూడా సందేహంగానే ఉన్నది. దర్యాప్తు అధికారులను దీనిపై ప్రశ్నిస్తే దుర్ఘటనకు స్పష్టమైన కారణాలు చెప్పలేకపోతున్నారు. ఇప్పటివరకు జరిపిన విచారణలో షార్ట్​ సర్క్యూట్​ కారణంగా తలెత్తిన మంటలు ఎలక్ట్రానిక్​ పరికరాలకు అంటుకోవడం వల్లనే ఈ ప్రమాదం జరిగినట్టుగా భావిస్తున్నామన్నారు. అన్ని కోణాల్లో విచారణ జరుపుతున్నట్టు చెప్పారు. క్లూస్ టీం దుర్ఘటనా స్థలం నుంచి పలు ఆధారాలను సేకరించినట్టు తెలిపారు. వాటిని విశ్లేషిస్తే అసలు కారణాలు స్పష్టమవుతాయని తెలిపారు.

ఆధారాలు సేకరించిన క్లూస్ టీం

ప్రమాద స్థలం నుంచి మంగళవారం క్లూస్ టీం సిబ్బంది పలు ఆధారాలను సేకరించారు. జాయింట్​ కమిషనర్ తఫ్సీర్​ ఇక్భాల్‌తోపాటు సౌత్ జోన్​ డీసీపీ దుర్ఘటనా స్థలాన్ని సందర్శించారు. అగ్నిమాపక శాఖకు చెందిన అధికారులు వచ్చి పరిస్థితిని పరిశీలించారు. జరిగిన సంఘటనపై మొఘల్ పురా పోలీసులు కేసులు నమోదు చేసి దర్యాప్తు చేస్తున్నారు. జాయింట్ సీపీ తఫ్సీర్​ ఇక్భాల్ మాట్లాడుతూ, ప్రమాదానికి నిర్దిష్ట కారణాలు ఏమిటన్నది ఇప్పుడే చెప్పలేమన్నారు. ఆధారాలను విశ్లేషించిన తరువాత చెప్పగలమని తెలిపారు. ఇప్పటివరకైతే షార్ట్​ సర్క్యూట్​ కారణంగానే ఈ ప్రమాదం జరిగినట్టుగా భావిస్తున్నామన్నారు.

Also Read: Shalibanda Fire Accident: గోమతి ఎలక్ట్రానిక్స్‌ అగ్నిప్రమాదం.. వెలుగులోకి షాకింగ్ నిజాలు!