Cyberabad Crime DSP: ఊరెళుతున్నారా జర భద్రం.. సైబరాబాద్​ క్రైం డీసీపీ సూచనలు!

Cyberabad Crime DSP: వేసవి సెలవులు వచ్చేశాయి…కుటుంబంతో కలిసి సరదాగా బయటకు వెళుతున్నారా?..అయితే…జర భద్రం అని సూచిస్తున్నారు. సైబరాబాద్​ క్రైం డీసీపీ ఎల్​.సీ.నాయక్. ఏమాత్రం ఏమరుపాటుగా ఉన్న దొంగలు ఇళ్లు గుల్ల చేయటం ఖాయమని హెచ్చరిస్తున్నారు. తీసుకోవాల్సిన జాగ్రత్తల గురించి వివరిస్తూ బయటకు ఎక్కడికైనా వెళితే ఇంట్లో ఉండే బంగారు నగలు, ఇతర విలువైన వస్తువులను బ్యాంక్​ లాకర్లలో భద్రపరుచుకోవాలన్నారు. ఎండాకాలంలోనే దొంగలు స్వైర విహారం చేస్తుంటారన్నారు.
ఇలా చేయండి…
ఎక్కడికైనా వెళుతున్నట్టయితే ఎన్ని రోజులు వెళుతున్నారు? ఎప్పుడు తిరిగొస్తున్నారు? అన్న వివరాలను స్థానిక పోలీసులకు తెలియ చేయాలి. దీనివల్ల పోలీసులు ఆ ఇంటిపై నిఘా పెడతారు. సెంట్రల్ లాకింగ్​ సిస్టం ఉన్న తాళాలను ఉపయోగించాలి. ఆయా ప్రాంతాల్లో ఉంటున్నవారు కొత్త వ్యక్తులు ఎవరైనా అనుమానాస్పదంగా కనిపిస్తే వెంటనే 100 నెంబర్​ కు ఫోన్​ చేసి సమాచారం ఇవ్వాలి ద్విచక్ర వాహనాలను ఇంటి కాంపౌండ్​ లో పార్క్​ చేసి వీల్​ చెయిన్​ తాళాలు వేయాలి. నమ్మకమైన వాచ్​ మెన్​ లేదా సెక్యూరిటీ గార్డును తాత్కాలికంగా నియమించుకోవాలి.

 Also Read: Fake Certificates: అమెరికా వెళ్ళాలన్న ఆశ.. బెడిసికొట్టిన ప్లాన్!

ప్రతీ ఒక్కరూ తమ తమ ఇళ్ల వద్ద సీసీ కెమెరాలు ఏర్పాటు చేసుకుని వాటిని ఆన్​ లైన్​ ద్వారా తమ తమ మొబైల్​ ఫోన్లలో గమనిస్తూ ఉండాలి. ఇక, బయటకు వెళ్లినన్ని రోజులు పాల ప్యాకెట్లు, పత్రికలను తెప్పించుకోవటం మానేయాలి. తాళం వేసినా ద్వారాలను పరదాలతో కప్పాలి. ఇంటి బయట వరండాలో కొన్ని లైట్లను ఆన్​ చేసి పెట్టాలి. ఇంట్లోని బీరువా, లాకర్ల తాళాలను వెంట తీసుకెళ్లాలి. ఆయా కాలనీలు, బస్తీల్లో ఉంటున్న వారు రాత్రుళ్లు గస్తీ చేసే సిబ్బందికి సహకరించాలి. వారి ఫోన్ నెంబర్లను తీసుకుని పెట్టుకోవాలి.

అవసరమైనపుడు వెంటనే ఫోన్​ చేయాలి. ఎన్ని రోజులు బయటకు వెళుతున్నారన్న వివరాలను ఎవ్వరితోనూ పంచుకోవద్దు. దీనిని వాట్సాప్​, ఇన్​ స్టాగ్రాం, ఫేస్​ బుక్​ తదితర సోషల్​ మీడియా వేదికల్లో పంచుకోవద్దు. అనుమానాస్పద వ్యక్తులు కనిపిస్తే 100 నెంబర్​ తోపాటు 94906 17100, వాట్సాప్​ నెంబర్​ 94906 17444లకు సమాచారం ఇవ్వాలి.

స్వేచ్ఛ ఈ పేపర్ కోసం ఈ https://epaper.swetchadaily.com/లింక్ క్లిక్ చేయగలరు