Minister Seethakka: బొకేలు వద్దు.. బ్లాంకెట్లు తీసుకురండి.. మంత్రి సీతక్క కీలక సూచన

Minister Seethakka: వాటితో చలి నుంచి పేదలను రక్షించవచ్చు

నూతన ఏడాదిలో మానవత్వమే గొప్ప కానుక
న్యూఇయర్ సందర్భంగా మంత్రి సీతక్క పిలుపు

తెలంగాణ బ్యూరో, స్వేచ్ఛ: నూతన సంవత్సరాన్ని (New Year 2026) ఆర్భాటాలకు పోకుండా మానవత్వంతో ప్రారంభించాలని మంత్రి సీతక్క (Minister Seethakka) పిలుపునిచ్చారు. సచివాలయంలో గురువారం సెర్ప్ సీఈవో దివ్య దేవరాజన్ ఆధ్వర్యంలో సెర్ప్ డైరెక్టర్లు, సిబ్బంది మంత్రిని కలిసి నూతన సంవత్సర శుభాకాంక్షలు తెలిపారు. ఈ సందర్భంగా పూల బొకే కాకుండా తెలంగాణ నేతన్నలు తయారు చేసిన దుప్పటిని అందజేశారు. దీనిపై మంత్రి సీతక్క హర్షం వ్యక్తం చేశారు. ఈ సందర్భంగా ఆమె మాట్లాడుతూ, సెర్ప్ డిపార్ట్‌మెంట్ ద్వారా పేదరిక నిర్మూలన కోసం ప్రభుత్వం తీవ్రంగా కృషి చేస్తోందని గుర్తుచేశారు.

Read Also- Chamala Kiran Kumar Reddy: పదేళ్లు గాడిద పళ్లు తోమారా?.. బీఆర్ఎస్‌పై ఎంపీ చామల కిరణ్ ఫైర్

తనను కలవడానికి వచ్చేవారు ఈ సంవత్సరం నుంచి బొకేలు కాకుండా శాలువాలు, దుప్పట్లు ఇవ్వాలని మంత్రి సీతక్క సూచించారు. అలా అందే దుప్పట్లను పేద విద్యార్థులు, చలితో వణికే పిల్లలకు ఉపయోగపడతాయని ఆమె చెప్పారు. చలికాలంలో నిరాశ్రయులు, వృద్ధులు, కూలీలు ఎదుర్కొంటున్న ఇబ్బందులనుఆమె గుర్తుచేశారు. బొకేలు క్షణాల్లో వాడుకోకుంటే ఉపయోగం ఉండదని, అదే ఒక దుప్పటి మాత్రం పేదవాడికి రక్షణగా నిలుస్తుందని మంత్రి పేర్కొన్నారు. “బొకేలు వద్దు… బ్లాంకెట్లు ఇవ్వండి” అంటూ ఆమె పిలుపునిచ్చారు. నూతన సంవత్సరంలో మానవత్వమే గొప్ప కానుక అని అభిప్రాయపడ్డారు. సెక్రటేరియెట్ ముందు శాలువాలు, దుప్పట్లు సులభంగా లభించేలా టెస్కో ద్వారా ప్రత్యేక సెంటర్ ఏర్పాటు చేసేందుకు కృషి చేస్తామని మంత్రి సీతక్క హామీ ఇచ్చారు. పేదల చిరునవ్వే నిజమైన నూతన సంవత్సర శుభాకాంక్ష అని, చిన్న సహాయం కూడా పెద్ద మార్పునకు దారి తీస్తుందని ఆమె అన్నారు.

సీఎం రేవంత్‌ని కలిసి సీతక్క

నూతన సంవత్సరం ప్రారంభం సందర్భంగా ముఖ్యమంత్రి రేవంత్ రెడ్డికి మంత్రి సీతక్క గురువారం నాడు శుభాకాంక్షలు తెలిపారు. సచివాలయంలో ఆయనను కలిశారు. సీఎం రేవంత్ రెడ్డి సారధ్యంలో ప్రజా ప్రభుత్వం తెలంగాణ విజన్ 2047 లక్ష్యాలు సాధించాలని, రాష్ట్రం మరింత అభివృద్ధి సాధించాలని ఆకాంక్షిస్తున్నట్టు మంత్రి సీతక్క చెప్పుకొచ్చారు. మరోవైపు, రాజ్ భవన్‌లో రాష్ట్రగవర్నర్ విష్ణు దేవ్ వర్మ‌ను కూడా మంత్రి సీతక్క మర్యాదపూర్వకంగా కలిశారు. నూతన సంవత్సర శుభాకాంక్షలు చెప్పి, పుష్పగుచ్ఛం అందించారు.

Read Also- UAE New Year 2026: డ్రోన్ షో.. ఫైర్ వర్క్స్‌లో సరికొత్త రికార్డు క్రియేట్ చేసిన యూఏఈ