Asifabad District: చీకట్లో మాటు వేసిన ఏసీబీ.. ఆ చెక్ పోస్ట్ వద్ద సినిమా రేంజ్ సీన్స్..

Asifabad District: కుమ్రంభీం ఆసిఫాబాద్ జిల్లాలోని వాంకిడి చెక్‌పోస్ట్ వద్ద అర్థరాత్రి ఏసీబీ అధికారులు ఆకస్మిక దాడులు చేశారు. అక్రమ వసూళ్లకు పాల్పడుతున్న ప్రైవేట్ వ్యక్తుల నుంచి 45 వేల రూపాయలను స్వాధీనం చేసుకున్నారు. ఈ ఘటనలో కానిస్టేబుల్, కంప్యూటర్ ఆపరేటర్‌లు అధికారులను చూసి పరారయ్యారు.

కుమ్రంభీం ఆసిఫాబాద్ జిల్లాలోని అంతరాష్ట్ర రహదారిపై ఉన్న వాంకిడి చెక్‌పోస్ట్ వద్ద అక్రమ వసూళ్లు జరుగుతున్నాయనే సమాచారంతో అర్థరాత్రి ఏసీబీ అధికారులు ఆకస్మిక తనిఖీలు నిర్వహించారు. గత కొంత కాలంగా ఈ చెక్‌పోస్ట్ వద్ద ప్రైవేట్ వ్యక్తులు తమ ఇష్టారీతిన డబ్బులు వసూలు చేస్తున్నారని వచ్చిన ఫిర్యాదుల ఆధారంగా ఈ దాడులు జరిగాయి.

ఈ ఆపరేషన్‌లో ఏసీబీ అధికారులు అక్రమ వసూళ్లలో పాల్గొన్న విజయ్ కుమార్, ఐలయ్య అనే ఇద్దరు ప్రైవేట్ వ్యక్తులను పట్టుకున్నారు. వీరి నుంచి 45 వేల రూపాయల నగదును స్వాధీనం చేసుకోవడంతో పాటు, వారి మొబైల్ ఫోన్‌లను కూడా సీజ్ చేశారు. ఈ ఘటన సమయంలో అక్కడే ఉన్న ఓ కానిస్టేబుల్, కంప్యూటర్ ఆపరేటర్‌లు అధికారులను చూసి ఘటనా స్థలం నుంచి పరారయ్యారు.

Also Read: ఇసుక దోపిడీకి కళ్లెం.. కొత్త విధానంతో వ్యాపారుల విలవిల..

ఈ దాడులు చెక్‌పోస్ట్ వద్ద జరుగుతున్న అవినీతిని బయటపెట్టాయని, ఇందులో ప్రైవేట్ వ్యక్తులతో పాటు అధికారుల ప్రమేయం ఉండే అవకాశం ఉందని ఏసీబీ వర్గాలు తెలిపాయి. పరారీలో ఉన్న కానిస్టేబుల్, కంప్యూటర్ ఆపరేటర్‌లను పట్టుకునేందుకు ప్రత్యేక బృందాలను ఏర్పాటు చేసినట్లు సమాచారం. ఈ ఘటనపై పూర్తి విచారణ జరిపి, ఇందులో పాల్గొన్న వారందరిపై కఠిన చర్యలు తీసుకుంటామని ఏసీబీ అధికారులు తెలిపారు.

ఈ ఆపరేషన్‌తో వాంకిడి చెక్‌పోస్ట్ వద్ద అక్రమ వసూళ్లకు చెక్ పడినప్పటికీ, ఇలాంటి ఘటనలు రాష్ట్రంలోని ఇతర చెక్‌పోస్ట్‌లలో కూడా జరుగుతున్నాయా అనే అనుమానాలు వ్యక్తమవుతున్నాయి.

కుమ్రంభీం ఆసిఫాబాద్ జిల్లాలో జరిగిన ఈ ఘటన తరహాలోనే తెలంగాణలో ఇటీవల ఇలాంటి అవినీతి సంఘటనలను చోటుచేసుకున్నాయి. అయితే ఈ అక్రమాలకు పాల్పడుతున్నవారికి ఉన్నతాధికారుల అండదండలూ ఉన్నాయనే ఆరోపణలూ వినిపిస్తున్నాయి.

గతంలో సంగారెడ్డి జిల్లాలోని ఓ చెక్‌పోస్ట్ వద్ద లారీ డ్రైవర్ల నుంచి అక్రమంగా డబ్బులు వసూలు చేస్తున్న ఇద్దరు పోలీసు కానిస్టేబుళ్లను ఏసీబీ అధికారులు పట్టుకున్నారు. ఈ దాడిలో 15 వేల రూపాయల నగదు స్వాధీనం చేసుకున్నారు. ఈ ఘటనలోనూ అధికారులు పరారయ్యేందుకు ప్రయత్నించినప్పటికీ, ఏసీబీ అధికారులు వారిని అదుపులోకి తీసుకున్నారు.

Also Read: సైబర్ నేరగాళ్లకు చుక్కలే.. సీపీ సీరియస్..

చెక్‌పోస్ట్‌లు, రవాణా కార్యాలయాలు, ఆర్టీసీ వంటి ప్రజలతో నేరుగా సంబంధం ఉన్న విభాగాల్లో అక్రమ వసూళ్లు జరగడం ఆందోళనకరంగా మారింది. ఏసీబీ దాడులు ఈ సమస్యను కొంతవరకు అరికడుతున్నప్పటికీ, దీర్ఘకాలిక పరిష్కారం కోసం కఠిన చర్యలు, పారదర్శక విధానాలు అవసరమని పలువురు అభిప్రాయపడుతున్నారు.

వాంకిడి చెక్‌పోస్ట్ ఘటనతో మరోసారి ఈ సమస్యపై చర్చకు దారితీసింది. ఏసీబీ అధికారులు ఈ కేసులో పూర్తి విచారణ చేసి, ఇందులో పాల్గొన్న వారందరిపై చర్యలు తీసుకుంటామని హామీ ఇచ్చారు. రాష్ట్ర ప్రభుత్వం ఈ ఘటనలను సీరియస్‌గా పరిగణించి, అవినీతిని అరికట్టేందుకు మరింత కఠిన నిర్ణయాలు తీసుకోవాల్సిన అవసరం ఉందని ప్రజలు డిమాండ్ చేస్తున్నారు.