KTR: తెలంగాణకు మొదట్నుంచీ కాంగ్రెస్ విలన్.. బీఆర్ఎస్ వర్కింగ్ ప్రెసిడెంట్ కేటీఆర్ మండిపాటు!

KTR: తెలంగాణకు మొదట్నుంచీ కాంగ్రెస్ విలన్ అని బీఆర్ఎస్ వర్కింగ్ ప్రెసిడెంట్ కేటీఆర్ (KTR) మండిపడ్డారు. కేసీఆర్ దీక్షా స్ఫూర్తితో తాము పోరాడుతున్నామని తెలిపారు. సీఎం రేవంత్ రెడ్డి కేసీఆర్ పేరు లేకుండా ఒక్క ప్రసంగమైనా చేశారా? అని ప్రశ్నించారు. తెలంగాణ భవన్ లో  ఘనంగా దీక్ష దివాస్ నిర్వహించారు. భవన్ లోని తెలంగాణ తల్లి విగ్రహం, జయ శంకర్ సార్ విగ్రహానికి నివాళులు అర్పించారు. తెలంగాణ ఉద్యమం, కేసీఆర్ దీక్ష, 2009 నుంచి 2023 పాలన వరకు చేసిన ఉద్యమం, స్వరాష్ట్ర సాధన, గెలుపు, పదేళ్ల సంక్షేమం పై చిత్ర ప్రదర్శన, ఫోటో ఎగ్జిబిషన్ ను పరిశీలించారు. బీ ఆర్ ఎస్ అధినేత కేసీఆర్ ఉద్యమం పై డాక్యుమెంటరీని ఆవిష్కరించి వీక్షించారు. దీక్షా దివాస్ ప్రాంగణంలో ఏర్పాటు చేసిన తెలంగాణ అమరవీరుల స్థూపానికి పూలమాల వేసి నివాళి అర్పించి కేటీఆర్ మాట్లాడారు.

కేసీఆర్ లేకపోతే తెలంగాణ లేదు 

కేసీఆర్ ఎప్పుడు బయటకు రావాలో అప్పుడే వస్తారన్నారు. ఎదురుదాడి ఎలా చెయ్యాలో కేసీఆర్‌కు తెలిసినంతగా ఇంకెవరికీ తెలియదన్నారు. నాయకుడిని నాయకుడే అంటారని.. అర్భకుడిని అర్భకుడే అంటారని.. ఇలా మాట్లాడితే తనకు అహంకారం అంటారని కానీ తాను ఇలానే మాట్లాడుతానని ఏం చేసుకుంటారో చూసుకోండి అని అన్నారు. కేసీఆర్ లేకపోతే తెలంగాణ లేదని స్పష్టం చేశారు.. తెలంగాణ ఉద్యమంలో పాల్గొనని వారు కేసీఆర్‌ను విమర్శిస్తున్నారని మండిపడ్డారు. పీసీసీ అధ్యక్షుడు కేసీఆర్ దీక్ష.. దొంగ దీక్ష అని మాట్లాడుతున్నారని.. అడ్డమైన మాటలు కొందరు మాట్లాడుతున్నారంటూ ఫైర్ అయ్యారు. సింహం తన గాధను తాను చెప్పుకోకపోతే, వేటగాడు చెప్పే పిట్టకథనే నిజం అనుకుంటారంటూ పేర్కొన్నారు. ఎన్నడూ జై తెలంగాణ అననోళ్ళు పెద్ద పెద్ద మాటలు మాట్లాడుతున్నారంటూ మండిపడ్డారు. కేసీఆర్ అనే మూడు అక్షరాలు లేకుంటే తెలంగాణ లేదు అన్నది సత్యం అన్నారు.

Also Read: KTR: సౌదీ మృతుల కుటుంబాలకు అండగా బీఆర్ఎస్.. సహాయసహకారాలు అందిస్తామని కేటీఆర్ హామీ

సోనియా గాంధీని బలిదేవత అన్నది ఇప్పుడున్న ముఖ్యమంత్రి

పది మంది ఎమ్మెల్యేలతో రాజీనామా చేయించి బైఎలక్షన్స్‌కు రావాలంటూ సీఎం రేవంత్‌ రెడ్డికి సవాల్ విసిరారు. సోనియా గాంధీని బలిదేవత అన్నది ఇప్పుడున్న ముఖ్యమంత్రి అని గుర్తుచేశారు. సోనియా గాంధీకి అసెంబ్లీలో ధన్యవాదాలు తెలిపిన సంస్కారి కేసీఆర్ అని అన్నారు. కేసీఆర్ దొంగ దీక్ష అయితే ఆనాడు కేంద్రంలో ఉన్న కాంగ్రెస్ ప్రభుత్వం ఎందుకు విరమించమని చెప్పిందని ప్రశ్నించారు. రాజీవ్ గాంధీ విగ్రహం స్థానంలో తెలంగాణ తల్లి విగ్రహాన్ని పెట్టుకుందామని దీక్షా దివస్ సాక్షిగా ప్రతిజ్ఞ చేస్తున్నామన్నారు. కాంగ్రెస్ పార్టీ హీరోలను విలన్లుగా చిత్రీకరిస్తుందని విమర్శించారు. కాళేశ్వరం మీద కుట్ర జరిగిందని ఆరోపించారు. మేడిగడ్డ బ్యారేజ్‌ను బాంబులు పెట్టి కూల్చివేసే ప్రయత్నం జరిగిందన్నారు.

గులాబీలదే అంటూ ధీమా వ్యక్తం

గులాంల ఎగురులాట కొంత కాలమే.. వచ్చే కాలమంతా గులాబీలదే అంటూ ధీమా వ్యక్తం చేశారు. దీక్షా దివాస్ అంటే కేవలం కేసీఆర్ దీక్ష చేసిన రోజు మాత్రమే కాదని, దీక్షా దివాస్‌ని ఎప్పటికప్పుడు ఒక దసరా, దీపావళి మాదిరి జరుపుకోవాల్సిన అవసరం ఉన్నదని, ఆ పండుగలో ఉన్న స్ఫూర్తిని గుర్తు చేసుకోవాలన్నారు. 60ఏళ్ల తెలంగాణ చరిత్రను తలుచుకొని, తెలంగాణ కోసం మరోసారి పునరంకితం కావాల్సిన రోజు అని పిలుపు నిచ్చారు. మాయ మాటలతో మోసం చేసి అధికారంలోకి వచ్చిన కాంగ్రెస్ పార్టీ అరాచకాలను, అవినీతిని ఎప్పటికప్పుడు ఎత్తి చూపుతూ తెలంగాణను కాపాడుకుందాం అన్నారు.మాజీ మంత్రులు తలసాని శ్రీనివాస్ యాదవ్, మహమూద్ అలీ, మండి డిప్యూటీ చైర్మన్ బండా ప్రకాశ్, మాజీ ఎంపీ రావుల చంద్రశేఖర్ రెడ్డి, ఎమ్మెల్సీలు దాసోజు శ్రవణ్, వాణిదేవి, ఎమ్మెల్యేలు కాలేరు వెంకటేష్, ముఠాగోపాల్, నాయకులు కిశోర్ గౌడ్, తుల ఉమ, రాంనర్సింహ్మాగౌడ్, మన్నె గోవర్ధన్ తదితరులు పాల్గొన్నారు.

Also Read: KTR Warns Congress: బీఆర్ఎస్ కార్యకర్త ఇంటిముందు కేటీఆర్ ప్రెస్‌మీట్.. జూబ్లీహిల్స్ ఓటమిపై సంచలన వ్యాఖ్యలు