Harish Rao:మేడిగడ్డ పిల్లర్లు కుంగిపోవడం వెనుక జిలెటిన్ స్టిక్స్ కుట్ర : మాజీ మంత్రి హరీశ్ రావు

Harish Rao: కాంగ్రెస్ పాలనలో చెరువులు, చెక్ డ్యామ్‌ల విధ్వంసం నిత్యకృత్యంగా మారిందని మాజీ మంత్రి హరీశ్ రావు అన్నారు. ప్రస్తుతం జరుగుతున్న బ్లాస్టింగ్స్ చూస్తుంటే, మేడిగడ్డ పిల్లర్లు కుంగిపోవడం వెనుక కూడా జిలెటిన్ స్టిక్స్ కుట్ర ఉండి ఉంటుందని అనుమానం వ్యక్తం చేశారు. చెక్ డ్యామ్‌ను పేల్చిన వారిపై చర్యలు తీసుకోకపోతే, వచ్చే బీఆర్ఎస్ ప్రభుత్వంలో మాఫియాకు సహకరించిన అధికారులను, పోలీసులను వదిలిపెట్టమని హెచ్చరించారు. కేసీఆర్‌కు పేరు వస్తుందనే దురుద్దేశంతోనే కాళేశ్వరం ప్రాజెక్టుకు మరమ్మతులు చేయకుండా, పిల్ల కాలువలు తవ్వకుండా కాంగ్రెస్ ప్రభుత్వం రైతుల కడుపు కొడుతున్నదని మండిపడ్డారు. జమ్మికుంట మండలం తనుగుల గ్రామంలోని మానేరు వాగులో చెక్ డ్యామ్‌ పేల్చిన ఘటనా స్థలాన్ని మంగళవారం హరీశ్ రావు పరిశీలించారు.

ఇసుక మాఫియా ఆధ్వర్యంలోనే

జమ్మికుంట, ఓదెల మండలాల మధ్య మానేరు నదిపై రూ.24 కోట్లతో నిర్మించిన చెక్ డ్యాంను ఇసుక మాఫియా ఆధ్వర్యంలో పేల్చారని మండిపడ్డారు. గతంలో హుస్సేన్ మియా వాగుపై చెక్ డ్యామ్‌ను పేల్చే ప్రయత్నం చేశారన్నారు. నిర్మల్‌లో స్వర్ణ వాగుపై ఉన్న చెక్ డ్యామ్‌ను పేల్చేశారని గుర్తు చేశారు. ఇప్పుడు మానేరు నదిపై బీఆర్ఎస్ ప్రభుత్వం నిర్మించిన డ్యామ్‌ను పేల్చి వేశారన్నారు. రాష్ట్రంలో ఇసుక మాఫియా రాజ్యమేలుతున్నదని, భోజన్నపేట, కొత్తపేటలోని రైతులతో పాటు వందల మంది సంతకాలు పెట్టి హుస్సేన్ మియా వాగు కట్టను పేల్చేందుకు చూశారని ఫిర్యాదు చేశారన్నారు. ఇరిగేషన్ ఇంజినీర్లు బాంబ్ బ్లాస్ట్ జరిగింది, జిలెటిన్లు పెట్టి పేల్చారని పోలీసులకు ఫిర్యాదు చేశారని, ఇప్పటి వరకు కనీస చర్యలు లేవని ఆరోపించారు.

Also Read: Harish Rao: ఇదేనా ఉద్యోగులకు ఇచ్చే గౌరవం.. మీకు మనుసు లేదా.. సీఎంపై హరీశ్ రావు ఫైర్

కంపెనీని బ్లాక్ లిస్ట్‌లో పెట్టాలి

‘‘హైదరాబాద్‌లో పేదల ఇల్లులను కూలుస్తారు, ఇక్కడేమో రైతులకు ఉపయోగపడే చెక్ డామ్‌లు కూల్చేస్తారు. కూల్చడం తప్ప కట్టడం మీకు చేతకాదు. కాంగ్రెస్ ప్రభుత్వానికి ఏదీ చేతకాదు’’ అని హరీశ్ రావు అన్నారు. నిర్మల్, కరీంనగర్, పెద్దపల్లి, మంచిర్యాల జిల్లాల్లో చెక్ డామ్‌లను కాంగ్రెస్ నాయకులు, ఇసుక మాఫియా కూలుస్తున్నాయని ఆరోపించారు. బీఆర్ఎస్ ప్రభుత్వం 1200 చెక్ డామ్‌లు నిర్మించిందని గుర్తు చేశారు. అలాగే, 44 వేల చెరువుల పునర్ధరణను చేసిందన్నారు. చెక్ డ్యామ్ దుండగుల పేలుడులో కూలి ఉంటే వెంటనే చర్యలు చేపట్టాలని డిమాండ్ చేశారు. లేదా కాంట్రాక్టర్ సరిగ్గా నిర్మాణం చేయలేదా, ఈ కట్టను నిర్మించిన రాఘవ కన్‌స్ట్రక్షన్ కంపెనీని బ్లాక్ లిస్ట్‌లో పెట్టండి అని సూచించారు. రాష్ట్రంలో చేస్తున్న అన్ని టెండర్లను రద్దు చేయాలని డిమాండ్ చేశారు.

కాళేశ్వరంపై విషం చిమ్మారు

ఎన్‌డీఎస్‌ఏ, విజిలెన్స్, ఘోష్ కమిషన్ అంటూ కాళేశ్వరంపై విషం చిమ్ముతున్నారని హరీశ్ రావు మండిపడ్డారు. రెండేళ్లు అయినా ప్రాజెక్ట్‌ ఎందుకు మరమ్మతులు చేయడం లేదని ప్రశ్నించారు. యాదాద్రి, సిద్దిపేట, మెదక్, కరీంనగర్, సిరిసిల్ల, సంగారెడ్డి జిల్లాల్లో కొద్దిపాటి ఖర్చుతో పిల్ల కాలువలు తవ్వితే లక్ష ఎకరాలకు నీళ్లు అందుతాయన్నారు. కేసీఆర్‌కు పేరొస్తుందని, బీఆర్ఎస్ ప్రభుత్వాన్ని ప్రజలు గుర్తు చేసుకుంటారని కాళేశ్వరాన్ని పడావు పెట్టారని మండిపడ్డారు. మల్లన్న సాగర్‌లో 25 టీఎంసీలు, కొండపోచమ్మలో 10 టీఎంసీలు, అన్నపూర్ణలో మూడున్నర టీఎంసీలు, రంగనాయక సాగర్‌లో 3 టీఎంసీల నీరు ఉన్నదని వివరించారు.

కాంగ్రెస్ ప్రభుత్వం ఆలోచించడం లేదు 

కొంత ఖర్చుతోనే కాలువలు తవ్వితే లక్షల ఎకరాల్లో పంటలు పండుతాయన్నారు. తాజా బ్లాస్టింగ్ చూస్తుంటే మేడిగడ్డ దగ్గర కూడా జిలెటిన్లు పెట్టి బ్లాస్ట్ చేశారేమో అనే అనుమానాలు వస్తున్నాయన్నారు. మేడిగడ్డలో రెండు పిల్లర్లు కుంగితే కాంగ్రెస్ పార్టీ రాజకీయం చేసిందని గుర్తు చేశారు. మేడిగడ్డ దగ్గర కూడా జిలెటిన్స్ పెట్టి పేల్చినట్టు ఇంజినీర్లు కంప్లైంట్ ఇచ్చారని, పెద్దపల్లిలో జిలెటిన్ స్టిక్స్‌తో కాంగ్రెస్ నాయకులు దొరికారన్నారు. వాటాల కోసం తప్ప రైతుల ప్రయోజనాల కోసం కాంగ్రెస్ ప్రభుత్వం ఆలోచించడం లేదని మండిపడ్డారు. అసెంబ్లీలో ఈ ప్రభుత్వాన్ని నిలదీస్తామని, చెక్ డామ్‌లు పేల్చివేతపై బీఆర్ఎస్ పోరాటం చేస్తుందని హరీశ్ రావు స్పష్టం చేశారు.

Also Read: Harish Rao: రైతుల కన్నీళ్లు పట్టట్లేదా.. పంట బీమా ఎక్కడ.. సీఎంపై హరీశ్ రావు ఫైర్