Sleep For Weight Loss: నిద్ర‌పోతే బ‌రువు త‌గ్గుతారా?

Sleep For Weight Loss:  అవును..మీరు చ‌దివింది క‌రెక్టే. నిద్ర‌తో కూడా బ‌రువు త‌గ్గ‌చ్చ‌ట‌. సాధారణంగా బరువు తగ్గడం అంటే ఆరోగ్యకరమైన ఆహారం తినడం, వ్యాయామం చేయడం, చక్కెర తగ్గించడం వంటి కఠినమైన పనులు చేయాల్సిన అవసరం ఉంటుంది. కానీ తాజా అధ్యయనాల ప్రకారం, నిద్రపోవడం కూడా బరువు తగ్గడానికి సహాయపడుతుందని తేలింది.

ఇదెలా సాధ్యం?

మనలో చాలా మంది ఉదయం నుంచి రాత్రి వరకు ప‌లు మార్లు తింటూ ఉంటాం. ఇది అప్పటివరకు ప్లాన్ చేసుకున్నదాని కంటే ఎక్కువ క్యాలరీలను తీసుకునేలా చేస్తుంది. ఈ అంశాన్ని పరిశీలించిన శాస్త్రవేత్తలు, సాల్క్ ఇన్‌స్టిట్యూట్ నిర్వహించిన ఒక అధ్యయనంలో, రోజుకు 14 గంటలు మేల్కొని ఉండే వ్యక్తులను 11 గంటలకు మాత్రమే పరిమితం చేయమని సూచించారు. 16 వారాల తర్వాత, వారు ఎలాంటి వ్యాయామం చేయకుండానే 4% అదనపు బరువును కోల్పోయారు.

కారణం 1: రాత్రి తినే అలవాటు త‌గ్గ‌డం

ఒక‌సారి మీరే ఆలోచించండి. మీరు రాత్రి ఆలస్యంగా మేల్కొని పని చేస్తుంటే లేదా ఫోన్లో మాట్లాడుతుంటే, మీ శరీరంలో సర్కేడియన్ రిథమ్ (జీవన ఛక్రం) దెబ్బతింటుంది. దీనివల్ల ఘ్రెలిన్ అనే ఆకలి హార్మోన్ అధికంగా విడుదల అవుతుంది. అందుకే రాత్రి పూట ఏదో ఒక‌టి తినాల‌పిస్తుంది. నిజ‌మా కాదా? పెన్సిల్వేనియా విశ్వవిద్యాలయం నిర్వహించిన అధ్యయనంలో, రాత్రి 4 గంటల వరకు మేల్కొని ఉదయం 8 గంటలకు నిద్రపోయిన వ్యక్తులు, రాత్రి 11 గంటల నుంచి ఉదయం 8 గంటల వరకు నిద్రపోయిన వ్యక్తులతో పోలిస్తే రోజుకు 550 క్యాలరీలు అధికంగా తిన్నారని తేలింది.

కారణం 2: నిద్రలో కూడా క్యాలరీలు క‌రిగిపోతాయ్‌

Sleep For Weight Loss మన శరీరం నిద్రలో ఉన్నప్పటికీ క్యాలరీలను ఖర్చు చేస్తూనే ఉంటుంది. ఒక్క గంట నిద్రలో సుమారు 65 క్యాలరీలు ఖర్చవుతాయి. అంటే 8 గంటల నిద్రలో 500 క్యాలరీలకు పైగా కరుగుతాయ‌ట‌..! చికాగో విశ్వవిద్యాలయం పరిశోధన ప్రకారం, బాగా నిద్రపోయిన వ్యక్తుల్లో కొవ్వు తగ్గింపు మరింత వేగంగా జరుగుతోందని గుర్తించింది.

కారణం 3: మంచి నిద్రతో ఆరోగ్యకరమైన ఆహారం ఎంచుకుంటారు

ఒబెసిటీ అనే జర్నల్‌లో ప్రచురితమైన ఒక అధ్యయనం ప్రకారం, తక్కువ నిద్రపోయిన వ్యక్తులు, ఎక్కువ నిద్రపోయిన వారితో పోల్చితే 1300 అదనపు క్యాలరీలు ఉండే ఆహార పదార్థాలను కొనుగోలు చేసినట్లు గుర్తించారు. అంతేకాకుండా, మరో పరిశోధన ప్రకారం, తగినంత నిద్రపోయిన వ్యక్తులు తక్కువ మొత్తంలో ఆహారాన్ని తీసుకోవడానికి మొగ్గుచూపుతున్నార‌ట‌. వారు సగటున 35 క్యాలరీలు తక్కువ తింటారు.

కారణం 4: తక్కువ ఒత్తిడి – ఎక్కువ ఏకాగ్రత

మంచి నిద్ర వల్ల మన మెదడులోని వెంట్రోమీడియల్ ప్రీఫ్రాంటల్ కార్టెక్స్ ఉత్తేజితమవుతుంది. ఇది మన ప్రవర్తనను నియంత్రించడానికి, ఫోకస్ మెరుగుపరచడానికి సహాయపడుతుంది. హార్వార్డ్ మెడికల్ స్కూల్ పరిశోధన ప్రకారం, తక్కువ నిద్ర కార్టిసాల్ అనే ఒత్తిడి హార్మోన్‌ను పెంచుతుంది. ఇది కొవ్వు నిల్వలను పెంచి బరువు పెరగడానికి కారణమవుతుంది.

బాగా నిద్రపోవడం కోసం చేయాల్సినవి

7-9 గంటల నిద్ర లేకుండా ఎంత క్రమశిక్షణతో ఉన్నా మీరు అసంతృప్తిగా అనిపించి, ఎక్కువ తినే అవకాశం ఉంది. బరువు తగ్గేందుకు మీరు ఈ సులభమైన మార్గాలను అనుసరించండి

ట్రిప్టోఫాన్ సమృద్ధిగా ఉన్న ఆహారం తినండి – ఇది నిద్రను ప్రేరేపించే హార్మోన్. బాదం, చేపలు, చికెన్, గుడ్లు, పెసర్లు, అవకాడోలు వంటివి తీసుకోవచ్చు.

హెర్బల్ టీ తాగడం అలవాటు చేసుకోండి – లావెండర్, పుదీనా, తులసి, చామంతి టీలు నిద్రనివ్వడమే కాకుండా కొవ్వు కరిగించడంలో సహాయపడతాయి.

ఇన్‌సొల్యూబుల్ ఫైబర్ తినండి – గోధుమలు, బ్రౌన్ రైస్ వంటి ఆహారాలు నిద్ర నాణ్యతను మెరుగుపరచడంలో సహాయపడతాయి. ఇవి మ‌ధ్యాహ్న‌ భోజనంలో తీసుకుంటే మంచి ఫలితాలు ఉంటాయి.