Epaper 
Sleep Benefits: ఈ రోజుల్లో ఏదొక కారణంతో మనం బిజీ బిజీగా మారిపోతున్నాము. ఈ ఉరుకుల పరుగుల జీవనంలో తక్కువ నిద్రపోవడం ఒక గొప్ప విషయంలా చెప్పుకుంటారు. ” నేను కేవలం మూడు గంటలు మాత్రమే పడుకున్నా” అని గర్వంగా చెప్పుకునే వారిని మన స్నేహితులలో చూస్తూనే ఉంటాము. కానీ, ఇది మన ఆరోగ్యాన్ని ఎంతగా దెబ్బతీస్తుందో ఒక్కసారైన ఆలోచించారా? నిజానికి, తగినంత నిద్ర మన శరీరానికి, మనసుకు మనం ఇచ్చే అత్యంత విలువైన బహుమతి. “ఎక్కువసేపు నిద్రపోతే సోమరితనం” అని కొందరు పెద్దలు తిట్టినా, అది సోమరితనం కానే కాదు. మనల్ని మనం బాగుచేసుకునే మంచి పని.
మెదడుకు రీఛార్జ్
మెదడు ఒక అద్భుతమైన సూపర్ కంప్యూటర్ లాంటిది. రోజంతా అలసిపోయి, ఒత్తిడికి గురైన ఈ కంప్యూటర్కు సరైన విశ్రాంతి అవసరం. మీరు సరిపడా నిద్రపోతే, మీ మెదడు రీఛార్జ్ అవుతుంది. హార్వర్డ్ మెడికల్ స్కూల్ అధ్యయనాల చెప్పిన దాని ప్రకారం, నిద్ర మెదడులోని సమాచార ప్రాసెసింగ్ వ్యవస్థను పునరుద్ధరిస్తుంది. దీనివల్ల జ్ఞాపకశక్తి మెరుగుపడి, ఏకాగ్రత కూడా పెరుగుతుంది, అనవసర ఒత్తిడి, ఆందోళనలు తొలగిపోతాయి.
శరీరానికి రిపేర్ గ్యారేజ్
నిద్రలో మన శరీరం ఖాళీగా ఉండదు. అది ఒక రిపేర్ గ్యారేజ్లా పనిచేస్తుంది. రోజంతా కష్టపడిన కండరాలు, దెబ్బతిన్న కణాలు రాత్రిపూట నిద్రలోనే బాగుచేస్తాయి. ఈ సమయంలో విడుదలయ్యే హ్యూమన్ గ్రోత్ హార్మోన్ (HGH) కీలక పాత్ర పోషిస్తుంది. ఇది కండరాలను బలోపేతం చేస్తుంది, అలసటను తగ్గించి, శరీరానికి కొత్త శక్తిని అందిస్తుంది. అందుకే మంచి నిద్ర తర్వాత మనం మంచిగా ఫీలవుతాం.
రోగనిరోధక శక్తి
జర్నల్ ఆఫ్ స్లీప్ రీసెర్చ్ పరిశోధనల ప్రకారం, నిద్రలో మన రోగనిరోధక వ్యవస్థ అత్యంత చురుకుగా పనిచేస్తుంది. వైరస్లు, బ్యాక్టీరియాలతో పోరాడే తెల్ల రక్తకణాలను శరీరం ఎక్కువగా ఉత్పత్తి చేస్తుంది. సరైన నిద్ర మన శరీరానికి ఒక అభేద్యమైన కవచంలా పనిచేస్తుంది, రోగాల నుంచి కాపాడుతుంది.
