Vijay Deverakonda: ఇది విజయ్ దేవరకొండ ‘కింగ్‌డమ్’ కాదు.. ఎవరిదంటే?

Vijay Deverakonda: విజయ్ దేవరకొండ హీరోగా ‘జెర్సీ’ ఫేమ్ గౌతమ్ తిన్ననూరి దర్శకత్వంలో రూపుదిద్దుకున్న చిత్రం ‘కింగ్‌డమ్’ (Kingdom). భాగ్యశ్రీ బోర్సే, సత్యదేవ్, వెంకటేష్ (కేరళ నటుడు) ముఖ్య పాత్రలలో నటిస్తున్న ఈ సినిమాను శ్రీకర స్టూడియోస్ సమర్పణలో సితార ఎంటర్‌టైన్‌మెంట్స్, ఫార్చూన్ ఫోర్ సినిమాస్ పతాకాలపై సూర్యదేవర నాగ వంశీ, సాయి సౌజన్య ప్రతిష్టాత్మకంగా నిర్మిస్తున్నారు. రాక్ స్టార్ అనిరుధ్ రవిచందర్ సంగీతం అందిస్తున్న ఈ సినిమా జూలై 31న ప్రపంచవ్యాప్తంగా ప్రేక్షకుల ముందుకు వచ్చేందుకు సిద్ధమైంది. చిత్ర ప్రమోషన్స్‌లో భాగంగా ‘కింగ్‌డమ్’ ప్రీ రిలీజ్ వేడుక‌ను సోమవారం హైదరాబాద్‌లో గ్రాండ్‌గా నిర్వహించారు.

ఈ కార్యక్రమంలో చిత్ర హీరో విజయ్ దేవరకొండ మాట్లాడుతూ.. మరో 2 రోజుల్లో జూలై 31న ప్రేక్షకులందరినీ థియేటర్లలో కలవబోతున్నాం. మనసులో కొంచెం భయంగా ఉంది.. అదే సమయంలో ఓ మంచి సినిమా చేశామనే సంతృప్తి కూడా ఉంది. ‘కింగ్‌డమ్’ అవుట్‌పుట్ పట్ల టీమ్ అందరం సంతోషంగా ఉన్నాం. ఈరోజు నా అభిమానుల గురించి ప్రత్యేకంగా మాట్లాడాలని అనుకుంటున్నా. మీరు (అభిమానులు) నాకు దేవుడిచ్చిన వరం. సినిమాలు హిట్ అయినా, ఫ్లాప్ అయినా.. నాపై అదే ప్రేమ, అదే నమ్మకం చూపిస్తూ వస్తున్నారు. ఇంతకు ముందు జరిగిన ఫ్యాన్ మీట్‌లో దాదాపు రెండు వేల మందిని కలిశాను. అందులో ఎక్కువమంది నాతో చెప్పిన మాట ‘అన్నా.. ఈసారి మనం హిట్ కొడుతున్నాం’ అనే. నన్ను మీ వాడిని చేసేసుకున్నారు. నా సక్సెస్‌ని చూడాలని మీరు కోరుకుంటున్నారు. సినిమా వల్లే మీ అందరికీ నేను పరిచయమయ్యాను. మీ కోసం ప్రతి సినిమాకి ప్రాణం పెట్టి పనిచేస్తాను. మీరందరూ నా నుంచి కోరుకుంటున్న హిట్ ఈ సినిమాతో రాబోతుంది. ఇది విజయ్ దేవరకొండ ‘కింగ్‌డమ్’ కాదు, గౌతమ్ తిన్ననూరి ‘కింగ్‌డమ్’.

Also Read- Yamudu: చిన్న ప్రయత్నమే కానీ.. పెద్ద సక్సెస్ కొడుతుంది

ఈ కథకు ఆలోచన పుట్టినప్పటి నుంచి ఇప్పటివరకు ఈ సినిమా పనే చేస్తున్నాడు గౌతమ్. ప్రేక్షకులకు ఒక పర్ఫెక్ట్ సినిమా ఇవ్వాలనే ఉద్దేశంతోనే ఇప్పటికీ వర్క్ చేస్తున్నాడు. అందుకే ఈ ప్రీ రిలీజ్ వేడుకకు కూడా రాలేకపోయాడు. ఆ తర్వాత ఇది సంగీత దర్శకుడు అనిరుధ్ రవిచందర్ ‘కింగ్‌డమ్’. పాటలు ఇప్పటికే విన్నారు. బ్యాక్‌గ్రౌండ్ మ్యూజిక్ కూడా అదిరిపోతుంది. నా సినిమాకి అనిరుధ్ సంగీతం అందిస్తే బాగుంటుందని ఒకప్పుడు అనుకునేవాడిని. అది ఈ సినిమాతో నెరవేరింది. తన సంగీతంతో ఈ సినిమాని మరో స్థాయికి తీసుకెళ్ళాడు. ఆ తర్వాత ఎడిటర్ నవీన్ నూలి ‘కింగ్‌డమ్’ ఇది. నాలో ఒక ఫైర్ ఉంటుంది. మా వాళ్లకి బెస్ట్ ఇవ్వాలని కోరిక ఉంటుంది. ఈసారి నాకు మంచి ఫైర్ ఉన్న టీమ్ దొరికింది. అలాగే ఇది నిర్మాత నాగవంశీ ‘కింగ్‌డమ్’. ఎంతో రిస్క్ చేసి ఈ సినిమాను ఇక్కడి వరకు తీసుకొచ్చారు. ది బెస్ట్ అవుట్ పుట్ రావడం కోసం.. ఎక్కడా రాజీ పడకుండా మేము ఏది అడిగితే అది ఇచ్చారు.

Also Read- R.Narayana Murthy: దేశంలో విద్య వ్యాపారంగా మారింది: ఆర్.నారాయణ మూర్తి

నటీనటుల విషయానికి వస్తే.. భాగ్యశ్రీ బోర్సే కొత్తమ్మాయే కానీ, ఈ సినిమా కోసం చాలా కష్టపడింది. రాబోయే రోజుల్లో ఆమె పెద్ద స్థాయికి వెళ్తుంది. మై బ్రదర్స్ సత్యదేవ్, వెంకటేష్ ఇద్దరూ చాలా మంచి నటులు. ఇందులో అన్న పాత్ర చాలా ముఖ్యమైనది. ఆ పాత్రలో సరైన నటుడు చేస్తేనే సినిమా బాగా పండుతుంది. అలాంటి పాత్ర ఎవరు చేస్తే బాగుంటుందని చాలా చర్చించాం. ఆ తర్వాత ఆ పాత్రకి సత్యదేవ్‌ని ఎంపిక చేశాడు గౌతమ్. షూటింగ్ సమయంలో సత్యదేవ్ నిజంగానే నాకు బ్రదర్‌లా అనిపించాడు. సత్యదేవ్ అద్భుతమైన యాక్టర్ మాత్రమే కాదు, మంచి మనిషి కూడా. అలాగే వెంకటేష్ కూడా అద్భుతంగా నటించాడు. తను భవిష్యత్‌లో బిగ్ స్టార్ కావాలని మనస్ఫూర్తిగా కోరుకుంటున్నాను. ఇలా ప్రతి ఒక్కరూ ఈ సినిమా కోసం ప్రాణం పెట్టేశారు. రెండు రోజుల్లో ఈ సినిమా మీ ముందుకు రాబోతుంది. ఈ సినిమా అందరికీ నచ్చుతుందని ఆశిస్తున్నాను’’ అని చెప్పుకొచ్చారు.

స్వేచ్ఛ ఈ – పేపర్ కోసం https://epaper.swetchadaily.com/ ఈ లింక్ క్లిక్ చేయగలరు