Rangeela Re Release: బాలీవుడ్‌లో సరికొత్త ట్రెండ్‌ను సృష్టించిన క్లాసిక్ చిత్రం ‘రంగీలా’ (Rangeela) మరోసారి సినీ అభిమానులను అలరించడానికి సిద్ధమవుతోంది. నవంబర్ 28వ తేదీ నుండి ఈ రొమాంటిక్ కామెడీ చిత్రాన్ని థియేటర్లలో తిరిగి విడుదల చేస్తున్నట్లు అగ్ర నటుడు ఆమిర్ ఖాన్ స్వయంగా ప్రకటించారు. ఇంతకు ముందు సంచలన దర్శకుడు రామ్ గోపాల్ వర్మ (Ram Gopal Varma) కూడా ఈ విషయాన్ని తెలిపారు. రామ్ గోపాల్ వర్మను తిరుగులేని డైరెక్టర్‌ని చేసిన ‘శివ’ (Shiva) చిత్రం రీసెంట్‌గా రీ రిలీజై మంచి స్పందనను రాబట్టుకున్న విషయం తెలిసిందే. బాలీవుడ్‌లో వర్మకు ‘శివ’లాంటి చిత్రమైన ‘రంగీలా’ రీ రిలీజ్ కాబోతోంది. దీంతో ప్రేక్షకులు ఎంతగానో ఎదురు చూస్తున్నారు. ఈ సినిమా రీ రిలీజ్ అవుతున్న సందర్భంగా ఇందులో ‘మున్నా’గా నటించిన ఆమిర్ ఖాన్ (Aamir Khan) ఓ వీడియోను విడుదల చేసి తన సంతోషాన్ని తెలియజేశారు. ఈ వీడియోను వర్మ తన ఎక్స్ వేదికగా షేర్ చేశారు.

మున్నా పాత్రపై ఆమిర్ ఆనందం

ఈ వీడియోలో ఆమిర్ ఖాన్ మాట్లాడుతూ, ‘రంగీలా’ తనకెంతో ఇష్టమైన చిత్రాలలో ఒకటని పేర్కొన్నారు. ‘‘నవంబర్ 28న మా సినిమా ‘రంగీలా’ థియేటర్లలో మరోసారి రీ-రిలీజ్ అవుతోంది. ఇది నాకెంతో ఇష్టమైన సినిమా. ఈ చిత్రంలో నేను పోషించిన ‘మున్నా’ పాత్ర నాకు ఎంతో ఇష్టమైన పాత్రలలో ఒకటి. ఆ పాత్రను పోషించడం చాలా సరదాగా అనిపించింది. నా కెరీర్‌లో గుర్తుండిపోయే పాత్రలలో ఈ సినిమాలో చేసిన మున్నా పాత్ర ఒకటి’ అని ఆయన అభిప్రాయపడ్డారు.

Also Read- Jani Master: జానీ మాస్టర్‌కు క్రియేటివ్ కొరియోగ్రాఫర్ అవార్డ్.. హేటర్స్ పరిస్థితేంటో?

అద్భుతమైన సంగీతం, అద్భుతమైన తారాగణం

ఈ చిత్రానికి సంగీత దిగ్గజం ఏ.ఆర్. రెహమాన్ (AR Rahman) అందించిన పాటలపై ఆమిర్ మాట్లాడుతూ.. ఈ చిత్రంలో ఏ.ఆర్. రెహమాన్ అందించిన పాటలు అత్యద్భుతంగా, అద్భుతంగా ఉంటాయని అన్నారు. ఇంకా ఇందులో నటించిన నటీనటుల గురించి మాట్లాడుతూ, హీరోయిన్ ఊర్మిళా మటోండ్కర్ (Urmila Matondkar) నటన చాలా గొప్పగా ఉంటుందని కొనియాడారు. అలాగే, మరో ముఖ్యపాత్ర పోషించిన జాకీ ష్రాఫ్ (జగ్గూ) (Jackie Shroff) కూడా అద్భుతమైన పనితీరు కనబరిచారని ఆమిర్ పేర్కొన్నారు. ఈ సినిమాకు రామ్ గోపాల్ వర్మ దర్శకత్వం వహించిన తీరును సైతం ఆమిర్ ఖాన్ మెచ్చుకున్నారు. రాము చాలా అద్భుతమైన చిత్రాన్ని రూపొందించారని ఆయన గుర్తు చేసుకున్నారు.

Also Read- Bigg Boss Telugu 9: హౌస్‌మేట్స్‌పై దేత్తడి హారిక‌ పంచులే పంచులు.. డ్యాన్స్ చేయించిన మానస్.. సందడే సందడి!

దివంగత నటుడు రాజేష్ జోషికి నివాళి

ఈ సందర్భంగా ఆమిర్ ఖాన్ తన సహనటుడు, దివంగత రాజేష్ జోషిని (పక్యా పాత్రధారి) గుర్తు చేసుకున్నారు. ‘‘రాజేష్ జోషి ఇందులో చాలా గొప్పగా నటించారు. ఆయన అద్భుతమైన నటుడు’ అని ఆమిర్ కీర్తించారు. ‘రంగీలా’ చిత్ర రాజేష్‌కు మొదటి చిత్రమని, ఆ తర్వాత ఆయన ‘సర్ఫరోష్’ చిత్రంలో కూడా నటించారని అన్నారు. ఒక మోటార్‌సైకిల్ ప్రమాదంలో చిన్న ఏజ్‌లోనే మరణించారని, దీంతో ఇండస్ట్రీ ఒక గొప్ప ప్రతిభావంతుడైన నటుడిని కోల్పోయిందని ఆమిర్ ఖాన్ ఆవేదన వ్యక్తం చేశారు. ఈ చిత్రంతో తనకు ఎన్నో మంచి జ్ఞాపకాలు ఉన్నాయని, అందులో రాజేష్ జోషి ఒకరని తెలిపారు. ఈ సినిమాను మరోసారి థియేటర్లలో చూసి ఆనందించాల్సిందిగా ఆమిర్ ఖాన్ ప్రేక్షకులను కోరారు.

స్వేచ్ఛ ఈ – పేపర్ కోసం https://epaper.swetchadaily.com/ ఈ లింక్ క్లిక్ చేయగలరు