Epaper 
iBOMMA: ఐబొమ్మ గురించి ప్రత్యేకించి చెప్పాల్సిన అవసరం లేదు. పోలీసులకే సవాల్ విసిరిన ఈ ఆన్లైన్ బొమ్మకు బిగ్ షాక్ తగిలింది. ఐబొమ్మ(iBOMMA) వెబ్ సైట్ ఓనర్ ఇమ్మడి రవిని తెలంగాణ సీసీఎస్ పోలీసులు అరెస్ట్ (arrest) చేశారు. ఫ్రాన్స్ నుంచి హైదరాబాద్‌కు చేరుకున్న ఇమ్మడి రవిని కూకట్‌పల్లి పోలీసులు అదుపులోకి తీసుకున్నారు. కరేబియన్ దీవుల్లో నివసిస్తూ ‘ఐబొమ్మ’ వెబ్‌సైట్‌ను నడిపిస్తున్న రవి. తెలుగు సినిమాలు, ఓటీటీ కంటెంట్‌ను పైరసీ చేసి తన సైట్‌లో అందుబాటులో ఉంచుతున్నాడు. చిత్రం రిలీజ్ అయిన కొన్ని నిముషాల్లోనే HD ప్రింట్‌ను ఐబొమ్మలో అప్‌లోడ్ చేయడంతో తీవ్ర నష్టాలు ఎదుర్కొంటున్నామంటూ తెలుగు నిర్మాతలు పోలీసులకు ఫిర్యాదు చేశారు. ఈ ఫిర్యాదు ఆధారంగా గతంలోనే కేసు నమోదైంది. ” దమ్ముంటే పట్టుకోండి ” అంటూ రవి పోలీసులకు సవాలు విసిరిన విషయం తెలిసిందే. ఆ సవాలుకు ఇప్పుడు పోలీసులు సమాధానమిచ్చారు రవిని హైదరాబాద్‌లో అరెస్ట్ చేశారు.
నన్ను అరెస్టు చేస్తే సినీ ఇండస్ట్రీతోపాటు పోలీసుల జీవితాలను కూడా బయటపెడతానంటూ రవి బెదిరింపులకు పాల్పడ్డాడు. తన వెబ్‌సైట్‌పై కన్నేస్తే అందరి గురించి చెప్పేస్తా అంటూ హెచ్చరికలు జారీ చేశాడు. ఈ బెదిరింపుల నేపథ్యంలో గత ఆరు నెలలుగా పోలీసులు రవి వేటలో ఉన్నారు. శుక్రవారం ఫ్రాన్స్ నుంచి హైదరాబాద్‌కు చేరుకున్నట్టు గుర్తించిన పోలీసులు అతన్ని అదుపులోకి తీసుకుని విచారణ జరుపుతున్నారు. అనంతరం రవి బ్యాంకు ఖాతాలో ఉన్న రూ.3 కోట్లను ఫ్రీజ్ చేశారు. సర్వర్లు ఓపెన్ చేసి వెబ్‌సైట్ కంటెంట్‌ను పరిశీలిస్తున్నారు. ఐబొమ్మ పైరసీ కారణంగా సినీ పరిశ్రమకు సుమారు రూ.3,000 కోట్ల నష్టం వాటిల్లినట్టు పోలీసులు గతంలో వెల్లడించారు.
