NBK: గాడ్ ఆఫ్ మాసెస్ నందమూరి బాలకృష్ణ (Nandamuri Balakrishna), బ్లాక్ బస్టర్ దర్శకుడు బోయపాటి శ్రీను (Boyapati Srinu) కాంబినేషన్‌లో రూపుదిద్దుకున్న ‘అఖండ 2: తాండవం’ (Akhanda 2: Thaandavam) చిత్రం విడుదలకు సిద్ధమైంది. పాన్ ఇండియా వైడ్‌గా విడుదల కాబోతున్న ఈ సినిమా ప్రమోషన్స్‌ను మేకర్స్ భారీగా నిర్వహిస్తున్నారు. రామ్ ఆచంట, గోపీచంద్ 14 రీల్స్ ప్లస్ (14 Reels Plus) బ్యానర్‌పై ఎంతో ప్రతిష్టాత్మకంగా నిర్మిస్తున్న ఈ చిత్రానికి ఎం తేజస్విని నందమూరి సమర్పకురాలిగా వ్యవహరిస్తున్నారు. మ్యూజిక్ సెన్సేషన్ ఎస్ థమన్ సంగీతం అందిస్తున్నారు. డిసెంబర్ 5న విడుదలకు సిద్ధమైన ఈ చిత్ర ప్రీ రిలీజ్ వేడుకను శనివారం హైదరాబాద్‌లో గ్రాండ్‌గా నిర్వహించారు.

Also Read- Balakrishna: ‘నన్నే అంటి పెట్టుకున్నారు’.. బాలయ్య భార్య మాటలు హరికృష్ణను ఉద్దేశించా.. లేక?

నేనే ఆ చరిత్రని..

ఈ వేడుకలో నందమూరి బాలకృష్ణ మాట్లాడుతూ.. ‘‘ఇన్ని కోట్ల మంది అభిమానుల ప్రేమను పొందడం పూర్వజన్మ సుకృతం. ఇది జన్మజన్మల అనుబంధం. మనిషి నిత్యవసర వస్తువులలో సినిమాని కూడా ఎంచుకున్నాడు. అలాంటి సినిమా ఎలా ఉండాలనేది చలనచిత్ర పరిశ్రమ పెద్దలు ఆలోచించాలి. నాకు ఇంత ధన్యమైన జన్మనిచ్చి అభిమానుల అందరి గుండెల్లో ఆయన ప్రతిరూపంగా నిలిపిన నాన్న నందమూరి తారక రామారావును తలుచుకుంటూ వారి పాదాలకు నమస్కరిస్తున్నాను. మొన్ననే గోపీచంద్ మలినేని దర్శకత్వంలో ఒక సినిమాని ప్రారంభించాం. ఓపెనింగ్‌లో ఓ డైలాగ్ చెప్పాను. ‘చరిత్రలో చాలామంది ఉంటారు. చరిత్రని మరలా మరలా తిరిగి రాసి సృష్టించేవాడు ఒకడే ఉంటాడు. నేనే ఈ చరిత్ర.. నాదే ఆ చరిత్ర’. నిజంగా నేనే ఆ చరిత్రని.

మంచి మంచి టెక్నీషియన్స్‌తో పని చేయడం నా అదృష్టం. నేను కూడా కొన్ని పొరపాట్లు చేశాను. సినిమా అంటే ఒక ఆత్మ. ఇప్పుడా ఆత్మని పట్టుకుని వరుస సక్సెస్‌లు అందుకుంటున్నాను. నేనెప్పుడూ అభిమానులకు మంచి సినిమా ఇవ్వాలి.. మంచి సందేశం ఉండాలని పయత్నిస్తుంటాను. కరోనాతో భారతదేశమంతా భయపడుతున్న తరుణంలో ‘అఖండ’ చిత్రాన్ని విడుదల చేసి ఘన విజయాన్ని అందుకున్నాం. మంచి సినిమాకి విజయాన్ని చేకూర్చి ప్రోత్సహించిన తెలుగు ప్రేక్షకులందరికీ ధన్యవాదాలు. మహా శివుడు శక్తి, ఆదిశక్తి సాక్షిగా గంగమ్మ తల్లి ఆశీర్వాదంతో చెబుతున్నాను. ఈ రుద్ర తాండవ విన్యాసం నాలో ఆవేశమై, ఆ త్రినేత్రుడి వీక్షణ దృష్టి నాలో నిక్షిప్తమై, ఆయన త్రిశూలం నా ఆయుధానికి శక్తి శూలమై.. ఎలా ఉండబోతుందో.. డిసెంబర్ 5న నా పాత్రను అందరూ తెరపై చూస్తారు. బోయపాటి నేను ఏదైనా సినిమా చేయాలనుకుంటే మూడే నిమిషాలు మాట్లాడుకుంటాం. అంతే.. ఆ మహా యజ్ఞంలోకి దిగిపోతాం.

Also Read- Akhanda 2 Thaandavam: శివుడు కాదు.. ఈసారి హనుమంతుడు! ‘అఖండ 2: తాండవం’ మాసివ్ టీజర్

పరిశ్రమ దాన్ని పాటించాలని కోరుకుంటున్నా..

మొన్న ఉత్తరప్రదేశ్‌కి వెళ్ళాము. సీఎం యోగి ఆదిత్యనాథ్ ట్రైలర్ చూశారు. దీంతోపాటు ఇంకొంత కంటెంట్ కూడా చూశారు. 10 నిమిషాల పాటు అలానే చూసి.. చాలా అభినందించారు. సనాతన ధర్మం గురించి చాలా బాగా చెప్పారు, సనాతనం ధర్మం శక్తి గౌరవం పరాక్రమాన్ని ఈ సినిమాలో ఎంతో అద్భుతంగా చూపించారని ఆయన అభినందించారు. ఆనాడు చత్రపతి శివాజీ సైన్యంలో కూడా అఘోరాలు ఉండేవారు. గొప్ప పోరాటం చేసేవారు. నా సినిమా ఉగాది పచ్చడి లాంటిది. అన్ని రసాలు ఉంటాయి. ఈ సినిమాలో సంయుక్త‌తో చేసిన పాట కూడా చాలా మంచి సందర్భంలో వస్తుంది. అది ఐటం సాంగ్ కాదు. ఆది పినిశెట్టి చాలా చక్కని పాత్ర చేశారు. నేను వాళ్ళ నాన్న గారితో కూడా సినిమాలు చేశాను.

సంగీతం రోగాలను నయం చేస్తుంది. సంగీతం బాగుంటే ఆ సినిమా సక్సెస్ అయినట్టే. తమన్ అంత అద్భుతమైన మ్యూజిక్ ఇచ్చారు. ఇదంతా ఒక సమిష్టి కృషి. తమన్‌తో చేసిన నాలుగు సినిమాలు వరుసగా హిట్లు. ఇప్పుడు ‘అఖండ 2’ కూడా అద్భుతమైన విజయం సాధించబోతోంది. ఆకృత్యాలు మీరితే మనిషే ఆ దైవాన్ని తనలో ఆవహించుకుంటాడు అనేదే ఈ సినిమా. అదే ఈ సినిమా కథాంశం. సినిమా అద్భుతంగా వచ్చింది. మా నాన్న నాకు ఓ క్రమశిక్షణ నేర్పారు. సినిమా అనుకున్న సమయంలో పూర్తి చేయాలి.. నేను అదే చేస్తున్నాను. పరిశ్రమ కూడా దాన్ని పాటించాలని కోరుకుంటున్నాను. ఈ వేడుకకు వచ్చిన అభిమానులందరూ కూడా జాగ్రత్తగా ఇంటికి వెళ్లాలని కోరుకుంటున్నాను’’ అని చెప్పుకొచ్చారు.

స్వేచ్ఛ ఈ – పేపర్ కోసం https://epaper.swetchadaily.com/ ఈ లింక్ క్లిక్ చేయగలరు