Epaper 
Telugu Movie: తెలుగు చలనచిత్ర పరిశ్రమలోకి మరో మహిళా నిర్మాత అరంగేట్రం చేశారు. జి. శైలజా రెడ్డి గారు సినీ నిర్మాణ రంగంలోకి అడుగుపెడుతూ, జి.ఎస్.ఆర్. మూవీ మేకర్స్ పతాకంపై తమ తొలి ప్రాజెక్టును ప్రకటించారు. సీనియర్ దర్శకులు శివాల ప్రభాకర్ దర్శకత్వంలో, అత్యంత ప్రతిష్టాత్మకంగా తెరకెక్కుతున్న ఈ చిత్రం పేరు “అమ్మా… నాకు ఆ అబ్బాయి కావాలి”. ఈ చిత్రాన్ని శ్రీలక్ష్మి శైలజ సమర్పిస్తున్నారు. ఈ సినిమా ద్వారా యువ ప్రతిభావంతుడు పవన్ మహావీర్ హీరోగా పరిచయం అవుతుండటం విశేషం. అతనికి జోడీగా సుహాన మరియు మేఘశ్రీ హీరోయిన్లుగా నటిస్తున్నారు. ఈ యువ తారాగణంతో పాటు, సీనియర్ నటులు సుమన్, రావు రమేష్ వంటి అగ్ర కళాకారులు కీలక పాత్రలు పోషిస్తుండటం సినిమాపై అంచనాలను పెంచుతోంది.
ఈ చిత్రం ప్రారంభోత్సవ వేడుకలు హైదరాబాద్లోని సారధి స్టూడియోలో సినీ పరిశ్రమ పెద్దల సమక్షంలో అత్యంత ఘనంగా జరిగాయి. హీరో-హీరోయిన్లపై చిత్రీకరించిన తొలి ముహూర్తపు సన్నివేశానికి, ప్రముఖ రచనా దిగ్గజం వి.విజయేంద్ర ప్రసాద్ గారు క్లాప్ కొట్టారు. చిత్ర బృందానికి ఆశీస్సులు అందిస్తూ, నిర్మాతల మండలి అధ్యక్షులు కె.ఎల్. దామోదర్ ప్రసాద్ మరియు దర్శకుల సంఘం అధ్యక్షులు వీర శంకర్ గౌరవ దర్శకత్వం వహించారు. సీనియర్ ఐ.పి.ఎస్. అధికారి ఘట్టమనేని శ్రీనివాస్ కెమెరా స్విచాన్ చేసి చిత్రానికి శుభారంభం చేశారు. ఈ వేడుకలో ప్రముఖ దర్శకులు రేలంగి నరసింహారావు, నిర్మాతలు తుమ్మలపల్లి రామ సత్యనారాయణ, శోభారాణి, ప్రముఖ రచయిత జె.కె. భారవి తదితరులు పాల్గొని, కొత్త నిర్మాత జి. శైలజా రెడ్డి కి మరియు చిత్ర బృందానికి శుభాకాంక్షలు తెలిపారు.
Read also-Soggadu Re-release: శోభన్ బాబు ‘సోగ్గాడు’ మళ్లీ వస్తున్నాడు థియేటర్లలోకి.. ఎప్పుడంటే?
ఈ చిత్రానికి కథ, మాటలు, స్క్రీన్ ప్లే, దర్శకత్వ బాధ్యతలను శివాల ప్రభాకర్ గారే స్వయంగా చూసుకుంటున్నారు. ఎల్.ఎన్.ఆర్. – జి. సాయి పద్మారెడ్డి ఎగ్జిక్యూటివ్ ప్రొడ్యూసర్స్ గా వ్యవహరిస్తుండగా, ప్రొడక్షన్ మేనేజర్గా బాలరాజు, కో-డైరెక్టర్గా రావు శ్రీ పనిచేస్తున్నారు. చిత్ర ప్రచార బాధ్యతలను ధీరజ్ – అప్పాజీ (పి.ఆర్.ఓ) నిర్వహిస్తున్నారు. యువ ప్రతిభ, అనుభవజ్ఞులైన నటులు, సాంకేతిక నిపుణుల కలయికతో రూపొందుతున్న ఈ చిత్రం తెలుగు ప్రేక్షకులను తప్పక ఆకట్టుకుంటుందని చిత్ర బృందం ధీమా వ్యక్తం చేసింది. ఈ చిత్రం త్వరలోనే సెట్స్ పైకి వెళ్లనుంది.
