Akhanda Ticket: బాలయ్య ‘అఖండ 2’ మొదటి టికెట్ ఎంతంటే?..

Akhanda Ticket: నందమూరి బాలకృష్ణ నటించిన ‘అఖండ 2 ‘ చిత్రం విడుదలకి ముందే అంచనాలను భారీగా పెంచేస్తోంది. ఈ సినిమాకు తెలుగు రాష్ట్రాల్లోనే కాకుండా ఓవర్సీస్‌లో కూడా విపరీతమైన బిజినెస్ క్రేజ్ నెలకొంది. ముఖ్యంగా జర్మనీలో ఈ చిత్రం సాధించిన బిజినెస్ కొత్త రికార్డులను సృష్టించింది. పలువురు పంపిణీదారులు పోటీ పడినా, ‘తారక రామా ఎంటర్టైన్మెంట్స్’ సంస్థ అత్యంత ఎక్కువ ధరకు బిడ్ వేసి, జర్మనీ హక్కులను దక్కించుకుంది. ఇప్పటి దాకా ఏ సీనియర్ హీరో చిత్రానికి లేని అతి పెద్ద ఆఫర్‌ను బాలయ్యకు అందించడం ద్వారా ఇది ఓ అరుదైన ఘట్టంగా నిలిచింది. ఈ సందర్భంగా ‘తారక రామా ఎంటర్టైన్మెంట్స్’ తరఫున శ్రీకాంత్ కుడితిపూడి మాట్లాడుతూ, తమ సంస్థకు ఈ సినిమా జర్మనీ రైట్స్ దక్కడానికి సహకరించిన 14 రీల్స్, పరుచూరి కిరీటి, రిలయన్స్ శ్రీధర్, UK డ్రీమ్స్ ఎంటర్టైన్మెంట్ రామ్, శ్రీను గోగినేనిలకు ప్రత్యేక ధన్యవాదాలు తెలిపారు.

లక్ష రూపాయల టికెట్

సినిమా ప్రమోషన్స్‌లో భాగంగా ఓవర్సీస్‌లో కూడా భారీ ఏర్పాట్లు చేస్తున్నారు. ప్రతి పెద్ద సెంటర్‌లో నందమూరి అభిమానులను కలుపుకొని ప్రమోషన్లు భారీగా చేస్తున్నామని ‘తారక రామా ఎంటర్టైన్మెంట్స్’ ప్రతినిధి సుమంత్ కొరపాటి తెలిపారు. ఈ ప్రమోషన్లలో భాగంగా, విడుదల కాబోయే సినిమా మొదటి టికెట్‌ను ‘ఫ్యాన్ టికెట్‌గా’ వేలం వేయడం జరిగింది. ఈ టికెట్‌ను దక్కించుకోవడానికి అభిమానులు గట్టి పోటీ పడ్డారు. అంతిమంగా, జర్మనీలోని ఫ్రాంక్‌ఫర్ట్ ప్రాంతానికి చెందిన అభిమాని రాజశేఖర్ పార్ణపల్లి ఏకంగా లక్ష రూపాయలు (1000 యూరోలు) చెల్లించి ఈ తొలి టికెట్‌ను దక్కించుకున్నారు. ఇది బాలయ్యపై అభిమానులకు ఉన్న ప్రేమకు నిదర్శనం. ఫ్యాన్ టికెట్ విన్నర్ రాజశేఖర్ ఈ సందర్భంగా మాట్లాడుతూ, తాను అనంతపూర్ నుండి జర్మనీకి వచ్చినా, బాలయ్యపై అభిమానం మరింత పెరిగిందే తప్ప తగ్గలేదని ఆనందం వ్యక్తం చేశారు. ఇండియాలో మాదిరిగానే ఇక్కడ కూడా ప్రమోషన్స్, బ్యానర్లు, ఫ్యాన్ టికెట్స్‌తో ప్రజల్లోకి సినిమాను తీసుకెళ్లే కార్యక్రమాలను ‘తారకరామ ఎంటర్టైన్మెంట్స్’ చేపడుతుండటాన్ని ఆయన అభినందించారు. ‘అఖండ’ తాండవం ఎలా ఉండబోతుందో చూడటానికి తాను ఎంతో ఆసక్తిగా ఎదురుచూస్తున్నానని తెలిపారు.

ఫ్యాన్ టికెట్ సందడి

కేవలం ఫ్రాంక్‌ఫర్ట్‌లో మాత్రమే కాకుండా, ఈ ఫ్యాన్ టికెట్ వేలం సందడి జర్మనీలోని ఇతర నగరాల్లో కూడా కొనసాగనుంది. మ్యూనిక్, స్టుట్గార్ట్, డ్యుసెల్డార్ఫ్, న్యూరెంబర్గ్ వంటి ప్రధాన నగరాల్లో కూడా ఈ ఫ్యాన్ టికెట్స్‌ను అత్యంత భారీ ధరలు చెల్లించి కొన్న అభిమానులను త్వరలోనే వెల్లడించబోతున్నామని సుమంత్ కొరపాటి తెలిపారు. జర్మనీ మార్కెట్‌లో బాలయ్య సినిమాకు ఈ స్థాయిలో డిమాండ్, బిజినెస్ జరగడం, రికార్డు ధరకు ఫ్యాన్ టికెట్ అమ్ముడవ్వడం.. ఈ చిత్రంపై ఉన్న క్రేజ్‌ను స్పష్టం చేస్తోంది. ఓవర్సీస్ పంపిణీదారులు, అభిమానులు ‘అఖండ’ విడుదల కోసం ఉత్కంఠగా ఎదురుచూస్తున్నారు.