Life Sciences Policy: దావోస్ పర్యటనలో.. నెక్స్ట్ జెన్ లైఫ్ సైన్సెస్ పాలసీని ఆవిష్కరించిన సీఎం రేవంత్ రెడ్డి

Life Sciences Policy: దావోస్ వేదికగా తెలంగాణ ప్రభుత్వం ప్రతిష్టాత్మక ‘నెక్స్ట్ జెన్ లైఫ్ సైన్సెస్ పాలసీ 2026 – 30’ ని ఆవిష్కరించింది. ముఖ్యమంత్రి రేవంత్ రెడ్డి, మంత్రులు శ్రీధర్ బాబు, శ్రీనివాస రెడ్డితో కలిసి ఈ పాలసీని ప్రపంచానికి పరిచయం చేశారు. ఫార్మా, వ్యాక్సిన్, బయోటెక్నాలజీ రంగాల్లో ప్రస్తుతం ఉన్న బలమైన స్థానాన్ని మరింత మెరుగుపరుచుకుంటూ, 2030 కల్లా ప్రపంచ స్థాయిలోని టాప్ 3 లైఫ్ సైన్సెస్ కేంద్రాలలో ఒకటిగా తెలంగాణను తీర్చిదిద్దడం ఈ పాలసీ లక్ష్యం.

పాలసీలో వ్యూహాత్మక రంగాలు

రాష్ట్రంలో ప్రస్తుతం 2,000కు పైగా లైఫ్ సైన్సెస్ కంపెనీలు, 250కి పైగా యూఎస్ ఎఫ్‌డీఏ ఆమోదిత తయారీ కేంద్రాలు ఉన్నాయి. ప్రపంచ వ్యాక్సిన్ ఉత్పత్తిలో దాదాపు మూడో వంతు వాటా తెలంగాణదే. ఈ నేపథ్యంలో, ‘నెక్స్ట్ జెన్ లైఫ్ సైన్సెస్ పాలసీ’ కేవలం ఉత్పత్తుల పరిమాణాలను పెంచుకోవడమే కాకుండా, విలువల ప్రమాణాలు పెంపొందేలా, మరిన్ని ఆవిష్కరణలకు కేంద్రంగా తెలంగాణ నిలిచేలా అంశాలను పొందుపర్చారు. ఫార్మాస్యూటికల్స్, వ్యాక్సిన్ల తయారీ, అత్యాధునిక పరిశోధనలు, అధునాతన బయో-మాన్యుఫ్యాక్చరింగ్, బయోలాజిక్స్, బయోసిమిలర్స్, ప్రెసిషన్ మెడిసిన్, పర్సనలైజ్డ్ థెరపీలు, డిజిటల్ హెల్త్, డయాగ్నస్టిక్స్, మెడికల్ ఎలక్ట్రానిక్స్, క్లినికల్ రీసెర్చ్, గ్లోబల్ వాల్యూ, ఇన్నోవేషన్ సెంటర్లు ఇలా తదితర అంశాలను ఈ పాలసీలో వ్యూహాత్మక రంగాలుగా పేర్కొన్నారు.

తెలంగాణ స్కూల్ ఆఫ్ లైఫ్ సైన్సెస్

లైఫ్ సైన్సెస్ రంగంలో రాబోయే నాలుగేండ్లలో 25 బిలియన్ డాలర్ల పెట్టుబడులను ఆకర్షించి, 5 లక్షల కొత్త ఉద్యోగాలను సృష్టించేలా పాలసీ అంశాలను రూపొందించారు. అలాగే, జీనోమ్ వ్యాలీ విస్తరణ, మెడికల్ డివైసెస్ పార్క్, గ్రీన్ ఫార్మా సిటీ స్థాపన, 10 ఫార్మా విలేజ్‌ల అభివృద్ధి, బయో ఇన్నోవేషన్, బయో మాన్యుఫ్యాక్చరింగ్ క్లస్టర్లు, సెంటర్స్ ఆఫ్ ఎక్సలెన్స్‌ల ద్వారా అత్యాధునిక మౌలిక సదుపాయాల కల్పనపై దృష్టి సారిస్తారు. అదే సమయంలో, పర్యావరణహిత, జీరో లిక్విడ్ డిశ్చార్జ్ పారిశ్రామిక పద్ధతుల అమలును పాలసీలో ప్రధానంగా పేర్కొన్నారు. పరిశ్రమ అవసరాలకు అనుగుణమైన నైపుణ్యాల అభివృద్ధి కార్యక్రమాలకు ప్రాధాన్యత ఇస్తూ, టాస్క్, యంగ్ ఇండియా స్కిల్స్ యూనివర్సిటీ వంటి సంస్థల సహకారంతో నూతనంగా ‘తెలంగాణ స్కూల్ ఆఫ్ లైఫ్ సైన్సెస్’ ఏర్పాటు కానున్నది. నిబంధనల సరళీకరణ, టీజీ ఐ పాస్ ద్వారా నిర్ణీత కాల పరిమితిలో అనుమతులు, స్టార్టప్‌లు, ఎంఎస్ఎంఏలు, అంతర్జాతీయ పెట్టుబడిదారులకు ప్రత్యేక మద్దతు అందించడం ద్వారా ‘ఈజ్ ఆఫ్ డూయింగ్ బిజినెస్’ ఇంకా సులభతరమవుతుంది. ‘నెక్స్ట్ జెన్ లైఫ్ సైన్సెస్ పాలసీ’ అమలు బాధ్యతను పరిశ్రమలు, వాణిజ్య శాఖ, ఐటీ, ఎలక్ట్రానిక్స్ కమ్యూనికేషన్స్ శాఖలు పర్యవేక్షిస్తాయి. తెలంగాణ లైఫ్ సైన్సెస్ ఫౌండేషన్ నోడల్ ఏజెన్సీగా వ్యవహరిస్తుంది.

Also Read: Kalvakuntla Kavitha: నువ్వు కొట్టినట్లు చెయ్.. నేను ఏడ్చినట్లు చేస్తా.. కవిత కీలక వ్యాఖ్యలు

ప్రపంచంలోనే తొలి బ్యూటీ టెక్ జీసీసీ

ప్రపంచంలోనే తొలి బ్యూటీ టెక్ గ్లోబల్ కేపబిలిటీ సెంటర్‌ను హైదరాబాద్‌లో ఏర్పాటు చేస్తున్నట్లు లోరియల్ సంస్థ ప్రకటించింది. ఈ అత్యాధునిక కేంద్రాన్ని ఈ ఏడాది నవంబర్‌లో ప్రారంభించనున్నది. దావోస్‌లో వరల్డ్ ఎకనామిక్ ఫోరం 2026లో ముఖ్యమంత్రి రేవంత్ రెడ్డితో లోరియల్ సీఈవో నికోలస్ హియోరోనిమస్ భేటీ అయ్యారు. ఈ సందర్భంగా జరిగిన చర్చల్లో హైదరాబాద్‌లో భారీ పెట్టుబడులతో బ్యూటీ టెక్ జీసీసీ ఏర్పాటు చేసే నిర్ణయాన్ని వెల్లడించారు. ఈ జీసీసీ ఏర్పాటుతో లోరియల్‌కు గ్లోబల్ ఇన్నోవేషన్, టెక్నాలజీ, డేటా, సప్లై చైన్ కార్యకలాపాలకు హైదరాబాద్ కీలక కేంద్రంగా నిలవనున్నది.

సీఎం, మంత్రికి ఆహ్వానం

డిజిటల్ ట్రాన్స్‌ఫర్మేషన్, ఏఐ, అనలిటిక్స్ రంగాల్లో రూపొందించే సాంకేతిక పరిష్కారాలను ప్రపంచవ్యాప్తంగా ఉన్న లోరియల్ యూనిట్లకు అందిస్తామని హియెరోనిమస్ తెలిపారు. దీంతో గ్లోబల్ ఎంటర్‌ప్రైజ్ కార్యకలాపాలకు హైదరాబాద్ ప్రాముఖ్యత మరింత పెరుగుతుంది. నవంబర్‌లో జీసీసీ ప్రారంభోత్సవానికి ముఖ్యమంత్రి రేవంత్ రెడ్డి, మంత్రి దుద్దిళ్ల శ్రీధర్ బాబులను లోరియల్ ఆహ్వానించింది. ఈ సందర్భంగా శ్రీధర్ బాబు మాట్లాడుతూ, లోరియల్ జీసీసీని హైదరాబాద్‌కు తీసుకురావాలనే ఆలోచనపై ముఖ్యమంత్రి ప్రత్యేక ఆసక్తి చూపారని, ప్రభుత్వం పూర్తి సహకారం అందిస్తుందని చెప్పారు. హైదరాబాద్ పెట్టుబడులకు అనువైన ప్రదేశమని తెలిపారు. మెడ్‌ టెక్‌, హెల్త్‌ టెక్‌ మాత్రమే కాకుండా బ్యూటీ టెక్‌ వంటి కొత్త విభాగాల్లోనూ తెలంగాణ ముందుంటుందని అన్నారు. ఇప్పటికే మారియెట్, వ్యాన్ గార్డ్, నెట్ ఫ్లిక్స్, మెక్ డోనాల్డ్స్, హినెకెన్, జాగర్, కోస్ట్కో వంటి గ్లోబల్ కంపెనీలు హైదరాబాద్‌లో జీసీసీలను ఏర్పాటు చేశాయని వివరించారు.

తయారీ రంగంలోనూ పెట్టుబడులు

తెలంగాణ ఏఐ ఇన్నోవేషన్ హబ్ గురించి ప్రతినిధి బృందం ఈ సందర్భంగా వివరించింది. జీసీసీతో పాటు మాన్యుఫాక్చరింగ్ యూనిట్ ఏర్పాటుకు తెలంగాణలో ఉన్న అవకాశాలను పరిశీలించాలని లోరియల్‌ను ఆహ్వానించింది. రాష్ట్రంలో ఉన్న మౌలిక వసతులు, పరిశ్రమల ఎకోసిస్టమ్‌ను దృష్టిలో ఉంచుకుని భవిష్యత్తులో తయారీ రంగంలోనూ పెట్టుబడులు పెట్టేందుకు సిద్ధంగా ఉన్నట్లు హియెరోనిమస్ సానుకూలంగా స్పందించారు.

Also Read: Athreyapuram Brothers: కొత్త కథాంశంతో ప్రారంభమైన ‘ఆత్రేయపురం బ్రదర్స్’.. నేటి తారానికి తగ్గట్టు