Epaper 
TG Vehicle Registration: కొత్త వాహనాల రిజిస్ట్రేషన్ ప్రక్రియ మరింత సులభతరమైంది. ఇకపై బైక్, కారు రిజిస్ట్రేషన్ కోసం ఆర్టీవో కార్యాలయానికి వెళ్లాల్సిన అవసరం లేదు. ప్రజలకు మెరుగైన, సులభమైన సేవలు అందించాలనే ఉద్దేశంతో తెలంగాణ రాష్ట్ర రవాణా శాఖ కీలక నిర్ణయం తీసుకుంది. గురువారం అందుకు సంబంధించి ఉత్తర్వులను ప్రభుత్వ ఆదేశాల మేరకు రవాణా శాఖ కమిషనర్ ఇలాంబర్తి జారీ చేశారు. రాష్ట్రంలోని అన్ని శాఖ కార్యాలయాలకు ఈ ఉత్తర్వులు పంపారు. ఇకపై కొత్తగా కొనుగోలు చేసే నాన్-ట్రాన్స్పోర్ట్ మోటార్ సైకిళ్లు, మోటార్ కార్లకు మొదటి రిజిస్ట్రేషన్ సమయంలో వాహనాన్ని ఆర్టీవో కార్యాలయానికి తీసుకువెళ్లాల్సిన అవసరం ఉండదు.
కేంద్ర మోటారు వాహన నియమాలు
1989 లోని నియమం 48-బి ప్రకారం, అధికారిక ఆటోమొబైల్ డీలర్ ద్వారా అమ్మబడిన పూర్తిగా నిర్మిత వాహనాలకు ఈ సౌకర్యం కల్పించబడింది. ఈ కొత్త విధానం ప్రకారం, వాహనం కొనుగోలు చేసిన అధికారిక డీలరే శాశ్వత రిజిస్ట్రేషన్ కోసం ఆన్లైన్లో దరఖాస్తు చేస్తారు. ఇన్వాయిస్, ఫారం–21, ఫారం–22, బీమా, చిరునామా రుజువు వంటి పత్రాలను డీలర్ ద్వారా ఆన్లైన్లో అప్లోడ్ చేస్తారు. రవాణా శాఖ అధికారి దరఖాస్తును పరిశీలించి రిజిస్ట్రేషన్ నంబర్ కేటాయిస్తారు. రిజిస్ట్రేషన్ సర్టిఫికేట్ (ఆర్సీ) నేరుగా స్పీడ్ పోస్ట్ ద్వారా వాహన యజమానికి పంపబడుతుంది. ఈ విధానం వల్ల ప్రజలకు సమయం ఆదా అవ్వడమే కాకుండా రిజిస్ట్రేషన్ ప్రక్రియ వేగంగా, పారదర్శకంగా పూర్తవుతుంది. అయితే ఈ సౌకర్యం ప్రైవేట్ బైక్లు, కార్లకు మాత్రమే వర్తిస్తుంది, వాణిజ్య వాహనాలకు వర్తించదు.
Also Read: Iran Protests: ఇరాన్లో అల్లకల్లోలం.. వణుకు పుట్టించే దృశ్యాలు.. 45 మందికి పైగా మృతి!
మార్గదర్శకాలు ఇలా..
అధీకృత ఆటోమొబైల్ డీలర్, విక్రయించిన వాహనానికి సంబంధించిన శాశ్వత రిజిస్ట్రేషన్ కోసం శాఖ ఆన్లైన్ పోర్టల్ ద్వారా దరఖాస్తు సమర్పించాలి. ఇందుకోసం ఇన్వాయిస్, ఫారం-21, ఫారం-22, బీమా పత్రం, చిరునామా ధ్రువీకరణ, కొనుగోలుదారుని ఫోటో, సంతకం, ఇంజిన్, చాసిస్ నంబర్ ఫోటోలను అప్లోడ్ చేయాల్సి ఉంటుంది. డీలర్ నుంచి అందిన దరఖాస్తును రిజిస్ట్రింగ్ అథారిటీ పరిశీలించి నంబర్ కేటాయిస్తుంది. రవాణా శాఖకు చెందిన మోటార్ వెహికిల్ ఇన్స్పెక్టర్ నుంచి కమిషనర్ హోదాలోని అధికారులు తమ పరిధిలోని డీలర్ల వద్ద ఉన్న వాహనాల నిల్వపై ఎప్పుడైనా యాదృచ్ఛిక తనిఖీలు నిర్వహించవచ్చు. సాఫ్ట్వేర్ మార్పులు పూర్తయిన తర్వాత, 15 రోజుల్లోపు ఈ కొత్త విధానం అమలులోకి రానుంది.
