Epaper 
SEC Warning: సర్పంచ్ పదవిని దక్కించుకునేందుకు పోటాపోటీ ప్రయత్నాలు జరుగుతున్నాయి. కొన్ని చోట్ల వేలం పాటలు సైతం వేస్తున్నారు. ఏకగ్రీవం అయ్యేందుకు ఆఫర్లు ప్రకటిస్తున్నారు. గ్రామంలో అభివృద్ధి పనులు చేస్తామని, సమస్యల పరిష్కారానికి కృషి చేస్తామని హామీ ఇస్తున్నారు. కొన్ని చోట్ల బాండ్లు కూడా రాసిస్తున్నట్లు సమాచారం. నామినేషన్లు గురువారం ప్రారంభం కాగా తొలిరోజు పలు గ్రామ పంచాయతీలు ఏకగ్రీవం అయ్యాయి. రెండో రోజు సైతం వేలం పాటలు, ఏకగ్రీవాలు జరిగాయి. అయితే, ఏ గ్రామం ఏకగ్రీవం అయింది మాత్రం అధికారులు అధికారికంగా ప్రకటించిన తర్వాతే ఎన్ని అయ్యాయనేది తేలనుంది.
పెద్ద ఎత్తున ఏకగ్రీవాలు..
ఖమ్మం జిల్లా కామేపల్లి మండలం జోగుగూడెం పంచాయతీ సర్పంచ్‌కు బహిరంగ వేలం వేయగా రూ.20 లక్షలకు దక్కించుకున్నారు. గ్రామంలోని అభయాంజనేయ స్వామి దేవాలయం నిర్మాణానికి వేలంలో నగదును ఖర్చు చేయనున్నట్లు గ్రామస్తులు తెలిపారు. అదే విధంగా రంగారెడ్డి జిల్లాలో చింతగూడ గ్రామ పంచాయతీ సర్పంచ్, వార్డ్ మెంబెర్స్ ఏకగ్రీవం అయింది. మహబూబాబాద్ జిల్లా ఇనుగుర్తి మండలంలోని కోమటిపల్లి గ్రామ పాత తండాలో సర్పంచ్‌తో పాటు వార్డు సభ్యులను ఏకగ్రీవంగా ఎన్నుకున్నారు. గద్వాల నియోజకవర్గం గట్టు మండలం గొర్లఖాన్‌దొడ్డి గ్రామ సర్పంచ్ పదవికి వేలం వేయగా రూ.57 లక్షలకు దక్కించుకున్నట్లు సమాచారం.
సీటు కోసం రూ.90 లక్షలు..
గద్వాల నియోజకవర్గం గట్టు మండలం మిట్టదొడ్డి సర్పంచ్ పదవికి రూ.90 లక్షలు, ఆరగిద్ద సర్పంచ్ పదవికి రూ.31 లక్షలు, తారాపురం గ్రామ పంచాయతీ సర్పంచ్‌గా రూ.16.20 లక్షలకు, ముచ్చోనిపల్లి పంచాయతీ రూ.కోటి, దొడ్డి మండలం చింతల కుంట సర్పంచ్ పదవికి రూ.38.50 లక్షలు, ఉమిత్యాల తండా రూ.12 లక్షలు(పుష్పరాజ్), గద్వాల మండలం నల్లదేవునిపల్లి (కుర్వపల్లి) రూ.45 లక్షలు, కొండపల్లి రూ.60 లక్షలు, ఈడిగోని పల్లి గ్రామ సర్పంచ్ పదవికి రూ.9.80 లక్షలు, పుటాన్ పల్లి సర్పంచ్ పదవికి రూ.15 లక్షలు, రెండో విడుతలో జరగాల్సిన మల్దకల్ మండలం సద్దలోనిపల్లి సర్పంచ్ పదవికి రూ.42 లక్షలు వేలం పాటలో దక్కించుకున్నారు. వికారాబాద్‌ జిల్లా యాలాల పరిధిలో కొత్తగా ఏర్పడిన పేర్కంపల్లితండా పంచాయతీ ఏకగ్రీవమైంది. గ్రామాభివృద్ధి కోసం రూ.3 లక్షలు ఇస్తానని ప్రకటించారు. సిద్దిపేట జిల్లా జగదేవ్‌పూర్‌ మండలంలోని బీజీ వెంకటాపూర్‌ సర్పంచ్ పదవి కోసం పోటాపోటీగా వేలం పాటలో ఒకరు రూ.13.6 లక్షలకు పాడారు. మాదాపూర్‌లో సర్పంచ్ పదవి రూ.10.75 లక్షలకు ఏకగ్రీవం అయినట్లు సమాచారం.
ఎన్నికల సంఘం సీరియస్..
రాష్ట్ర ఎన్నికల సంఘం ఏకగ్రీవాలపై సీరియస్‌గా ఉన్నది. అయినప్పటికీ పలు గ్రామాల్లో సర్పంచులు, వార్డు సభ్యుల ఏకగ్రీవాల ప్రక్రియ కొనసాగుతున్నది. వేలంపాట, బెదిరింపులకు పాల్పడితే చెల్లదని ఎన్నికల సంఘం ప్రకటించింది. తెలంగాణ పంచాయతీరాజ్‌ (ఎన్నికల నిర్వహణ) చట్టం 2018లోని 15వ నిబంధన ప్రకారం ఒక స్థానంలో పోటీలో ఒక్కరే ఉన్నప్పుడు ఎన్నికల ఫలితాన్ని వెంటనే ప్రకటించాలి. అయితే, గ్రామ ప్రజలను ప్రలోభాలకు గురి చేసి ఒక్కరే పోటీలో ఉండడం, అవతలి వ్యక్తిని భయపెట్టడం లేదా మోసానికి పాల్పడడం వంటివి జరగకుంటేనే ఏకగ్రీవంగా ప్రకటించాలని అధికారులను ఆదేశాలు జారీ చేసింది.
అభ్యర్థులతో ధ్రువీకరణ పత్రం
ఫిర్యాదులు లిఖితపూర్వకంగా, వాట్సాప్‌ ద్వారా, మౌఖికంగా లేదంటే వార్తా పత్రికల క్లిప్పింగ్‌ల రూపంలో కూడా ఉండొచ్చని పేర్కొన్నారు. అదే విధంగా సర్పంచ్, వార్డు స్థానానికి ఏకగ్రీవమైతే అభ్యర్థుల నుంచి డిక్లరేషన్‌ తీసుకోవాలని, ఎలాంటి బెదిరింపులు, ఒత్తిళ్లు, ప్రలోభాలకు గురి కాకుండా స్వచ్ఛందంగా నామినేషన్ ఉపసంహరించుకుంటున్నట్లు అభ్యర్థులతో ధ్రువీకరణ పత్రం తీసుకోవాలని ఉత్తర్వుల్లో పేర్కొన్నారు. పోటీలో ఉన్న ఒకే ఒక్క అభ్యర్థి నుంచి కూడా తాను ప్రత్యర్థుల ఉపసంహరణ కోసం డబ్బు ఎర చూపలేదని, వేలంపాటలో పాల్గొనడం, బెదిరింపులకు పాల్పడడం వంటివి చేయలేదని ధ్రువీకరించే పత్రాన్ని తీసుకోవాలని తెలిపారు.
Also Read: Rapido Driver – ED: ర్యాపిడో డ్రైవర్ ఖాతాకు రూ.331 కోట్లు.. రిసార్టులో విలాసవంతమైన వివాహం.. తీరా తెలిసిందేమంటే?
పరిశీలించిన తర్వాతే ధ్రువీకరణ
అభ్యర్థులు ఏకగ్రీవంగా ఎన్నికైనట్లు నిర్ధారణకు వస్తే నామినేషన్ల ఉపసంహరణ గడువు ముగిసిన వెంటనే రిటర్నింగ్‌ అధికారులు నిర్దేశిత నమూనాలో ఎన్నిక పత్రాన్ని అందజేయాలని, ప్రత్యేక పర్యవేక్షక విభాగం నుంచి వచ్చిన నివేదికలను జిల్లా కలెక్టర్ పూర్తిగా పరిశీలించిన తర్వాతే ధ్రువీకరించి, వాటిపై ఫిర్యాదులు, అభ్యంతరాలు లేకుంటేనే ఏకగ్రీవాన్ని ఆమోదించాలని ఈసీ సూచించింది. గ్రామంలో ఇబ్బందికర పరిస్థితులు ఎదురైనట్లు గుర్తిస్తే ఏకగ్రీవ ఎన్నిక ఫలితాన్ని రద్దు చేయాలని మార్గదర్శకాల్లో పేర్కొన్నది.
