Cold Wave: స్వెటర్లు రెడీ చేసుకోండి.. తెలంగాణ వాసులను గజగజ వణికించబోతున్న చలి.. లేటెస్ట్ అప్‌డేట్ ఇదే

Cold Wave: తెలంగాణలో (Telangana Weather Updates) నవంబర్ మొదటి వారంలో గజగజ వణించిన చలి మళ్లీ పెరుగుతోంది. గత రెండు వారాల పాటు కాస్తంత తగ్గినా, గురువారం రాత్రి ఊపందుకుంది. అయితే, రాబోయే మూడు రోజులపాటు కూడా ఇదే తరహాలో శీతల వాతావరణం (Cold Wave) కొనసాగుతుందని వెధర్ అప్‌డేట్స్ అప్రమత్తం చేస్తున్నాయి. ఉత్తర, మధ్య తెలంగాణలో నవంబర్ 28 రాత్రి నుంచి నవంబర్ 30 వరకు తీవ్రమైన చలి వాతావరణం కొనసాగే అవకాశం ఉందని ‘తెలంగాణ వెధర్‌మ్యాన్’ (ట్విటర్ పేజీ) అప్రమత్తం చేసింది. ఈ రెండు రోజుల్లో సూచించిన ప్రాంతాల్లో ఉష్ణోగ్రతలు కనిష్ఠంగా 9 – 11 డిగ్రీల సెల్సియస్ మధ్య నమోదయ్యే అవకాశాలు ఉన్నాయని తెలిపింది. రాజధాని నగరం హైదరాబాద్‌లోనూ ఇదే తరహా వాతావరణ ఉంటుందని, చలి పులి పంజా విసురుతుందని పేర్కొంది. రాబోయే మూడు రోజులు తెలంగాణలో రాత్రి సమయంలో కనిష్ఠ ఉష్ణోగ్రతలు 11-14 డిగ్రీల సెల్సియస్ నమోదయ్యే అవకాశం ఉందని ‘తెలంగాణ వెధర్‌మ్యాన్’ సూచించింది. ఈ హెచ్చరికలను బట్టి చూస్తే, స్వెటర్లు బయటకు తీయాల్సిందేనని నెటిజన్లు అభిప్రాయపడుతున్నారు. రాబోయే రెండు మూడు రోజుల్లో వెచ్చగా ఉండేందుకు తగు జాగ్రత్తలు తీసుకుంటామంటూ సరదాగా కామెంట్లు పెడుతున్నారు.

డిసెంబర్ 2-5 వరకు వర్షసూచన

దక్షిణ, తూర్పు తెలంగాణలోని జనాలు చలి తీవ్రత అనుభవించిన వెంటనే, వర్షాలను చవిచూసే (Rain Updates) అవకాశాలు కనిపిస్తున్నాయి. ‘ద్విత్వా’ తుపాను (CYCLONE DITWAH RAINS ) ప్రభావంతో డిసెంబర్ 2-5 తేదీల్లో దక్షిణ, తూర్పు తెలంగాణలో వానలు పడతాయని ‘తెలంగాణ వెధర్‌మ్యాన్’ అప్రమత్తం చేసింది. తేలికపాటి నుంచి మోస్తరు వర్షాలు కురిసే అవకాశం ఉందని పేర్కొంది. వర్షాలు పడే ఛాన్స్ ఉన్న ప్రాంతాల జాబితాలో ఖమ్మం, మహబూబాబాద్, భద్రాద్రి-కొత్తగూడెం, సూర్యాపేట, నల్గొండ, నాగర్‌కర్నూల్, వనపర్తి, మహబూబ్‌నగర్ జిల్లాలు ఉన్నాయని తెలిపింది. వరంగల్, హనుమకొండ, జనగామ, యాదాద్రి-భువనగిరి, రంగారెడ్డి, వికారాబాద్, గద్వాల్, హైదరాబాద్, మేడ్చల్, సిద్దిపేట, సంగారెడ్డి జిల్లాలలో తేలికపాటి వానలు పడతాయని తెలిపింది. రాష్ట్రంలోని మిగతా జిల్లాల్లో పొడి వాతావరణం కొనసాగుతుందని తెలిపింది.

Read Also- Telengana High Court: సర్పంచ్ ఎన్నికలు ఆపాలంటూ పిటిషన్.. హైకోర్టు కీలక వ్యాఖ్యలు

ఏపీకి భారీ వర్ష సూచన

దిత్వా తుపాను ప్రభావంతో దక్షిణ కోస్తా ఆంధ్రాలో భారీ నుంచి అతి భారీ వర్షాలు కురవనున్నాయని వాతావరణ శాఖ హెచ్చరించింది. నవంబర్ 29 రాత్రి నుంచి డిసెంబర్ 4 వరకు తుపాను ప్రభావం ఉంటుందని అప్రమత్తం చేసింది. రాష్ట్రం మొత్తం మీద ఈ తుపాను ప్రభావం ఉంటుందని, అయితే, దక్షిణ కోస్తా ఆంధ్రా ప్రాంతంలోని తిరుపతి, నెల్లూరు జిల్లాల్లో అత్యధిక, లేదా అతి భారీ వర్షాలు నమోదవ్వొచ్చని అంచనా వేసింది. తిరుపతి, నెల్లూరు, దక్షిణ ప్రకాశం జిల్లాల్లో నవంబర్ 30 రాత్రి నుంచి డిసెంబర్ 4 రాత్రి వరకు వర్షాలు కురుస్తాయని తెలిపింది. డిసెంబర్ 1, 2 తేదీల్లో అతి భారీ వర్షాలు కురిసే అవకాశం ఉందని పేర్కొంది. డిసెంబర్ 3, 4 తేదీలలో కూడా భారీ వర్షాలు ఉంటాయని తెలిపింది. ప్రకాశం, బాపట్ల, ఎన్టీఆర్, కోనసీమ, కాకినాడ, ఏలూరు, గుంటూరు, పల్నాడు, తూర్పు, పశ్చిమ గోదావరి జిల్లాల్లో డిసెంబర్ 1, 2 తేదీల్లో వర్షాలు కురుస్తాయని హెచ్చరించింది. తెలంగాణ సరిహద్దుకు దగ్గరగా ఉన్న ప్రాంతాలలో తేలికపాటి వర్షాలు కురిసే అవకాశం ఉందని తెలిపింది. విజయవాడ – గుంటూరు – ఏలూరు ప్రాంతాలలో వర్షాలు పడతాయని తెలిపింది.

Read Also- Cold Wave: స్వెటర్లు రెడీ చేసుకోండి.. తెలంగాణ వాసులను గజగజ వణికించబోతున్న చలి.. లేటెస్ట్ అప్‌డేట్ ఇదే

ఇక, ఉత్తర ఆంధ్రా ప్రాంతంలోని విశాఖపట్నం, విజయనగరం, శ్రీకాకుళం, అల్లూరి సీతారామరాజు, పార్వతీపురం, అనకాపల్లి జిల్లాల్లో డిసెంబర్ 2న మాత్రమే వర్షాలు పడతాయని తెలిపింది. రాయలసీమ ప్రాంతంలోని కర్నూలు, కడప, చిత్తూరు, అనంతపురం, నంద్యాల, సత్య సాయి, అన్నమయ్య జిల్లాల తూర్పు భాగాలలో డిసెంబర్ 1 నుంచి 4 వరకు భారీ వర్షాలు కురిసే అవకాశం ఉందని హెచ్చరించింది.