Tiger Protection: వన్యప్రాణుల సంరక్షణలో కొత్త అధ్యాయం.. టెక్నాలజీతో పులుల గొడవలకు చెక్..!

Tiger Protection: తెలంగాణ రాష్ట్రంలో పులుల సంరక్షణకు ప్రభుత్వం కట్టుదిట్టమైన చర్యలు చేపట్టింది. అటవీ ప్రాంతంలో మరింత నిఘాను పెంచేందుకు హైదరాబాద్(Hyderabad)‌లోని అరణ్యభవన్‌లో స్టేట్‌-లెవల్ టైగర్ ప్రొటెక్షన్ అండ్ మానిటరింగ్ సెల్‌ను ఏర్పాటు చేసింది. పులులు, మనుషుల మధ్య ఘర్షణ జరిగే ప్రాంతాలను గుర్తించడానికి, వాటిని నివారించడానికి కూడా ఈ సెల్ దోహదపడనుంది. ఈ టైగర్ సెల్ విభాగం నిత్యం పులులు, చిరుతపులుల కదలికలను పర్యవేక్షించనుంది. పులుల మధ్య ఘర్షణ ప్రాంతాలు, మనుషులు, పులుల మధ్య సంఘర్షణ ప్రాంతాలను గుర్తించి, అనునిత్యం నిఘా ఉంచుతూ మ్యాపింగ్ చేస్తుంది. ఇది అడవి ఇంటెలిజెన్స్ నెట్‌వర్క్ ట్రాకింగ్ ద్వారా యాంటీ-పోచింగ్, రెస్క్యూ బృందాల తక్షణ పాట్రోలింగ్ కోసం ఉపయోగపడుతుంది. ఈ సమగ్ర కేంద్రీకృత వ్యవస్థ దేశంలో కేవలం కర్ణాటక(Karnataka), మధ్యప్రదేశ్(MP) రాష్ట్రాల్లో మాత్రమే అమలులో ఉంది.

కీలక ప్రాంతాల్లో పర్యవేక్షణ..

రాష్ట్రంలోని 6 కీలక ప్రాంతాలైన కావాల్, ఏటూరునాగారం, కిన్నెరసాని, నిర్మల్(Nirmal), కామారెడ్డి(kamareddy), జగిత్యాల(Jagithyala) జిల్లాల్లోని పులుల కదలికలు ఈ సెల్ ద్వారా నిరంతరం పర్యవేక్షించబడతాయి. వీటితో పాటు మహారాష్ట్ర–ఛత్తీస్‌గఢ్–ఉత్తర తెలంగాణ(Telangana) అడవులను ఆంధ్రప్రదేశ్ అటవీ ప్రాంతాలతో కలిపే జాతీయ టైగర్ కారిడార్‌గా గుర్తించిన ప్రాంతాల్లో కూడా నిఘా ఉంచనున్నారు. పులుల సంచారం తీవ్రంగా ఉన్న ప్రాంతాల్లో ఏర్పాటు చేసిన క్విక్ రియాక్షన్ టీమ్స్‌ (క్యూఆర్‌టీ)పై ఈ సెల్‌కు ప్రత్యక్ష నియంత్రణ ఉంటుంది. ఇతర రాష్ట్రాల్లో సాంప్రదాయ పద్ధతిలో జిల్లాల అనుమతులతో ఆలస్యం జరిగే విధానానికి భిన్నంగా, తెలంగాణలో టైగర్ కమాండ్ సెంటర్ నుంచే నేరుగా టీంలను పంపే విధానాన్ని అవలంబించనున్నారు. పులులు గ్రామాల వద్ద కనిపించినా, వేట ముఠాల కదలికలు ఉన్నా, పశువులపై దాడులు జరిగినా, గాయపడిన పులులకు చికిత్స అవసరమైనా – స్పందన మరింత వేగంగా అందేలా వ్యవస్థ రూపొందించబడిందని అధికారులు తెలిపారు.

Also Read: Real Star Upendra: అప్పటి నుంచి సినిమా విడుదల రోజు థియేటర్‌కి వెళ్లడం ఆపేశాను

టైగర్ ఎస్టిమేషన్‌కు దోహదం..

టైగర్లపై రేడియో కాలర్ అమర్చే కార్యక్రమాన్ని కూడా తెలంగాణ ప్రారంభించేందుకు సిద్ధమైనట్లు సమాచారం. కర్ణాటక, ఉత్తరాఖండ్ వంటి రాష్ట్రాల్లో ఈ విధానాన్ని వాడుతుండగా, ఎన్టీసీఏ అనుమతి లభించిన వెంటనే తెలంగాణ కూడా ఈ జాబితాలో చేరనుంది. ఈ డేటా మొత్తం టైగర్ సెల్ నుంచే సేకరించి విశ్లేషించబడుతుంది. ఈ నూతన సెల్ ఆల్ ఇండియా టైగర్ ఎస్టిమేషన్‌లో తెలంగాణకు అదనపు ప్రయోజనం చేకూర్చనుంది.

వన్యప్రాణుల సంరక్షణే ధ్యేయం

అడవులు, వన్య ప్రాణులను సంరక్షించడమే మా ప్రజా ప్రభుత్వ ధ్యేయం. పర్యావరణ, వన్యప్రాణుల సంరక్షణతోనే మానవ మనుగడ సాధ్యం. వన్యప్రాణులు ఇతర జీవుల మనుగడపైనే మన ఉనికి ఆధారపడి ఉందనే విషయం నిత్యం గుర్తుంచుకోవాలి. మనుషుల భద్రత, వన్యప్రాణుల సంరక్షణ కోసం ప్రత్యేక చర్యలు చేపట్టాలని కేంద్ర ప్రభుత్వం రాష్ట్రాలకు 2019లోనే పలు కీలక సూచనలు చేసింది. వాటి ఆధారంగా తాము ముందుకు వెళ్తున్నామని మంత్రి కొండా సురేఖ అన్నారు.

Also Read: Telangana PCB: కాలుష్యం వెదజల్లే కంపెనీల చర్యలు.. 1,234 పరిశ్రమలకు నోటీసులు