Renu Desai: రేణు దేశాయ్.. ఈ పేరుని పరిచయం చేయాల్సిన అవసరం లేదు. తెలుగు సినిమా ఇండస్ట్రీలో ఒకప్పుడు హీరోయిన్‌గా ఎంట్రీ ఇచ్చిన రేణు దేశాయ్ (Renu Desai), ఆ తర్వాత పవర్ స్టార్ పవన్ కళ్యాణ్‌ (Power Star Pawan Kalyan)ని పెళ్లాడారు. ఆ తర్వాత వారి వివాహబంధంలో ఏర్పడిన కొన్ని అనూహ్య పరిణామాలతో వారిద్దరూ చట్టపరంగా విడిపోయారు. అప్పటి నుంచి సినిమాలు చేయడం మానేసిన రేణు దేశాయ్.. మధ్యలో రైతులపై ఓ డాక్యుమెంటరీ ఫిల్మ్ చేయబోతున్నట్లుగా ప్రకటించారు. ఆ తర్వాత మరాఠీలో ఒక నిర్మాతగానూ, దర్శకురాలిగా కూడా తన మల్టీ టాలెంట్‌ను నిరూపించుకున్నారు. మధ్యలో టాలీవుడ్‌లో మాస్ మహారాజా రవితేజ హీరోగా వచ్చిన ‘టైగర్ నాగేశ్వరరావు’ (Tiger Nageswara Rao) చిత్రంలో హేమలత లవణం (Hemalatha Lavanam) అనే పాత్రలో నటించి, నటిగా తనలోని సత్తాను మరోసారి తెలియజేశారు. ఆ తర్వాత మళ్లీ గ్యాప్ తీసుకున్న రేణు దేశాయ్.. ఇప్పుడు మళ్లీ నటిగా రీ ఎంట్రీ ఇచ్చేందుకు సిద్ధమయ్యారు.

Also Read- Sampath Nandi: ఏ కడుపునైనా ఎంచుకో.. ఏ గడపనైనా పంచుకో.. కానీ మళ్లీ రా!.. తండ్రి మృతిపై సంపత్ నంది ఎమోషనల్ పోస్ట్!

సినిమా పేరు ఇదే..

ఆమె ఫుల్ లెంగ్త్ పాత్రలో నటింబోతున్న సినిమా బుధవారం గ్రాండ్‌గా ప్రారంభోత్సవాన్ని జరుపుకుంది. ఆ సినిమా వివరాల్లోకి వెళితే.. ‘వినాయకుడు, విలేజ్‌లో వినాయకుడు, కేరింత’ వంటి విజయవంతమైన చిత్రాలతో దర్శకుడిగా మంచి గుర్తింపు తెచ్చుకున్న డైరెక్టర్ సాయికిరణ్ అడివి (Sai Kiran Adivi) చాలా గ్యాప్ తర్వాత చేయబోతున్న చిత్రం ‘16 రోజుల పండుగ’ (16 Rojula Panduga). డిఎస్ రావు తనయుడు సాయికృష్ణ దమ్మాలపాటి ఈ చిత్రంతో హీరోగా పరిచయం అవుతున్నారు. గోపిక ఉదయన్ హీరోయిన్‌గా నటిస్తున్న ఈ చిత్రంలో రేణు దేశాయ్, అనసూయ భరద్వాజ్, వెన్నల కిషోర్ వంటి వారు కీలక పాత్రలు పోషిస్తున్నారు. ప్రదా పిక్చర్స్, సాయి సినీ చిత్ర బ్యానర్లపై ప్రొడక్షన్ నెం-1 గా సురేష్ కుమార్ దేవత, హరిత దుద్దుకూరు, ప్రతిభ అడివి ఈ చిత్రాన్ని నిర్మిస్తున్నారు. ఈ చిత్ర ముహూర్తపు సన్నివేశానికి కోన వెంకట్, కేకే రాధా మోహన్ నిర్మాతలకి స్క్రిప్ట్ అందించగా.. డైరెక్టర్ శేఖర్ కమ్ముల క్లాప్ కొట్టారు. నిర్మాత టీజీ విశ్వప్రసాద్ కెమెరా స్విచాన్ చేశారు. ఫస్ట్ షాట్‌కు డి సురేష్ బాబు గౌరవ దర్శకత్వం వహించారు. నిర్మాతలు అల్లు అరవింద్, మైత్రి రవి, దామోదర ప్రసాద్ వంటి వారు ఈ కార్యక్రమానికి హాజరై టీమ్‌కు అభినందనలు తెలిపారు.

Also Read- NBK111: నటసింహం బాలయ్య, గోపీచంద్ మలినేని కాంబో చిత్రానికి క్లాప్ కొట్టిందెవరంటే?

అత్తమ్మ పాత్రలో..

ఈ చిత్ర ప్రారంభోత్సవం అనంతరం రేణు దేశాయ్ మాట్లాడుతూ.. సాయి కిరణ్ కోవిడ్ లాక్ డౌన్‌కి ముందే ఈ కథ చెప్పారు. ఈ కథ నాకు ఎంతగానో నచ్చి, వెంటనే చేస్తానని చెప్పాను. ఇందులో అత్తమ్మ రోల్ చేస్తున్నాను. ఈ పాత్ర నా ఏజ్‌కి సరిపోతుందా? అని మొదట అనిపించింది. కానీ ఆ పాత్ర, ఆ పాత్రని మలిచిన తీరు, చిత్ర కథ అద్భుతంగా అనిపించాయి. అందుకే ఈ పాత్రని మిస్సవకూడదని అనుకున్నాను. నేను ఎందుకు ఇలా చెబుతున్నానో.. రేపు సినిమా చూస్తున్నప్పుడు ప్రేక్షకులకే అర్థమవుతుంది. సాయి కిరణ్ మంచి దర్శకుడు. అతనితో వర్క్ చేస్తున్నందుకు చాలా ఆనందంగా వుంది. ఇంత మంచి అవకాశం ఇచ్చిన దర్శక నిర్మాతలకు థ్యాంక్యూ అని చెప్పారు. ఈ సినిమాకు ఈ పేరును కృష్ణ వంశీ సజెస్ట్ చేసినట్లుగా దర్శకుడు సాయి కిరణ్ అడివి చెప్పుకొచ్చారు.

స్వేచ్ఛ ఈ – పేపర్ కోసం https://epaper.swetchadaily.com/ ఈ లింక్ క్లిక్ చేయగలరు