Cyber Fraud: ఓపెన్ చేశారో.. అకౌంట్లు ఖాళీ.. జాగ్రత్త అంటున్న హైదరాబాద్ పోలీసులు!

Cyber Fraud: ఆర్టీవో చలాన్​.. క్రెడిట్​ కార్డ్​, రివార్డ్​ పాయింట్స్​ అంటూ మీ మొబైల్ ఫోన్‌కు మెసేజ్‌లు వచ్చాయా?.. వాటి చివర ఏపీకే అని ఉందా? అయితే, బహుపరాక్​ అని హైదరాబాద్ పోలీసులు హెచ్చరిస్తున్నారు. ఏంటా? అని ఫైల్​ ఓపెన్​ చేస్తే బ్యాంక్​ అకౌంట్లు ఖాళీ అయిపోతాయని చెబుతున్నారు. రెండు రోజుల క్రితం సైబర్ క్రిమినల్స్​ సీఎంవో, డిప్యూటీ సీఎంవోతో పాటు పలువురు మంత్రుల అధికారిక వాట్సాప్​ గ్రూపులను హ్యాక్​ చేసిన విషయం తెలిసిందే. ఆ తరువాత ఎస్బీఐ ఆధార్​ అప్‌డేట్​ అంటూ ఏపీకే ఫైళ్లను ఆయా వాట్సాప్ గ్రూపుల్లో ఉన్నవారికి పంపించారు. ఇలా బ్యాంక్​ ఆధార్ అప్‌డేట్ అన్నదాంతో పాటు ఆర్టీవో చలాన్లు, వాటర్​ బిల్లులు, పీఎంకే కిసాన్ యోజన, కరెంట్ బిల్లులు, క్రెడిట్​ కార్డులు, రివార్డు పాయింట్ల పేర సైబర్ మోసగాళ్లు ఒకేసారి వేలాది మంది మొబైల్ ఫోన్లకు ఏపీకే ఫైళ్లను మెసేజ్‌ల రూపంలో పంపిస్తున్నారు.

Also Read: Cyber Fraud: హర్ష సాయి పేరిట సైబర్ టోకరా.. ఇరాక్‌లో ఉన్న యువకుడికి రూ.87 వేలు మోసం!

ఇలా మొబైల్​ ఫోన్లను హ్యాక్​

ఆ ఫైళ్లను డౌన్​‌లోడ్​ చేసుకుని వివరాలను తెలుసుకోండి అని సూచిస్తున్నారు. తెలిసీ తెలియక ఈ ఫైళ్లను ఓపెన్ చేస్తే ఆ వెంటనే సైబర్ క్రిమినల్స్​ వాటిని హ్యాక్​ చేస్తున్నారు. బ్యాంక్​ లాగిన్లు, పాస్​ వర్డులు, ఓటీపీలతో పాటు వ్యక్తిగత డేటాను తస్కరిస్తున్నారు. వీటి సహాయంతో బ్యాంక్​ అకౌంట్లలో ఉండే డబ్బును అసలు ఖాతాదారుకు తెలియకుండానే తమ అకౌంట్లలోకి ట్రాన్స్‌ఫర్ చేసుకుంటున్నారు. డబ్బు మరో ఖాతాలోకి క్రెడిట్ అయ్యిందంటూ బ్యాంక్​ నుంచి మెసేజ్ వచ్చిన తరువాత గానీ మోసపోయినట్టు తెలియడం లేదు. ఇలా మొబైల్​ ఫోన్లను హ్యాక్​ చేస్తున్న సైబర్ మోసగాళ్లు కాంటాక్ట్ లిస్టులో ఉన్న అందరికీ అర్జంటుగా డబ్బు అవసరం ఉందని మెసేజ్‌లు పెట్టి డబ్బు లూటీ చేస్తున్నారు. ఇటీవల ఓ మహిళా యాంకర్ సెల్‌ఫోన్‌ను హ్యాక్​ చేసి ఇలాగే ఆమె కాంటాక్ట్ లిస్టులో ఉన్న బంధువులు, స్నేహితులకు డబ్బు అర్జంట్ అని మెసేజ్‌లు పెట్టారు. నిజంగా అవసరం వచ్చిందేమో అనుకున్న పలువురు దాదాపు రూ. 5లక్షలను ట్రాన్స్‌ఫర్ చేయగా సైబర్​ క్రిమినల్స్ ఆ డబ్బును కొట్టేశారు.

ఈ జాగ్రత్తలు తీసుకోండి.

మోసాల బారిన పడకుండా ఉండటానికి హైదరాబాద్ పోలీసులు పలు సూచనలు చేశారు. తెలియని ఏపీకే ఫైళ్లను ఎట్టి పరిస్థితుల్లోనూ డౌన్‌లోడ్ చేయవద్దని తెలిపారు. ఎస్ఎంఎస్, వాట్సాప్​, టెలిగ్రాం, ఈ మెయిల్​ ద్వారా వచ్చే యాప్‌లను ఇన్‌స్టాల్ చేసుకోవద్దని సూచించారు. బ్యాంక్ అప్ డేట్లు, క్యాష్ బ్యాక్, కేవైసీ వెరిఫికేషన్, ప్రభుత్వ పథకాల ప్రయోజనాల పేర వచ్చే లింకులను క్లిక్ చేయవద్దని పేర్కొన్నారు. ఇన్‌స్టాల్ చేసుకునే ముందు ఆయా యాప్‌ల అనుమతులను పరిశీలించాలన్నారు. అనవసర అనుమతులు అడిగే యాప్‌లను ఇన్‌స్టాల్ చేసుకోవద్దని తెలిపారు. మొబైల్ ఫోన్‌లో యాంటీ వైరస్​ యాప్‌ను పెట్టుకోవాలని సూచించారు. దాంతోపాటు మాల్వేర్ నుంచి రక్షణ కోసం ఓఎస్​, సెక్యూరిటీ టూల్స్‌ను ఎప్పటికప్పుడు అప్‌డేట్ చేసుకోవాలన్నారు. ఓటీపీలు, బ్యాంక్​ అకౌంట్ల వివరాలు ఎవ్వరికీ చెప్పవద్దని పేర్కొన్నారు. బ్యాంకులు, ప్రభుత్వ సంస్థలు ఈ వివరాలు, పాస్​ వర్డులను అడగవన్న విషయాన్ని గుర్తు పెట్టుకోవాలన్నారు.

Also Read: Cyber Fraud: ఫ్రెండ్ రిక్వెస్ట్ యాక్సెప్ట్ చేసి.. రూ.9 కోట్లు పోగొట్టుకున్నాడు..!