Epaper 
Harish Rao: పదవి విరమణ పొందిన ఉద్యోగుల పట్ల కాంగ్రెస్ ప్రభుత్వం చాలా నిర్లక్ష్యంగా వ్యవహరిస్తోందని బీఆర్ఎస్ ముఖ్యనేత, మాజీ మంత్రి హరీశ్ రావు ఆగ్రహం వ్యక్తం చేశారు. రిటైర్మెంట్ బెనిఫిట్స్ కోసం నెలలు తరబడి ఎదురు చూడాల్సిన పరిస్థితులు ఏర్పడ్డాయని మండిపడ్డారు. విశ్రాంత ఉద్యోగుల బాధ వింటే మనసు చలించిపోతోందని అన్నారు. మూటలు, కోతలు, వాటాలు, కమీషన్ల గురించి మాత్రమే పనిచేసే ముఖ్యమంత్రి రేవంత్ రెడ్డికి.. ఉద్యోగుల కన్నీరు కనిపించడం లేదా? అని నిలదీశారు. వారి వేదన వినిపించడం లేదా అంటూ ప్రశ్నించారు.
మీరిచ్చే గౌరవం ఇదేనా?
కమీషన్ల కోసం బడా కాంట్రాక్టర్ల బిల్లులను వెంటనే విడుదల చేసే సీఎం రేవంత్ రెడ్డి (CM Revanth Reddy).. ఉద్యోగుల రిటైర్మెంట్స్ బెన్ఫిట్స్ మాత్రం ఎందుకు క్లియర్ చేయడం లేదని హరీశ్ రావు (Harish Rao) ప్రశ్నించారు. ‘కమిషన్లు రావని విశ్రాంత ఉద్యోగుల బకాయిలు విడుదల చేయడం లేదా? నీకు ఆ మనసు లేదా?. 30 ఏళ్లకు పైగా సేవలందించిన ఉద్యోగులకు, ఉపాధ్యాయులకు మీ ప్రభుత్వం ఇచ్చే గౌరవం ఇదేనా? వారి గోడు ఈ ప్రభుత్వానికి పట్టదా?. 2024 మార్చి నుంచి రిటైర్ అయిన ఉద్యోగులు, ఉపాధ్యాయులకు బెన్ఫిట్స్ అందక అనేక ఇబ్బందులు ఎదుర్కుంటుంటే ప్రభుత్వం ఏం చేస్తోంది. సర్వీసులో దాచుకున్న సొమ్మును కూడా తిరిగి ఇవ్వకుండా ప్రభుత్వం వేధిస్తుండటం అమానవీయం, అనైతికం’ అని హరీశ్ రావు అన్నారు.
‘పైరవీలు చేసే దుస్థితి కల్పించారు’
విశ్రాంతి తీసుకోవాల్సిన సమయంలో రిటైర్డ్ ఉద్యోగులను మానసిక ఒత్తిడికి గురి చేయడం దుర్మార్గామని హరీశ్ రావు విమర్శించారు. ‘మీ నిర్లక్ష్య పూరిత వైఖరి, పట్టింపులేని తనం వల్ల ఇప్పటికే అనేక మంది విశ్రాంత ఉద్యోగులు మానసిక ఒత్తిడికి గురై ప్రాణాలు కోల్పోయారు. బకాయిలు క్లియర్ చేసేందుకు ప్రతి నెల రూ. 700 కోట్లు విడుదల చేస్తామని చెప్పిన ముఖ్యమంత్రి మాటలు నీటి మూటలే అయ్యాయి. దేశంలోనే విశ్రాంత ఉద్యోగులకు రూ. 10,000 కోట్ల బకాయిలు పెట్టిన రాష్ట్రం ఏదీ లేదు. ఈ ఘనత కూడా రేవంత్ రెడ్డికే దక్కింది. హక్కుగా తాము పొందాల్సిన బెనిఫిట్స్ కోసం విశ్రాంత ఉద్యోగులను ప్రభుత్వ కార్యాలయాలు, కోర్టుల చుట్టూ తిరిగేలా చేసింది. పైరవీలు చేసుకోవాల్సిన దుస్థితిని కల్పించింది’ అని మండిపడ్డారు.
Also Read: Tirumala Laddu Case: 20 కోట్ల కల్తీ లడ్డులు.. 11 కోట్ల భక్తులకు విక్రయం.. అంగీకరించిన టీటీడీ!
‘రిటైర్మెంట్ బెనిఫిట్స్ చెల్లించాలి’
కుటుంబ సభ్యులతో కలిసి విశ్రాంతి తీసుకోవాల్సిన సమయంలో విశ్రాంత ఉద్యోగులకు అవిశ్రాంత పోరాటం చేయాల్సిన పరిస్థితిని సీఎం రేవంత్ రెడ్డి కల్పించారని హరీశ్ రావు ఆరోపించారు. ‘ప్రజలకు హామీ ఇచ్చి నెరవేర్చని జాబితాలో ఉద్యోగుల పీఆర్సీ, డీఏలు కూడా చేరాటం దురదృష్టకరం. ఎన్నికల సమయంలో ఇచ్చిన హామీలు నెరవేర్చకుండా ఉద్యోగులను ప్రభుత్వం దారుణంగా మోసం చేసింది. ప్రతి నెల ఒకటో తేదీన వేతనాలు చెల్లిస్తామని గొప్పలు చెప్పి, ఆచరణలో మాత్రం గాలికి వదిలేశారు. రెండు మూడు నెలలు జీతాలు అందక ఎంతో మంది ఉద్యోగులు ఇబ్బందులు ఎదుర్కొంటున్నారు. మీ మాటల మాయాజాలంతో ఎంతకాలం ఉద్యోగులు, టీచర్లను మోసం చేస్తారు. ఉద్యోగులు, ఉపాధ్యాయుల పట్ల ఏమాత్రం ప్రేమ ఉన్నా వెంటనే రిటైర్మెంట్ బెనిఫిట్స్ ను చెల్లించాలి’ అని రాష్ట్ర ప్రభుత్వాన్ని హరీశ్ రావు డిమాండ్ చేశారు.
