Miss Universe 2025: మిస్ యూనివర్స్ టైటిల్ గెలుచుకున్న ఫాతిమా బాష్.. అవమానాలను సైతం ఎదిరించి..

Miss Universe 2025: ప్రపంచ అందాల పోటీల్లో అత్యంత ప్రతిష్టాత్మకమైన మిస్ యూనివర్స్ 2025 కిరీటాన్ని మెక్సికో దేశానికి చెందిన ఫాతిమా బాష్ (Fátima Bosch) గెలుచుకున్నారు. థాయ్‌లాండ్‌లోని బ్యాంకాక్‌లో ఘనంగా జరిగిన ఈ పోటీల్లో, అద్భుతమైన ప్రదర్శన కనబరిచిన ఫాతిమా, యావత్ ప్రపంచ దృష్టిని ఆకర్షించి విశ్వ సుందరిగా నిలిచింది. ఆమె గెలుపు వెనుక దాగి ఉన్న పట్టుదల, ధైర్యం అందరినీ ఆశ్చర్యపరిచాయి. మెక్సికోలోని కోటాకోల్కోస్‌కు చెందిన 25 ఏళ్ల ఫాతిమా బాష్ మోడలింగ్ రంగంలోనే కాక, లింగ సమానత్వం (gender equality) అణగారిన యువతకు సహాయం చేయడంలో చురుకుగా పాల్గొనే కార్యకర్త, వక్త కూడా. కమ్యూనికేషన్‌లో డిగ్రీ పూర్తి చేసిన ఆమె సెప్టెంబర్ 2025లో మిస్ యూనివర్స్ మెక్సికో టైటిల్‌ను గెలుచుకుని, అంతర్జాతీయ వేదికపై తన దేశానికి ప్రాతినిధ్యం వహించింది.

Read also-Ahaan Panday: అనీత్‌తో డేటింగ్ పుకార్లపై స్పందించిన అహాన్ పాండే.. వారి బంధం ఎలాంటిదంటే?

వివాదాలను ఎదుర్కొని విజయం

ఈ పోటీల సందర్భంగా ఫాతిమా బాష్ ఒక పెద్ద వివాదంలో చిక్కుకున్నారు. పోటీల డైరెక్టర్లలో ఒకరైన నవాట్ ఇత్సరగ్రిసిల్ ఒక లైవ్ ఈవెంట్‌లో ఫాతిమాను ఉద్దేశించి “dumb” (తెలివి తక్కువది) అని బహిరంగంగా వ్యాఖ్యానించడం సంచలనం సృష్టించింది. ఒక షూట్‌కు హాజరు కానందుకు ఫాతిమాను ఆయన ప్రశ్నించారు. ఈ అవమానాన్ని తట్టుకోలేని ఫాతిమా, ధైర్యంగా స్పందిస్తూ, “నేను ఒక దేశానికి ప్రాతినిధ్యం వహిస్తున్నాను. మీరు మమ్మల్ని గౌరవించినట్లే మేం మిమ్మల్ని గౌరవిస్తాం” అని గట్టిగా బదులిచ్చారు. దీనికి నిరసనగా, ఫాతిమాతో పాటు పలువురు ఇతర దేశాల పోటీదారులు సంఘీభావంగా వేదిక నుంచి వాకౌట్ చేయడం అందాల పోటీల చరిత్రలో సంచలనంగా మారింది. డైరెక్టర్ వ్యాఖ్యలపై ఫాతిమా స్పందిస్తూ, “ఆయన చేసిన పని అగౌరకరం. సంస్థతో ఆయనకు ఉన్న సమస్యల కారణంగా నన్ను ‘తెలివి తక్కువది’ అని పిలిచారు. ఇది అన్యాయమని నేను భావిస్తున్నాను. నేను నా పనిని సక్రమంగా చేసుకుంటూ ఎవరినీ ఇబ్బంది పెట్టకుండా ఉండాలని అనుకుంటున్నాను” అని పేర్కొన్నారు. ఈ ధైర్యం, ఆత్మగౌరవం ఆమెకు ప్రపంచవ్యాప్తంగా మద్దతును తెచ్చిపెట్టాయి.

Read also-Raju Weds Rambai review: ‘రాజు వెడ్స్ రాంబాయి’ ప్రేమకథ ప్రేక్షకులను మెప్పించిందా?.. ఫుల్ రివ్యూ..

అంతిమ ప్రదర్శన

ఇన్ని వివాదాల మధ్య కూడా ఏకాగ్రత చెదరకుండా, ఫాతిమా తుది పోటీలో అద్భుతంగా రాణించింది. ఆమె ఆత్మవిశ్వాసం, చక్కటి వాక్చాతుర్యం, అద్భుతమైన నడక న్యాయ నిర్ణేతలను, ప్రేక్షకులను ఆకట్టుకున్నాయి. చివరకు, తన దేశానికి కిరీటాన్ని సాధించి, ఆమె తన పట్టుదలను, ప్రతిభను నిరూపించుకున్నారు. మొదటి రన్నర్-అప్‌గా థాయ్‌లాండ్‌కు చెందిన ప్రవీణార్ సింగ్ నిలవగా, 2వ రన్నర్-అప్‌గా వెనిజులాకు చెందిన స్టెఫానీ అబసాలి నిలిచారు. ఫాతిమా బాష్ విజయం కేవలం అందానికి మాత్రమే కాక, ఆత్మగౌరవం, ధైర్యం, మహిళా సాధికారతకు ప్రతీకగా నిలిచింది. ఆమె విజయం ప్రపంచవ్యాప్తంగా ఉన్న మహిళలకు ఒక స్ఫూర్తిదాయకం.