Pavithra menon: జాన్వీ కపూర్‌పై మలయాళ నటి ఫైర్..

Pavithra menon: మలయాళ నటి, గాయని పవిత్రా మీనన్, జాన్వీ కపూర్ నటించిన బాలీవుడ్ చిత్రం ‘పరమ్ సుందరి’లో ఆమె కేరళ అమ్మాయి పాత్రను పోషించడంపై అభ్యంతరం వ్యక్తం చేశారు. ఈ చిత్రం, సిద్ధార్థ్ మల్హోత్రా జాన్వీ కపూర్ జంటగా నటిస్తున్న ఒక క్రాస్-కల్చరల్ రొమాంటిక్ డ్రామా. ఈ సినిమా ఆగస్టు 29, 2025న విడుదల కానుంది. ఈ చిత్రంలో జాన్వీ కపూర్ కేరళకు చెందిన సుందరి అనే పాత్రలో, సిద్ధార్థ్ మల్హోత్రా ఢిల్లీకి చెందిన పరమ్ అనే పాత్రలో కనిపించనున్నారు. ఈ చిత్రం ట్రైలర్ ఇటీవల విడుదలై, సినిమా ప్రేక్షకుల నుండి మిశ్రమ స్పందనలను రాబట్టింది. అయితే, పవిత్రా మీనన్ ఈ ట్రైలర్‌లో జాన్వీ కపూర్ మలయాళ యాస, కేరళ సంస్కృతి చిత్రణను విమర్శిస్తూ ఇన్‌స్టాగ్రామ్‌లో ఒక వీడియోను పోస్ట్ చేశారు. ఇప్పుడు దానిని వైరల్ గా మారింది.

పవిత్రా మీనన్ విమర్శలు
పవిత్రా మీనన్ తన వీడియోలో, “నేను మలయాళీని, ‘పరమ్ సుందరి’ ట్రైలర్‌ను చూశాను, ఈ విషయాన్ని చర్చించాలనుకుంటున్నాను – ఒక నిజమైన మలయాళ నటిని ఎందుకు తీసుకోలేదు? మేము తక్కువ ప్రతిభావంతులమా? కేరళలో అందరూ మోహినియట్టం చేస్తూ, మల్లెపూలు ధరించి తిరుగుతారని అనుకుంటున్నారా? నేను హిందీలో మాట్లాడుతున్నట్లే, మలయాళంలో కూడా బాగా మాట్లాడగలను. ఒక హిందీ సినిమాలో మలయాళీ పాత్ర కోసం మలయాళ నటిని తీసుకోవడం అంత కష్టమా?” అని ప్రశ్నించారు. ఆమె హిందీ సినిమాల్లో మలయాళీలను స్టీరియోటైప్‌గా చిత్రీకరించడాన్ని కూడా విమర్శించారు. “1990లలో మలయాళ చిత్రాల్లో పంజాబీలను ‘బల్లే బల్లే’ అంటూ అతిశయోక్తిగా చూపించేవారు. ఇప్పుడు 2025లో ఉన్నాం. మలయాళీలు ఎలా మాట్లాడతారు, వారు సాధారణ మనుషుల్లాగే ఉంటారని అందరికీ తెలుసు. మేము ఎప్పుడూ మల్లెపూలు ధరించి, మోహినియట్టం చేయము. దయచేసి, తిరువనంతపురం అని చెప్పలేకపోతే, ట్రివాండ్రం అని చెప్పండి, మేము సంతోషిస్తాం,” అని ఆమె అన్నారు. తన విమర్శలు జాన్వీ కపూర్‌పై వ్యక్తిగతంగా కాదని, కేవలం పాత్రల ఎంపిక సాంస్కృతిక చిత్రణపైనే అని ఆమె స్పష్టం చేశారు.

ప్రేక్షకుల స్పందన
పవిత్రా మీనన్ వీడియో సోషల్ మీడియాలో వైరల్ అయింది. ఆమె అభిప్రాయాలకు అనేక మంది మద్దతు తెలిపారు. ఒక యూజర్, “చాలా బాగా చెప్పారు, ఈ స్టీరియోటైప్‌లు ఆపాలి,” అని కామెంట్ చేశారు. మరొకరు, “‘పరమ్ సుందరి’ ట్రైలర్ చూసిన ప్రతి మలయాళీ ఇలాగే ఫీల్ అవుతున్నారు,” అని అన్నారు. అయితే, కొందరు జాన్వీ కపూర్‌ను సమర్థిస్తూ, “ఆమె చిత్రంలో మోహినియట్టం డాన్స్ టీచర్ పాత్రలో నటిస్తోంది, దానికి తగ్గట్టుగా నటించడం సహజం,” అని వాదించారు. మరికొందరు, “ఈ లాజిక్ ప్రకారం, మృణాళ్ ఠాకూర్ పంజాబీ పాత్రలు, రష్మిక మందన్న, కీర్తి సురేష్ వంటి వారు బాలీవుడ్‌లో నటించకూడదా?” అని ప్రశ్నించారు.