Epaper 
SKN Producer: ప్రతి క్రాఫ్ట్ వాళ్లు మీరు ఎవరి వైపు ఉంటారో తేల్చుకోండి. మీరు డిమాండ్స్ మాత్రమే చేసి హక్కులు మరచిపోతే ఎలా. మీరు మారకుంటే మా బడ్జెట్‌లో వచ్చేవాళ్లతో సినిమాలు నిర్మించుకుంటామని కార్మికులకు చిన్నపాటి హెచ్చరిక చేశారు నిర్మాత ఎస్‌కెఎన్. టాలీవుడ్‌లో ప్రస్తుతం నెలకొన్న సమ్మె పరిస్థితుల నేపథ్యంలో.. రైజింగ్ ప్రొడ్యూసర్స్ చిత్ర నిర్మాణంలో వారు ఎదుర్కొంటున్న సవాళ్లను తెలియజేసేందుకు మీడియా సమావేశం నిర్వహించారు. హైదరాబాద్ ప్రసాద్ ల్యాబ్స్‌లో జరిగిన ఈ మీడియా సమావేశంలో నిర్మాతలు ఎస్‌కెఎన్, ధీరజ్, రాజేశ్ దండా, ప్రైమ్ షో చైతన్య, శరత్, అనురాగ్, మధుర శ్రీధర్, మహేశ్వర్ రెడ్డి, రాకేశ్ వర్రె తదితరులు హాజరయ్యారు. ఈ కార్యక్రమంలో నిర్మాత ఎస్‌కెఎన్ సంచలన వ్యాఖ్యలు చేశారు. కుండబద్దలు కొట్టినట్లుగా ఫెడరేషన్ వాళ్లకి హెచ్చరికలు పంపించారు.
ఈ కార్యక్రమంలో ఎస్‌కెఎన్ మాట్లాడుతూ.. ఇండస్ట్రీలో 90 శాతం సినిమాలు చిన్న నిర్మాతల నుంచి వస్తున్నవే. మాకు ఎలాంటి పదవులు లేవు, మాట్లాడేందుకు పెదవులు తప్ప. ఇది గ్రూపిజం కోసం పెట్టిన మీడియా సమావేశం కాదు. చిన్న నిర్మాతలుగా మా బాధలు చెప్పుకునేందుకు పెట్టుకున్నాం. గుడ్డు పెట్టేవాడికే తెలుస్తుంది బాధ అని మనవాళ్లు అంటుంటారు. మీకు 30 శాతం కాదు 50 శాతం వేతనాలు పెంచుతాం. కానీ థియేట్రికల్‌గా రెవెన్యూ పరంగా, మేము పెట్టిన ఖర్చు పరంగా, ఏ రూపంలో అయినా సరే.. మాకు పెట్టుబడి తిరిగొస్తుందని మీరు గ్యారెంటీ ఇవ్వగలరా చెప్పండి. ఇప్పుడు ఇండస్ట్రీలో అన్నీ పాన్ ఇండియా సినిమాలే నిర్మాణం జరుగుతున్నాయని పెద్ద నిర్మాతలు కొందరు అంటున్నారు. నిజమే కానీ.. పరిస్థితి వేరు, చిన్న నిర్మాతల పరిస్థితి వేరు.
Also Read- Kingdom OTT: ఓటీటీలోకి ‘కింగ్‌డమ్’.. ఇంత త్వరగానా? స్ట్రీమింగ్ డేట్ ఇదేనా?
చిన్న సినిమాలకు 25 శాతం వేతనాలు తగ్గించండి అని ఫెడరేషన్‌తో ఒప్పందం చేసుకుంటే.. దాన్ని వాళ్లు పాటిస్తున్నారా? ఏ సినిమాకైనా అదే కష్టం అంటూ పెద్ద సినిమాలతో సమానంగా వేతనాలు తీసుకుంటున్నారుగా. చిన్న నిర్మాతలకు ఉండే కష్టాలు వారికేం తెలుసు.. ఫైనాన్స్ కట్టుకోవాలి, చెప్పిన డేట్‌కు సినిమా రిలీజ్ చేయాలి.. ఇలాంటి ఎన్నో టెన్షన్స్ ఉంటాయి. రోజూ అన్ని ఖర్చులు పెట్టి, ఖాళీ జేబులతో మేము ఇంటికి వెళ్తుంటాం. మేము నిర్మాతలమని సంతృప్తి పడుతుంటాం. ఈ ఇండస్ట్రీలో వందల కోట్లు తీసుకునే హీరోలు ఒకరిద్దరే. మా హీరో కిరణ్ అబ్బవరం ‘చెన్నై లవ్ స్టోరీ’ సినిమాకు ఎంతో సపోర్ట్ చేశారు. మా పరిస్థితి అర్థం చేసుకుని.. ఏమైనా సరే సినిమా చేద్దామని ముందుకొచ్చారు. అలాంటి హీరోలు ఇండస్ట్రీలో ఎంతమంది ఉంటారు.. ఉన్నారు? ఇలాంటి పరిస్థితులు ఇండస్ట్రీలో ఉంటే మీకు 30 శాతం కావాలని ఎలా అడగాలని అనిపిస్తోంది.
సినిమా టికెట్ రేట్లు పెంచుకుంటున్నారుగా? అని కొందరు అడుగుతున్నారు. అలా పెంచుకునే సినిమాలను వేళ్ల మీద లెక్కపెట్టవచ్చు. మేము రైజింగ్ ప్రొడ్యూసర్స్ కాదు.. బర్నింగ్ ప్రొడ్యూసర్స్. మాది మేకపోతు గాంభీర్యం.. అంతే. ఈ మధ్య చాలా మంది మాట్లాడుతూ.. ‘నిర్మాతలకు ఏంటి?’ అని మాట్లాడుతున్నారు. ఇండస్ట్రీలో ఈ సినిమాతో డబ్బులు వస్తాయని గ్యారెంటీ ఇచ్చే వాళ్లు ఎవరైనా ఉన్నారా? డైరెక్టర్స్ అసోసియేషన్, మూవీ ఆర్టిస్ట్స్ అసోసియేషన్ ఎవరి వైపు ఉన్నారో స్పష్టత ఇవ్వాలని కోరుకుంటున్నాం. కాదు, కుదరదు అంటే మేము సినిమాలు తీయడం ఆపేస్తాం. షూటింగ్‌కు ఇంతమందిని తీసుకోవాలి, ఇంత డబ్బు ఇవ్వాలని డిమాండ్ చేసే హక్కు మీకెక్కడిది, ఎవరిచ్చారు? అసలు బిజినెస్ లేదని మేము బాధపడుతుంటే 30 పర్సెంట్ పెంచాలని డిమాండ్ చేయడం ఎంతవరకు కరెక్టో ప్రతి ఒక్కరూ ఆలోచించుకోవాలి.
Also Read- Tollywood: తెలుగు రాష్ట్రాల సినిమాటోగ్రఫీ మినిస్టర్స్‌తో భేటీలు.. టాలీవుడ్‌లో అసలేం జరుగుతుంది?
కొందరు నిర్మాతలు తమ కేసులు, జెండాలు, అజెండాల మేరకు కార్మికులందరికీ ఒకేలా వేతనాలు పెంచాలని అంటున్నారు. సినీ కార్మికుల ముసుగులో తమ స్వలాభం కోసం వాళ్లంతా చూస్తున్నారు. ప్రతి క్రాఫ్ట్ వాళ్లకి మేము చెప్పేది ఒక్కటే.. మీరు ఎవరి వైపు ఉంటారో తేల్చుకోండి. మీరు డిమాండ్స్ మాత్రమే చేసి.. మీ హక్కులు మరిచిపోతే ఎలా? మీరు మారకుంటే మా బడ్జెట్‌లో వచ్చేవాళ్లతో సినిమాలు చేసుకుంటాం. సినిమా మాకు కంఫర్ట్ కాదు ప్యాషన్. రెండు తెలుగు రాష్ట్రాల ప్రభుత్వాలు కూడా మాలాంటి చిన్న నిర్మాతలు పడుతున్న ఇబ్బందులపై దృష్టి పెట్టాలని ఈ సందర్భంగా విజ్ఞప్తి చేస్తున్నాం. అందరూ బాగుండాలని అనుకోవాలి గానీ.. మేము మాత్రమే బాగుండాలని యూనియన్స్ వాళ్లు ఆలోచించడం సరికాదు. ఏ హీరో కూడా మాకింత ఇవ్వకుంటే షూటింగ్స్ బంద్ చేస్తామని అనడం లేదు. పరిస్థితి అర్థం చేసుకుని వాళ్లు సినిమాలు చేస్తున్నారు. యూనియన్స్ కూడా ఇది మన ఇండస్ట్రీ, మన ప్రొడ్యూసర్స్ అనే భావనతో పరిస్థితి అర్థం చేసుకోవాలని కోరుతున్నామని అన్నారు.
స్వేచ్ఛ ఈ – పేపర్ కోసం https://epaper.swetchadaily.com/ ఈ లింక్ క్లిక్ చేయగలరు
