New Sarpanch: ఎలుగుబంటి వేషంలో నూతన సర్పంచ్.. కోతుల సమస్యకు చెక్!

New Sarpanch: కొత్తగా ఎన్నికైన ఓ సర్పంచ్.. ‘సమయం లేదు మిత్రమా!’ అంటూ సేవ మొదలుపెట్టేశారు. నూతన సర్పంచ్‌గా (New Sarpanch) బాధ్యతల స్వీకరించిన రోజుల్లోనే తన కార్యాచరణ షురూ చేశారు. గ్రామానికి ఏ సమస్య వచ్చినా తాను ముందుంటానంటూ ఎన్నికల్లో ఇచ్చిన హామీ మేరకు కర్తవ్యాన్ని ఆచరణలో పెట్టారు. ఫైళ్లకే పరిమితం కాకుండా నేరుగా సమస్య పరిష్కారానికి దిగారు. గ్రామ ప్రజలకు ఇబ్బందికరంగా మారిన కోతుల బెడద వదిలించేందుకు స్వయంగా ఆయనే పోరాటం మొదలుపెట్టారు.

కోతులను తరిమేందుకు ఎలుగుబంటి వేషం

నిర్మల్ జిల్లా కడెం మండలం లింగాపూర్ గ్రామ నూతన సర్పంచ్ పదవి చేపట్టిన కొద్ది రోజుల్లోనే ప్రజల మన్ననలు పొందుతున్నారు. గ్రామ ప్రజలకు కోతుల బాధ నుంచి విముక్తి కల్పించేందుకు స్వయంగా రంగంలోకి దిగి ఎలుగుబంటి వేషం కోతులను తరిమికొట్టే ప్రయత్నం చేశారు. బీఆర్ఎస్ పార్టీ బలపరిచిన ఆ యువ సర్పంచ్ పేరు కుమ్మరి రంజిత్. ఎలుగుబంటి వేషంలో ఉన్న రంజిత్‌ను చూసి చాలా కోతులు పరారవుతున్నాయి. ఈ యువ సర్పంచ్ ప్రయత్నంతో కోతుల బెడద కాస్త తగ్గడంతో గ్రామస్తుల హర్షం వ్యక్తం చేస్తున్నారు. ఆయనను అభినందనలతో ముంచెత్తుతున్నారు.

Read Also- Illegal Land Registration: ఫోర్జరీ పత్రాలతో శ్రీ సాయిరాం నగర్ లేఅవుట్‌​కు హెచ్​ఎండీఏ అనుమతి.. కోర్టు ఆదేశాలు లెక్కచేయని ఓ అధికారి..?

కాగా, నూతన సర్పంచ్ కుమ్మరి రంజిత్‌ ప్రయత్నం సోషల్ మీడియాలో వైరల్ అవుతోంది. ఎలుగుబంటి వేషంలో కోతులను పారదోలుతున్న దృశ్యాలు చక్కర్లు (Viral News) కొడుతున్నాయి.

ప్రభుత్వం స్పందించాలి: సర్పంచ్ రంజిత్

గత రెండు మూడు సంవత్సరాల నుంచి మా గ్రామంలో కోతుల బెడద ఎక్కువ కావడంతో ఇంటికో రూ.50 చొప్పున వేసుకొని బోనులు చేయించాం. అయినాగానీ, ఆ బోనులలో కొన్ని పడుతున్నాయి. కొన్ని పడడం లేదు. కొన్ని కోతులు బెదిరిపోయాయి. ఈ సమస్య పరిష్కారం కోసం ఏం చేద్దామని ఆలోచనల్లోంచి ఈ ఎలుగుబంటి వేషం ఆలోచన పుట్టింది. యూట్యూబ్‌లో చూసి తెలుసుకున్నాను. కోతుల బెడద తగ్గించే ప్రయత్నం చేస్తున్నాం. గ్రామ ప్రజలు, మా పాలక వర్గ సభ్యులు, ఉప సర్పంచ్ అందరూ సహకరిస్తున్నారు. కోతుల బెడద తగ్గాలని కోరుకుంటున్నాను. ఈ సమస్యపై ప్రభుత్వం కూడా స్పందించి, జిల్లాల వారిగా కోతులు పట్టే చర్యలు తీసుకోవాలని కోరుతున్నాను’’ అని యువ సర్పంచ్ రంజిత్ పేర్కొన్నాడు.

కాగా, కొన్ని ప్రాంతాల్లోని గ్రామాల్లో కోతుల బెడద పెద్ద సమస్యగా మారిపోయింది. పంటలను నాశనం చేయడం, ఇళ్లలోకి చొరబడి వస్తువులను ఎత్తుకెళ్లడం, పిల్లలను భయభ్రాంతులకు గురిచేయడం వంటి సమస్యలు ఉత్పన్నమవుతున్నాయి.

Read Also- Telangana BJP: తెలంగాణ బీజేపీ నేతల తీరుపై ప్రధాని మోడీ ఫైర్.. కమల దళంలో కలకలం..!