YouTuber Arrest: పెళ్లి పేరుతో వివాహితపై అత్యాచారం.. ప్రముఖ యూట్యూబర్ అరెస్టు

తెలంగాణ బ్యూరో స్వేచ్ఛ: YouTuber Arrest: పెళ్లి చేసుకుంటానని వివాహితను నమ్మించి వాంఛలు తీర్చుకుని ఆ తరువాత మాట మార్చిన యూ ట్యూబర్​ ను అంబర్​ పేట పోలీసులు శనివారం అరెస్ట్​ చేశారు. నిందితునిపై బీఎన్​ఎస్​ 69, 79, 352, 351(4) సెక్షన్ల ప్రకారం కేసులు నమోదు చేశారు. వివరాలు ఇలా ఉన్నాయి. అంబర్​ పేట సీఈ కాలనీకి చెందిన ముప్పయ్యేళ్ల మహిళకు 2007లో అలీం అనే వ్యక్తితో కుటుంబ సభ్యుల సమక్షంలో పెళ్లయ్యింది. వివాహం తరువాత ఆమె ఇద్దరు కొడుకులకు జన్మనిచ్చింది. అయితే, విభేదాలు తలెత్తటంతో 2018లో అలీం ఆమెకు విడాకులిచ్చాడు.

ఆ తరువాత సదరు మహిళ లెక్చరర్​ గా పార్ట్​ టైం జాబ్​ చేస్తూ జీవనం గడుపుతోంది. ఆ సమయంలో తన స్నేహితుని ద్వారా ఆమెకు న్యూస్​ లైన్​ యూ ట్యూబ్​ చానల్​ నడుపుతున్న తుర్కయంజాల్​ నివాసి సీహెచ్​.శంకర్​ (36)తో పరిచయం ఏర్పడింది. బాధితురాలికి పెళ్లి కావటం…భర్త విడాకులు ఇవ్వటం తదితర విషయాలు తెలుసుకున్న శంకర్​ ఆమె పట్ల సానుభూతి కనబరుస్తూ క్రమంగా దగ్గరయ్యాడు. ఓసారి తన కారులో ఆమెను శంషాబాద్​ వైపు ఉన్న హైవే పైకి తీసుకెళ్లిన శంకర్​ నిన్ను పెళ్లి చేసుకుంటానని చెప్పి వద్దని వారిస్తున్నా కోరిక తీర్చుకున్నాడు.

 Also Read: MP Chamala Kiran Kumar: పార్లమెంటులో గొంతు నొక్కేస్తున్నారు’.. కాంగ్రెస్ ఎంపీ ఫైర్

ఆ తరువాత కూడా చాలాసార్లు ఇలాగే చేశాడు. బాధితురాలు సీఈ కాలనీకి మకాం మార్చిన తరువాత ఆ ఇంటికి కూడా పలుమార్లు వచ్చాడు. ఫిబ్రవరిలో ఆమె బర్త్​ డేను కూడా సెలబ్రేట్​ చేశాడు. ఇలా రోజులు గడిచి పోతుండటంతో ఇటీవల బాధితురాలు తనను పెళ్లి చేసుకొమ్మని శంకర్​ ను అడిగింది. అపుడు ఇపుడు అంటూ కాలం గడిపిన శంకర్​ ఇటీవల బెదిరించటం మొదలు పెట్టాడు. తాను న్యూస్​ లైన్​ అన్న యూ ట్యూబ్​ చానల్ నడుపుతున్నానని, తనకు రాజకీయ అండ దండిగా ఉందని చెబుతూ పెళ్లి చేసుకొమ్మని వెంట పడితే పరిణామాలు తీవ్రంగా ఉంటాయని భయ పెట్టాడు.

 Also Read: Telangana Govt : తెలంగాణ యువతకు గుడ్ న్యూస్.. ఇక ఉద్యోగాల జాతరే..

నాతో సన్నిహితంగా ఉన్నపుడు తీసుకున్న ఫోటోలను సోషల్​ మీడియాలో అప్​ లోడ్​ చేస్తానని బ్లాక్​ మెయిల్​ చేయటం ప్రారంభించాడు. కాగా, తనకు జరిగిన అన్యాయం గురించి బాధితురాలు తన ట్విట్టర్​ అకౌంట్​ అయిన తెలంగాణ పిల్ల@ టీఎస్​ పిల్లలో పరోక్షంగా పోస్టులు పెట్టింది. అయితే, ఈ ట్విట్టర్​ అకౌంట్ కు నకిలీ అకౌంట్లు సృష్టించిన శంకర్​ వాటిల్లో అసభ్యకర పదజాలంతో ఆమెను దూషిస్తూ పోస్టులు పెట్టాడు. మార్ఫింగ్​ చేసిన ఫోటోలతో బెదిరించటం ప్రారంభించాడు. దాంతో బాధితురాలు అంబర్​ పేట పోలీసులకు ఫిర్యాదు చేసింది. ఈ మేరకు పోలీసులు కేసులు నమోదు చేసి శంకర్​ ను శనివారం అరెస్ట్​ చేశారు.

స్వేచ్ఛ ఈ పేపర్ కోసం ఈ https://epaper.swetchadaily.com/ లింక్ క్లిక్ చేయగలరు