Betting Apps Case: సీన్ లోకి ఈడీ.. ఇక ఇన్ ఫ్లూయెన్సర్లకు దబిడి దిబిడేనా?

Betting Apps Case:  బెట్టింగ్ యాప్​ ల ప్రమోసన్ల కేసుల్లో నిందితులుగా ఉన్నవారు దర్యాప్తు సంస్థల నుంచి ముప్పేట దాడిని ఎదుర్కోబోతున్నారు. ఇప్పటికే రెండు కేసుల్లో లా అండ్​ ఆర్డర్​ పోలీసులు విచారణ చేస్తుండగా ఈడీ(ED) కూడా వీటిపై దర్యాప్తు చేయాలని నిర్ణయించింది. తాజాగా తెలంగాణ స్టేట్​ సైబర్ క్రైం బ్యూరో(Cyber Crime Bureau) అధికారులు కూడా ఈ కేసులపై దృష్టిని సారించారు. గడిచిన ఒక్క సంవత్సరంలోనే బెట్టింగ్​ యాప్​ లలో డబ్బు పోగొట్టుకుని 15మంది ఆత్మహత్యలు(Suicides) చేసుకున్నట్టు తెలిసిన నేపథ్యంలో చనిపోయిన వారి వివరాలను పోలీసులు(Telangana Police) సేకరిస్తున్నారు. ప్రాణాలు తీసుకున్న వారి కుటుంబ సభ్యుల నుంచి నిర్దిష్టమైన వివరాలతో ఫిర్యాదులు తీసుకోవాలని నిర్ణయించారు. దాంతోపాటు బెట్టింగ్​ యాప్​ ల బారిన పడి ఉన్నదంతా పోగొట్టుకున్న బాధితులు కూడా కంప్లయింట్లు ఇవ్వటానికి ముందుకు రావాలని అధికారులు చెబుతున్నారు. స్పష్టమైన వివరాలతో ఫిర్కాదులు అందితే మరింత పకడ్భంధీగా కేసులను విచారించవచ్చని ఓ సీనియర్​ పోలీసు అధికారి చెప్పారు. ఇప్పటికే నమోదైన కేసుల్లో కొత్త సెక్షన్లు జత అవుతాయని తెలిపారు. ఈ నేపథ్యంలో ఆయా బెట్టింగ్​ యాప్​ ల నిర్వాహకులు, వాటిని ప్రమోట్ చేసిన వారు తప్పించుకునే అవకాశాలు తగ్గుతాయని వివరించారు.

Online Gaming Gang Arrested: బెట్టింగ్ లో తొలి వికెట్.. సట్టా గ్యాంగ్ అరెస్ట్

వినయ్​ అనే వ్యక్తి ఇచ్చిన ఫిర్యాదు మేరకు పంజాగుట్ట పోలీసులు 11మంది బుల్లితెర నటులు, ఇన్​ ప్లూయెన్సర్ల(Social Media Influencers)పై కేసులు పెట్టిన విషయం తెలిసిందే. ఇప్పటికే ఈ కేసులో నలుగురిని విచారించారు కూడా. కాగా, ఫణీంద్ర శర్మ అనే వ్యాపారి ఇచ్చిన ఫిర్యాదు మేరకు మియాపూర్ పోలీసులు రెండు రోజుల క్రితం మరో కేసు నమోదు చేశారు. దీంట్లో టాలీవుడ్​ స్టార్లు రాణా దగ్గుపాటి, ప్రకాశ్​ రాజ్, విజయ్ దేవరకొండ, మంచులక్ష్మి, నిధి అగర్వాల్​, ప్రణీతతోపాటు మొత్తం 25మంది నిందితులుగా ఉన్నారు.

మనీలాండరింగ్ కోణం

ఇదిలా ఉండగా ఈ కేసులను దర్యాప్తు చేయటానికి వేర్వేరు దర్యాప్తు ఏజన్సీలు రంగంలోకి దిగుతున్నాయి. బెట్టింగ్​ యాప్​ నిర్వాహకులు మనీ లాండరింగ్(Money Laundering)​ ద్వారా డబ్బును కొల్లగొట్టారని నిర్ధారించుకున్న ఈడీ అధికారులు ఇప్పటికే పంజాగుట్ట కేసు వివరాలను తెప్పించుకుని పరిశీలిస్తున్నారు. తాజాగా మియాపూర్ స్టేషన్​ లో నమోదైన కేసులో కూడా విచారణ జరపాలని నిర్ణయించారు. తాజాగా తెలంగాణ స్టేట్​ సైబర్ సెక్యూరిటీ బ్యూరో అధికారులు కూడా బెట్టింగ్​ యాప్​ లకు సంబంధించిన కేసులపై దృష్టిని సారించారు. తెలంగాణలో ఈ యాప్​ లు నిషిద్ధమని స్పష్టం చేసిన సైబర్​ సెక్యూరిటీ అధికారులు బాధితులు ఫిర్యాదు ఇస్తే బాధ్యులపై తగు చర్యలు తీసుకుంటామని స్పష్టం చేశారు. కాగా, ఇంటర్ నెట్​ ఆధారంగా ఈ నేరాలు జరిగిన నేపథ్యంలో ఇప్పటికే నమోదైన కేసుల్లో కూడా విచారణ చేయాలని నిర్ణయించినట్టు సమాచారం.

లోతుగా దర్యాప్తు
ఇక, బెట్టింగ్​ యాప్​ ల వ్యవహారంలో నిర్దిష్టమైన వివరాలతో ఫిర్యాదులు స్వీకరించాలని పోలీసు ఉన్నతాధికారులు నిర్ణయించారు. పంజాగుట్ట, మియాపూర్​ పోలీసులకు అందిన కంప్లయింట్లలో ఫలానా ఫలానా సెలబ్రెటీలు ఫలానా ఫలానా బెట్టింగ్​ యాప్​ లను ప్రమోట్​ చేశారన్న వివరాలు మాత్రమే ఉన్నాయి. ఆయా యాప్​ లలో ఎవరైనా సర్వస్వం కోల్పోయి రోడ్డున పడ్డారా? ఎవరైనా ఆత్మహత్యలు చేసుకున్నారా? అన్న సమాచారం లేదు. దీంతో నేర నిరూపణ జరిగితే నిందితులకు కఠినమైన శిక్షలు పడే అవకాశమున్న సెక్షన్లను పోలీసులు ఎఫ్​ఐఆర్​ లలో పేర్కొనలేదు. ఇలా కాకుండా పక్కా వివరాలతో ఫిర్యాదులు తీసుకుని అంతే పకడ్భంధీగా కేసులు నమోదు చేయాలని పోలీసు ఉన్నతాధికారులు నిర్ణయించినట్టు సమాచారం.

ఒక్క ఏడాదిలోనే 15మంది…
పకడ్భందీగా కేసులు నమోదు చేస్తే తప్ప బెట్టింట్​ యాప్​ లకు కళ్లెం పడదని భావిస్తున్న అధికారులు ఆ దిశగా చర్యలు చేపట్టారు. గత ఒక్క సంవత్సరంలోనే బెట్టింగ్​ యాప్​ లలో భారీ మొత్తాల్లో డబ్బులు పోగొట్టుకుని 15మంది ఆత్మహత్యలు చేసుకున్నట్టు తెలిసిన నేపథ్యంలో చనిపోయిన వారి కుటుంబాల నుండి తాజాగా ఫిర్యాదులు తీసుకోవాలని నిర్ణయించారు. ఏ యాప్​ లో డబ్బు పోగొట్టుకున్నారు? ఎంత పోగొట్టుకున్నారు? ఆయా యాప్​ లను ప్రమోట్​ చేసింది ఎవరు? అన్న వివరాలతో కేసులు నమోదు చేయాలని నిశ్చయించారు. స్పష్టమైన వివరాలు ఉండే పకడ్భంధీగా కేసులు పెట్టటంతోపాటు అంతే పకడ్భంధీగా విచారణ జరిపి కోర్టులకు ఛార్జీషీట్లు సమర్పించే అవకాశం ఉంటుందని పోలీస్ వర్గాలు తెలిపాయి.