Desk Journalists: అక్రిడిటేషన్​ కార్డుల జీవో 52 ను సవరించాలని.. టీజేఎఫ్​టీ డిమాండ్..!

Desk Journalists: వర్కింగ్​ జర్నలిస్టుల్లో విభజనను తీసుకొచ్చే నిర్ణయాన్ని వెనక్కి తీసుకోవాలని డెస్క్​ జర్నలిస్ట్స్ ఫెడరేషన్​ ఆఫ్ తెలంగాణ(Desk Journalists Federation of Telangana)(టీజేఎఫ్​టీ) రాష్ట్ర ప్రభుత్వాన్ని కోరింది. అక్రిడిటేషన్ కార్డుల విషయంలో డెస్క్​ జర్నలిస్టులు, రిపోర్టర్లును వేరు చేసేలా ప్రభుత్వం విధానపర నిర్ణయం తీసుకోవడం సహేతుకం కాదని పేర్కొంది. అక్రిడిటేషన్ పాలసీకి సంబంధించి ప్రభుత్వం జారీ చేసిన జీవో 252ను సవరించాలని ప్రభుత్వానికి టీజేఎఫ్టీ విజ్ఞప్తి చేసింది. డెస్కు జర్నలిస్టులకు బస్ పాసుల విషయమై ఐ అండ్ పీఆర్ అధికారులు స్పష్టత ఇవ్వాలని డిమాండ్ చేసింది. చిక్కడపల్లిలోని త్యాగరాయ గానసభలో వివిధ పత్రికలు, ఛానళ్లలో పనిచేస్తున్న డెస్క్ జర్నలిస్టుల సమావేశం బుధవారం జరిగింది. ఈ సందర్భంగా డెస్క్​ జర్నలిస్ట్స్ ఫెడరేషన్​ ఆఫ్ తెలంగాణ(డీజేఎఫ్ టీ) కొత్తగా ఏర్పాటైంది.

కొత్త కార్యవర్గాన్ని ఎన్నుకోవడం

డీజేఎఫ్ టీ రాష్ట్ర రాష్ట్ర అధ్యక్షుడిగా బాదిని ఉపేందర్​, ప్రధాన కార్యదర్శిగా మస్తాన్ ఏకగ్రీవంగా ఎన్నికయ్యారు. ట్రెజరర్ గా నిస్సార్, ఉపాధ్యక్షుడిగా కేవీ రాజారామ్, జాయింట్ సెక్రెటరీగా విజయ తదితరులు ఎన్నికయ్యారు. కొత్త కార్యవర్గాన్ని ఎన్నుకోవడంతో పాటు, డెస్క్​ జర్నలిస్టుల సమస్యలపై పలు తీర్మానాలు చేశారు. ఈ సందర్భంగా నేతలు మాట్లాడుతూ.. రిపోర్టర్, డెస్క్​ జర్నలిస్టులిద్దరూ వర్కింగ్ జర్నలిస్టు కిందికే వస్తారని, అలాంటిది వారిని విభజించడం సరికాదన్నారు. ఒకరు ఎక్కువ, ఇంకొకరు తక్కువ అనే వివక్ష చూపించేలా అధికారులు వ్యవహరించడమేంటని ప్రశ్నించారు. డెస్క్​ జర్నలిస్టులకు అక్రిడిటేషన్​ కార్డులు ఇవ్వబోమని, మీడియాలో కార్డుల పేరిట కొత్తగా కార్డులు జారీ చేస్తామని చెప్పడం సరికాదన్నారు. ఇది డెస్క్​ జర్నలిస్టులను సెకండ్​ గ్రేడ్​ కి నెట్టడమే తప్పా ఇంకోటి కాదని ఆవేదన వ్యక్తం చేశారు.

అందుతున్న సంక్షేమ పథకాలు

వృత్తి ధర్మాన్ని కాపాడేందుకు ఆరోగ్యాన్ని పణంగా పెడుతున్న డెస్క్ జర్నలిస్టులకు జీవో 252 శరాఘాతం లాంటిదేనన్నారు. పోరాడి సాధించుకున్న అక్రిడిటేషన్​ హక్కును గుంజుకోవడమేనని వారు వ్యాఖ్యానించారు. ప్రస్తుతం అందుతున్న సంక్షేమ పథకాలు, భవిష్యత్తులో ప్రభుత్వం ఇవ్వాలనుకుంటున్న ఇండ్ల స్థలాల కేటాయింపు విషయంలో స్క్రీనింగ్​ చేసేందుకే ఈ విభజన అనే అనుమానం అందరిలో ఉందని పేర్కొన్నారు. అక్రిడిటేషన్​ కార్డులు, మీడియా కార్డులకు ఒకే రకమైన సంక్షేమ పథకాలు ఉంటాయని అధికారులు చెబుతున్నారని, అలాంటప్పుడు రెండు కార్డులు తీసుకురావడం ఎందుకని వారు ప్రశ్నించారు. గతంలో ఇచ్చినట్టు వర్కింగ్​ జర్నలిస్టులు అందరికీ అక్రిడిటేషన్ కార్డులను ఇవ్వాలని డిమాండ్ చేశారు. ఈ సమావేశంలో హెచ్ ​యూజే అధ్యక్ష, కార్యదర్శులు అరుణ్​ కుమార్, జగదీశ్, టీడబ్ల్యూజేఎఫ్​ ఉపాధ్యక్షుడు రాజశేఖర్, రాష్ట్ర కార్యదర్శి నవీన్, డబ్ల్యూఐజే రాష్ట్ర సెక్రటరీ రావికంటి శ్రీనివాస్​, పలువురు సీనియర్ రిపోర్టర్లు పాల్గొని మద్దుతు ప్రకటించారు.

ఆమోదించిన తీర్మానాలివే..

= డెస్క్​ జర్నలిస్టులకూ అక్రెడిటేషన్​ కార్డులు ఇవ్వాలి.
= డెస్క్​ జర్నలిస్టులను అవమానించేలా, వర్కింగ్ జర్నలిస్టులను వేరు చేసేలా ఉన్న జీవో నెంబర్ 252 ను సవరించాలి.
= అక్రిడిటేషన్​ కమిటీల్లో డెస్క్​ జర్నలిస్టులకు ప్రాతినిధ్యం కల్పించాలి.
= రాష్ట్రంలో ఐ అండ్ పీఆర్​ కమిషనర్ ను, జిల్లాల్లో కలెక్టర్లను కలిసి డెస్క్​ జర్నలిస్టులు వినతిపత్రాలు అందించాలి.
= హైదరాబాద్​ తో పాటు జిల్లా కేంద్రాల్లో మంత్రులు, ప్రజాప్రతినిధులను కలిసి వినతిపత్రాలు అందజేయాలి.
= రాష్ట్రంలో పనిచేస్తున్న డెస్క్​ జర్నలిస్టులందరినీ సంఘటితం చేస్తూ, డెస్క్​ జర్నలిస్టుల సంఘాన్ని పటిష్టం చేయాలి.
= హక్కుల సాధనలో కలిసి వచ్చే రిపోర్టర్లు, పాత్రికేయ సంఘాలు, సంఘాల నేతలను కలుపుకుని వెళ్లాలి.