Shiva Jyothi Controversy: క్షమాపణలు చెప్పిన యాంకర్ శివ జ్యోతి..

Shiva Jyothi Controversy: ప్రముఖ యాంకర్ శివజ్యోతి ఇటీవల తిరుమల శ్రీవారి దర్శనం సందర్భంగా చేసిన కొన్ని వ్యాఖ్యలు తీవ్ర వివాదాన్ని రాజేసి, చివరికి ఆమె క్షమాపణలు చెప్పే వరకు దారితీశాయి. సోషల్ మీడియాలో ‘తీన్మార్ సావిత్రి’గా, ఆ తర్వాత బిగ్ బాస్ ద్వారా ప్రేక్షకులకు చేరువైన శివజ్యోతి.. తన వ్యాఖ్యల కారణంగా శ్రీవారి భక్తుల ఆగ్రహానికి గురయ్యారు. శివజ్యోతి ఇటీవలే తిరుమల శ్రీవారి దర్శనానికి వెళ్లారు. అక్కడ క్యూ లైన్‌లో నిలబడి ఉన్నప్పుడు, టీటీడీ సిబ్బంది భక్తులకు అన్నప్రసాదాన్ని పంపిణీ చేశారు. ఈ సందర్భంగా, ఆమె తన స్నేహితులతో కలిసి చేసిన సంభాషణను వీడియో తీసి సోషల్ మీడియాలో పోస్ట్ చేశారు. ఆ వీడియోలో వారు, “తిరుమలలో కాస్ట్లీ ప్రసాదం అడుక్కుంటున్నాం,” “రిచెస్ట్ బిచ్చగాళ్లం మేమే” అంటూ వ్యాఖ్యానించారు.

పవిత్రమైన శ్రీవారి ప్రసాదం గురించి, దైవ దర్శనం గురించి ఇలా అగౌరవంగా మాట్లాడటంపై భక్తులు, హిందూ సంఘాలు తీవ్ర అభ్యంతరం వ్యక్తం చేశాయి. ప్రసాదాన్ని ‘అడుక్కోవడం’, భక్తులను ‘బిచ్చగాళ్లు’ అని పోల్చడం.. తిరుమల పవిత్రతను అవమానించడమేనని నెటిజన్లు, భక్తులు తీవ్రంగా మండిపడ్డారు. సెలబ్రిటీ హోదాలో ఉన్నవారు మతపరమైన ప్రదేశాలలో మరింత బాధ్యతాయుతంగా వ్యవహరించాలని డిమాండ్ చేశారు.

శివజ్యోతి వివరణ

పరిస్థితి ఉద్రిక్తతకు దారితీయడంతో, యాంకర్ శివజ్యోతి ఆలస్యం చేయకుండా సోషల్ మీడియాలో ఒక వీడియోను విడుదల చేసి తన వ్యాఖ్యలపై వివరణ ఇచ్చారు. తన మాటల వల్ల ఎవరి మనోభావాలు దెబ్బతిన్నా హృదయపూర్వక క్షమాపణలు కోరుతున్నట్లు తెలిపారు. ఆమె మాట్లాడుతూ, “తిరుమల ప్రసాదం గురించి నేను ఉపయోగించిన పదాలు చాలా మందికి తప్పుగా అనిపించాయి. నేను ‘రిచ్’ అని అన్నది కేవలం రూ.10,000 క్యూ లైన్‌లో నిలబడ్డామనే ఉద్దేశంతో. నా ఉద్దేశం తప్పు కాదు. కానీ, ఆ మాటలు తప్పుగా ఉన్నాయి. వెంకటేశ్వర స్వామిపై నాకు ఎంత భక్తి ఉందో నన్ను ఫాలో అయ్యే వారికి తెలుసు. నా బిడ్డ కూడా స్వామి ప్రసాదంగానే భావిస్తాను. అలాంటి నేను స్వామి గురించి తప్పుగా ఎలా మాట్లాడతాను?” అని భావోద్వేగానికి గురయ్యారు. “కేసులు పెడతారనే భయంతో కాదు, నాకు కూడా ఆ మాటలు మాట్లాడకుండా ఉండాల్సింది అనిపించింది. అందుకే క్షమాపణలు చెబుతున్నాను. టీటీడీ సభ్యులు, భక్తులు, నా మాటల వల్ల బాధపడిన ప్రతి ఒక్కరూ నా సారీని యాక్సెప్ట్ చేయండి. ఇంకోసారి ఇలాంటి తప్పు నా నోటి నుంచి రాదు” అని హామీ ఇచ్చారు. యాంకర్ శివజ్యోతి వెంటనే స్పందించి క్షమాపణలు చెప్పడం కొంతవరకు వివాదాన్ని చల్లార్చింది. అయినప్పటికీ, ప్రముఖులు మతపరమైన అంశాలపై, ప్రదేశాలలో మాట్లాడేటప్పుడు మరింత విచక్షణతో ఉండాలనే సందేశాన్ని ఈ సంఘటన మరోసారి నొక్కి చెప్పింది.