Global Peace: బాలీవుడ్ నటుడు రణ్వీర్ సింగ్ ప్రతిష్ఠాత్మక ‘గ్లోబల్ పీస్ హానర్స్ 2025’ (Global Peace Honours 2025) వేడుకలో ముఖ్య అతిథిగా పాల్గొని, దేశం కోసం తమ ప్రాణాలను త్యాగం చేసిన వీరులకు మరియు ఉగ్రవాద దాడుల బాధితులకు హృదయపూర్వక నివాళులు అర్పించారు. ముంబైలోని గేట్వే ఆఫ్ ఇండియా వద్ద జరిగిన ఈ కార్యక్రమంలో రణ్వీర్ సింగ్తో పాటు రిలయన్స్ ఫౌండేషన్ వ్యవస్థాపకురాలు నీతా అంబానీ, ప్రముఖ నటులు షారుఖ్ ఖాన్, సునీల్ శెట్టి, కరిష్మా కపూర్, మనీషా కోయిరాలా వంటి అనేకమంది సినీ ప్రముఖులు పాల్గొన్నారు.
అమరవీరులకు నివాళి
ఈ సందర్భంగా రణ్వీర్ సింగ్, 26/11 ముంబై దాడులు, జమ్మూ కాశ్మీర్లోని పహల్గాం దాడులు, మరియు ఇటీవల ఢిల్లీలో జరిగిన కార్ బాంబు పేలుళ్లలో ప్రాణాలు కోల్పోయిన అమాయక పౌరులను, అలాగే దేశం కోసం పోరాడిన భద్రతా దళాల సైనికులను స్మరించుకున్నారు. వారి అచంచలమైన ధైర్యసాహసాలు దేశభక్తికి ఆయన ప్రత్యేకంగా అభినందనలు తెలిపారు. ముఖ్యంగా, 26/11 దాడులలో వీరోచితంగా పోరాడిన డాక్టర్ సదానంద్ డేట్ (Shri Sadanand Date)ని రణ్వీర్ సింగ్ వేదికపైకి ఆహ్వానిస్తూ చేసిన ప్రసంగం అందరినీ కదిలించింది.
“డాక్టర్ సదానంద్ డేట్ గారు తన జీవితంలో 35 సంవత్సరాలను దేశ సేవకే అంకితం చేశారు. 26/11 దాడుల అనంతరం క్యూఆర్టీలు (Quick Response Teams), ఏటీసీలు (Anti-Terrorism Cells) వంటి కీలకమైన భద్రతా వ్యవస్థల ఏర్పాటులో ఆయన విశేషమైన పాత్ర పోషించారు,” అని రణ్వీర్ సింగ్ కొనియాడారు. క్రైమ్ బ్రాంచ్, ఫోర్స్ వన్, ఎన్ఐఏ వంటి అత్యున్నత సంస్థలలో ఆయన తన బాధ్యతలను పూర్తి నిబద్ధతతో నిర్వర్తించారని తెలిపారు. పుణేలో జన్మించిన డాక్టర్ డేట్ కామర్స్లో మాస్టర్స్ మరియు ఆర్థిక నేరాల పర్యవేక్షణపై పీహెచ్డీని కలిగి ఉన్నారని గుర్తుచేశారు. డాక్టర్ సదానంద్ డేట్ గారు 26/11 దాడుల సమయంలో తీవ్రంగా గాయపడినప్పటికీ, ఉగ్రవాదులు అజ్మల్ కసబ్ అబూ ఇస్మాయిల్లను ఎదుర్కొన్న తొలి ప్రతిస్పందన అధికారులలో ఒకరు.
Read also-VrushaKarma Movie: నాగచైతన్య ‘NC24’ టైటిల్ వచ్చేసింది.. ఏం పవర్ ఉంది గురూ టైటిల్..
షారుఖ్ ఖాన్ సందేశం
ఈ వేడుకలో షారుఖ్ ఖాన్ కూడా వీడియో సందేశం ద్వారా తన నివాళులు అర్పించారు. “26/11 దాడులు, పహల్గాం దాడులు ఢిల్లీ పేలుళ్లలో ప్రాణాలు కోల్పోయిన అమాయక ప్రజలకు నా వందనాలు. ఈ దాడులలో వీరమరణం పొందిన మన ధైర్యవంతులైన భద్రతా సిబ్బందికి నా శిరస్సు వంచి వందనాలు,” అని ఆయన ప్రకటించారు. ఈ ‘గ్లోబల్ పీస్ హానర్స్ 2025’ కార్యక్రమం దేశంలో శాంతి, ధైర్యం, త్యాగాల స్ఫూర్తిని ప్రపంచానికి మరోసారి బలంగా చాటి చెప్పింది.
