Mokshagna Teja: నందమూరి నట వారసుడు మోక్షజ్ఞ తేజ (Mokshagna Teja Nandamuri) సినీ రంగ ప్రవేశానికి సంబంధించిన వార్త మళ్లీ టాలీవుడ్‌లో హాట్ టాపిక్‌గా మారింది. కొన్నేళ్లుగా వాయిదాల మీద వాయిదాలు పడుతూ, అనేక మంది దర్శకుల పేర్లు వినిపిస్తూ వస్తున్న ఈ డెబ్యూ ప్రాజెక్ట్, తాజాగా ‘మన శంకరవరప్రసాద్ గారు’ ఫేమ్ అనిల్ రావిపూడి (Anil Ravipudi) చేతికి చేరినట్లుగా టాలీవుడ్ సర్కిల్స్‌లో వార్తలు వైరల్ అవుతున్నాయి. దీంతో మరోసారి మోక్షజ్ఞ పేరు టాలీవుడ్, నందమూరి సర్కిల్స్‌‌లో హాట్ టాపిక్‌గా మారింది.

Also Read- NBK111: చరిత్ర సృష్టించేవాడు ఒక్కడే.. ‘NBK111’ లాంచ్‌లో బాలయ్య చెప్పిన పవర్ ఫుల్ డైలాగ్ ఇదే!

మొదటినుండి.. మళ్లీ మొదలు

నందమూరి అభిమానులు ఎప్పుడెప్పుడా అని ఎదురుచూస్తున్న మోక్షజ్ఞ సినీ ఎంట్రీకి సంబంధించి గతంలో అనేక కథనాలు వినిపించాయి. మొదట ‘హనుమాన్’ దర్శకుడు ప్రశాంత్ వర్మ పేరు ప్రముఖంగా వినిపించింది. బాలకృష్ణ సైతం ప్రశాంత్ వర్మ దర్శకత్వంలోనే మోక్షజ్ఞ తేజను పరిచయం చేస్తామని ప్రకటించారు. కానీ, ఆ ప్రాజెక్ట్‌పై మరింత స్పష్టత కొరవడడం, ఆలస్యం కావడం వంటి కారణాల వల్ల అది తాత్కాలికంగా ఆగిపోయిందనే ఊహాగానాలు వినిపించాయి. కొంతమంది మాత్రం ఆ సినిమా ఆగిపోలేదని, కేవలం వాయిదా పడిందని అనుకుంటూ ఉండటం విశేషం. ఆ తర్వాత, బాలకృష్ణ (Nandamuri Balakrishna) నటించి, దర్శకత్వం వహించిన క్లాసిక్ చిత్రం ‘ఆదిత్య 369’ సీక్వెల్ ‘ఆదిత్య 999’ (Aditya 999) పేరుతో బాలయ్యే స్వయంగా మోక్షజ్ఞను డైరెక్ట్ చేస్తారని ప్రచారం జరిగింది. అది కూడా ఒక కొలిక్కి రాకపోవడంతో, దర్శకత్వ బాధ్యతలను క్రిష్ జాగర్లమూడికి అప్పగించారని వార్తలు వచ్చాయి. క్రిష్ దర్శకత్వంలో త్వరలోనే మోక్షజ్ఞ ఎంట్రీ ఉంటుందని అభిమానులు ఆశగా ఎదురుచూస్తున్న తరుణంలో, తాజాగా క్రిష్ కూడా ఈ ప్రాజెక్ట్ నుండి తప్పుకున్నారని మరొక వార్త టాలీవుడ్ సర్కిల్స్‌లో వైరల్ అవుతోంది.

Also Read- Shobha Shetty VS Divya: ‘చిక్కులు, దిక్కులు, లెక్కలు’ టాస్క్ విజేత ఎవరు? యోధురాలిని దివ్య ఓడించిందా?

అనిల్ రావిపూడికే బాధ్యత

ఈ నేపథ్యంలో, నందమూరి అభిమానులకు కొత్త ఉత్సాహాన్ని ఇచ్చేలా, మోక్షజ్ఞ లాంచింగ్ బాధ్యతను బాలకృష్ణ, దర్శకుడు అనిల్ రావిపూడికి అప్పగించినట్లుగా తాజా సమాచారం. అనిల్ రావిపూడి ప్రస్తుతం తన తదుపరి చిత్రం పూర్తయిన వెంటనే మోక్షజ్ఞకు సరిపోయే సబ్జెక్ట్‌పై దృష్టి సారిస్తానని బాలయ్యకు మాటిచ్చినట్లుగా విశ్వసనీయ వర్గాల ద్వారా తెలుస్తోంది. ‘భగవంత్ కేసరి’ వంటి బ్లాక్‌బస్టర్ ఇచ్చిన అనిల్ రావిపూడి-బాలకృష్ణ కాంబోపై నందమూరి అభిమానులకు అపారమైన నమ్మకం ఉంది. మోక్షజ్ఞ ఎంట్రీకి అనిల్ రావిపూడి సరైన దర్శకుడని, ఎందుకంటే ఆయన మాస్ ఎలిమెంట్స్‌తో పాటు చక్కటి ఎంటర్‌టైన్‌మెంట్, ఫ్యామిలీ సెంటిమెంట్ పండించడంలో దిట్ట అని ఫ్యాన్స్ అభిప్రాయపడుతున్నారు. ఇదిలా ఉంటే, అనేక మంది దర్శకుల పేర్లు తెరపైకి వచ్చి మరుగున పడిపోవడంతో, ఈసారి అనిల్ రావిపూడి పేరైనా ఫైనల్ అవుతుందా లేదా మళ్లీ ఇంకో డైరెక్టర్ పేరు రేసులోకి వస్తాడా? అనేది ప్రస్తుతానికి సస్పెన్సే. బాలకృష్ణ ఎప్పుడు అధికారికంగా ప్రకటన చేస్తారనే దానిపైనే మోక్షజ్ఞ సినీ ప్రవేశం ఆధారపడి ఉంది.

స్వేచ్ఛ ఈ – పేపర్ కోసం https://epaper.swetchadaily.com/ ఈ లింక్ క్లిక్ చేయగలరు