Rajinikanth: కమల్‌హాసన్ భావోద్వేగ పోస్ట్.. ఎందుకంటే?

Rajinikanth: సినిమా లోకంలో సూపర్‌స్టార్ రజనీకాంత్ ఒక ఐకాన్. 1975లో కె. బాలచందర్ దర్శకత్వంలో వచ్చిన అపూర్వ రాగంగల్ సినిమాతో తన సినీ ప్రస్థానాన్ని ప్రారంభించిన రజనీకాంత్ తన 50 ఏళ్ల సినీ జీవితాన్ని సువర్ణోత్సవంగా జరుపుకుంటున్నారు. ఈ సందర్భంగా నటుడు, రాజకీయ నాయకుడు కమల్ హాసన్ హృదయపూర్వక శుభాకాంక్షలు తెలియజేస్తూ ట్విట్టర్‌లో ఒక భావోద్వేగ సందేశాన్ని పంచుకున్నారు. ఈ సందేశం రజనీకాంత్‌తో ఆయనకున్న దశాబ్దాల స్నేహాన్ని, ఆయన సినీ సామ్రాజ్యాన్ని గౌరవించే విధంగా ఉంది.

కమల్‌హాసన్ ట్వీట్
కమల్ హాసన్ రజనీకాంత్ (Rajinikanth)పై ఉన్న ప్రేమను తెలియజేస్తూ. “నా ప్రియమైన స్నేహితుడు రజనీకాంత్ ఈ రోజు తన 50 ఏళ్ల సినీ ప్రస్థానాన్ని జరుపుకుంటున్నారు. ఆయనకు నా శుభాకాంక్షలు. ఇలాంటి సందర్భం చాలా కొద్ది మందికి మాత్రమే వస్తుంది. అలాంటి సమయంలో ‘కూలీ’ సినిమా విడుదలవుతోంది. ఈ సినిమా అద్భుత విజయం సాధించాలని కోరుకుంటున్నాను.” అని కమల్ రాసుకొచ్చారు. ఈ సందేశంతో పాటు, రజనీకాంత్‌తో కలిసి ఉన్న కొన్ని చిత్రాలను కూడా షేర్ చేశారు. ప్రస్తుతం ఈ ఫోటోలు వైరల్ అవుతున్నాయి.

Read also- War 2 Movie: ‘వార్ 2’ విడుదల వేళ హృతిక్, ఎన్టీఆర్ రిక్వెస్ట్

రజనీకాంత్ స్వర్ణోత్సవ సినిమా
రజనీకాంత్ తన 50 ఏళ్ల సినీ ప్రస్థానాన్ని జరుపుకుంటున్న సమయంలో, ఆయన నటిస్తున్న కూలీ సినిమా ఆగస్టు 14, 2025న ప్రపంచవ్యాప్తంగా గ్రాండ్‌గా విడుదల కానుంది. ఈ చిత్రాన్ని యువ దర్శకుడు లోకేష్ కనగరాజ్ తెరకెక్కించారు, సన్ పిక్చర్స్ బ్యానర్‌పై కలానిధి మారన్ నిర్మించారు. ఈ సినిమాలో రజనీకాంత్‌తో పాటు నాగార్జున అక్కినేని, ఆమిర్ ఖాన్, ఉపేంద్ర, సత్యరాజ్, సౌబిన్ షాహిర్, శృతి హాసన్ వంటి తారాగణం నటిస్తోంది. సంగీత దర్శకుడు అనిరుద్ రవిచందర్ ఈ చిత్రానికి సంగీతాన్ని అందించారు, ఇది ఇప్పటికే ప్రేక్షకుల్లో భారీ అంచనాలను పెంచేలా చేసింది.

పరిశ్రమ నుండి ప్రశంసలు
కమల్ హాసన్‌తో పాటు, మమ్ముట్టి, అనిరుద్ రవిచందర్, లోకేష్ కనగరాజ్, ఉదయనిధి స్టాలిన్ వంటి పలువురు ప్రముఖులు రజనీకాంత్‌కు శుభాకాంక్షలు తెలియజేశారు. మమ్ముట్టి తన ట్వీట్‌లో, “రజనీకాంత్‌తో స్క్రీన్ షేర్ చేసుకోవడం గౌరవంగా భావిస్తున్నాను.” అని రాశారు. అనిరుద్, “50 ఏళ్లు.. ఒక సింహాసనం.. ఒక వ్యక్తి” అని రజనీకాంత్‌ను కీర్తించారు. మోహన్ లాల్ ‘యాభై సంవత్సరాల చరిష్మా, అంకితభావం, ఆ మాయాజాలం రజనీకాంత్ కే సొంతం’ అంటూ రాసుకొచ్చారు. వీళ్లే కాకుండా శివకార్తికేయన్ తదితరులు రజనీకాంత్ చరిష్మాను కొనియాడారు.

Read also- Mothevari Love Story: ‘మోతెవరి లవ్ స్టోరీ’ రివ్యూ..

రజనీకాంత్ 50 ఏళ్ల సినీ జీవితం
రజనీకాంత్ తన 50 ఏళ్ల సినీ జీవితంలో 170కి పైగా సినిమాల్లో నటించారు. తమిళం, హిందీ, తెలుగు, కన్నడ వంటి భాషల్లో ఆయన నటన ప్రేక్షకులను ఆకట్టుకుంది. బాషా, శివాజీ, రోబో, కబాలి, జైలర్ వంటి బ్లాక్‌బస్టర్ చిత్రాలతో ఆయన తమిళ సినిమా రంగంలో అజేయమైన స్థానాన్ని సంపాదించారు. ఆయన యూనిక్ స్టైల్, డైలాగ్ డెలివరీ, స్క్రీన్ ప్రెజెన్స్ ప్రపంచవ్యాప్తంగా అభిమానులను సంపాదించాయి.