Dil Raju: నితిన్‌ను అల్లు అర్జున్‌తో పోల్చానని.. నెగిటివ్‌గా చూడొద్దు

Dil Raju: ‘సంక్రాంతికి వస్తున్నాం’ వంటి బ్లాక్ బస్టర్ హిట్ తర్వాత శ్రీ వెంకటేశ్వర క్రియేషన్స్ (SVC) నిర్మాణంలో రూపుదిద్దుకున్న చిత్రం ‘తమ్ముడు’ (Thammudu). నితిన్ హీరోగా దిల్ రాజు, శిరీష్ నిర్మిస్తున్న ఈ చిత్రానికి శ్రీరామ్ వేణు (Sriram Venu) దర్శకత్వం వహిస్తున్నారు. లయ, వర్ష బొల్లమ్మ, సప్తమి గౌడ కీలక పాత్రలు పోషిస్తున్న ఈ చిత్రం జూలై 4న వరల్డ్ వైడ్‌గా గ్రాండ్ థియేట్రికల్ రిలీజ్‌కు సిద్ధమైంది. ఈ నేపథ్యంలో మూవీ హైలైట్స్‌ను బుధవారం మీడియాకు తెలియజేశారు నిర్మాత దిల్ రాజు. ఆయన మాట్లాడుతూ.. (Dil Raju Interview)

‘‘దర్శకుడు శ్రీరామ్ వేణు మా సంస్థలో ఆర్య నుంచి వర్క్ చేస్తున్నారు. అసిస్టెంట్ డైరెక్టర్‌గా, అసోసియేట్ డైరెక్టర్‌గా, స్క్రిప్ట్ రైటర్‌గా మాతోనే చాలా కాలంగా ట్రావెల్ చేస్తున్నారు. శ్రీరామ్ వేణు మా దగ్గరనే ఉన్నాడంటే అందుకు మా మధ్య ఉన్న రిలేషన్, వేల్ లెంగ్తే కారణం. వాస్తవానికి ఇండస్ట్రీలో డబ్బుతోనే అన్ని పనులు జరుగుతుంటాయి. నాది మాత్రం భిన్నమైన పద్ధతి. నేను వేవ్ లెంగ్త్ కలిసిన వాళ్లతోనే ప్రయాణం చేస్తుంటాను. అనిల్ రావిపూడి, శ్రీకాంత్ అడ్డాల, హరీశ్ శంకర్, వంశీ పైడిపల్లి, దశరథ్.. ఇలా ఎంతో మంది డైరెక్టర్స్ మా సంస్థలో వర్క్ చేసి హిట్ సినిమాలిచ్చారు. శ్రీరామ్ వేణు మా సంస్థలోనే ట్రావెల్ అవుతున్నాడంటే అతనికి భారీగా డబ్బు ఇవ్వడం వల్ల కాదు.. మాతో ఆయనకు ఒక కంఫర్ట్ ఉంటుంది. అనిల్ రావిపూడితో నాకొక బాండింగ్ ఉంది.. ఆ బాండింగ్‌లో ఒక కంఫర్ట్ ఉంటుంది. ఈ డైరెక్టర్స్ టాలెంట్ నాకు తెలుసు. కాబట్టి కథ టైమ్‌లో, ఎడిటింగ్ టేబుల్ దగ్గర నాకు అనిపించినవి అడుగుతాను. నేను క్వశ్చన్ అడిగితే ఎందుకు అడిగారో..? అని ఆలోచిస్తారు. అంతే గానీ వారి పనిలో నేను ఇంటర్ ఫియర్ కాను.

Also Read- Niharika Konidela: నిహారిక కొణిదెల నిర్మించే రెండో సినిమాకు క్లాప్.. వివరాలివే!

‘తమ్ముడు’ మూవీ మొదటి 20 నిమిషాల తర్వాత మిగిలిన కథంతా ఒక్కరోజులోనే జరుగుతుంది. ఐదారు యాక్షన్ ఎపిసోడ్స్ ఇందులో ఉంటాయి. వాటిలో రెండు యాక్షన్ ఎపిసోడ్స్ వైలెంట్‌గా ఉన్నాయని సినిమాకు సెన్సార్ వారు ‘ఏ’ సర్టిఫికెట్ ఇస్తామన్నారు. ఆ రెండు ఎపిసోడ్స్ తీసేస్తే ‘యు బై ఏ’ ఇస్తామని చెప్పారు. ఈ సినిమాను థియేటర్ ఎక్స్‌పీరియన్స్ కోసమే చేశాం కాబట్టి.. ఆ ఫైట్ సీక్వెన్స్ తీసేయకుండా ‘ఏ’ సర్టిఫికెట్‌కు అంగీకరించాం. ఇది ‘సంక్రాంతికి వస్తున్నాం’ వంటి ఎంటర్‌టైనర్ అయితే ఫ్యామిలీ ఆడియెన్స్ అందరూ రండి అని చెబుతాం. ‘తమ్ముడు’ మూవీ యాక్షన్ ఓరియెంటెడ్ చిత్రం. థియేటర్స్‌కు వచ్చిన వాళ్లనైనా సంతృప్తి పరచాలి కదా అని ‘ఏ’ సర్టిఫికెట్ తీసుకున్నాం. ఈ చిత్రాన్ని 150 రోజులు చిత్రీకరించారు. 80 శాతం మూవీ అడవిలో ఉంటుంది. విజువల్స్, సౌండింగ్ హై క్వాలిటీతో ఉంటూ థియేటర్‌లో ఎంజాయ్ చేసేలా దర్శకుడు వేణు ఈ సినిమాను రూపొందించారు.

సినిమా పైరసీని అరికట్టేందుకు ఇండస్ట్రీ నుంచి గట్టి చర్యలు తీసుకుంటున్నాం. ఈ విషయంలో కేంద్ర ప్రభుత్వం కూడా సపోర్ట్ చేస్తోంది. థియేటర్స్‌లో కూర్చుని సినిమా రికార్డ్ చేస్తున్న నలుగురిని ఈ మధ్య పోలీసులు అరెస్ట్ చేశారు. ఇలా రికార్డ్ చేసిన సినిమాలలో.. చిన్న సినిమాకు 400 డాలర్స్, పెద్ద సినిమాకు వెయ్యి డాలర్స్ చొప్పున అమ్ముతున్నారు. వాళ్లకు అదే పెద్ద అమౌంట్ కానీ, నిర్మాతలు కోట్ల రూపాయలు నష్టపోతున్నారని తెలుసుకోలేక పోతున్నారు. పైరసీని అరికట్టే చర్యలు క్రమంగా కట్టుదిట్టం అవుతాయని మేమంతా ఆశిస్తున్నాం. ‘తమ్ముడు’ సినిమాకు ప్రీమియర్స్ వేసే విషయంలో ప్రస్తుతం ఆలోచిస్తున్నాం. ఎందుకంటే ప్రీమియర్స్ కోసం ప్రభుత్వం నుంచి అనుమతి తీసుకోవాలి. నేను ఎఫ్‌డీసీ ఛైర్మన్ హోదాలో ఉన్నాను కాబట్టి.. అన్నీ చూసుకుని చేయాలి. తమ్ముడు మూవీని నెట్ ఫ్లిక్స్ వాళ్లు చూశారు.. వాళ్లకు నచ్చి వెంటనే తీసుకున్నారు.

Also Read- Savita Pradhan: 16 ఏళ్లకే పెళ్లి.. అత్తింటి వేధింపులు.. కట్ చేస్తే గొప్ప ఐఏఎస్ ఆఫీసర్..!

పైరసీ అయినా, నెగిటివ్ ప్రచారమైనా క్రమక్రమంగా ఒక్కో స్టెప్‌తో ఎదుర్కొంటూ వెళ్లాల్సిందే. ఎవరైనా రివ్యూస్ రాసేప్పుడు ఒక్క నిమిషం నిర్మాత గురించి ఆలోచించాలని కోరుకుంటున్నాను. హీరో, డైరెక్టర్‌కు కూడా ఎఫెక్టే. కానీ ఎక్కువగా నష్టపోయేది మాత్రం నిర్మాతే. నేను వీటిపై గట్టిగా మాట్లాడితే దిల్ రాజు యాటిట్యూడ్ చూపిస్తున్నాడని అంటారు. ఇటీవల నితిన్‌తో చేసిన ఇంటర్వ్యూలో.. తన గుడ్ బ్యాడ్ ఏంటో చెప్పండి అని అడిగితే.. నేను అల్లు అర్జున్ కంటే నువ్వు ముందు కెరీర్ స్టార్ట్ చేశావ్, ఆయన రేంజ్‌కు వెళ్లలేకపోయావ్ అని.. ఒక వెల్ విషర్‌గా అన్నాను. మా మధ్య ఉన్న రిలేషన్‌తోనే అలా చెప్పాను. దయచేసి దాన్ని నెగిటివ్‌గా చూడొద్దు. ‘తమ్ముడు’ కథగా చూస్తే ఇది సింపుల్ స్టోరీ. అక్కా తమ్ముడి మధ్య ఓ సమస్య రావడం, ఆ సమస్యను సాల్వ్ చేసుకోవడానికి ఎలాంటి ప్రయత్నం చేశారు అనేదే ఈ మూవీ మెయిన్ కాన్సెప్ట్. ఈ కథను స్క్రీన్ ప్లే పరంగా కొత్తగా చూపిస్తూ, యాక్షన్ సీక్వెన్స్‌తో వెళ్తూ ఆసక్తికరంగా వేణు మలిచారు. ప్రతి విషయంలో దర్శకుడికి ఫుల్ ఫ్రీడమ్ ఇచ్చాం. శుక్రవారం మార్నింగ్ షో చూసిన అందరికీ మా సినిమా నచ్చితే సూపర్ హిట్ దక్కినట్లే. ‘సంక్రాంతికి వస్తున్నాం’ సినిమాకు డైరెక్టర్ అనిల్ బాగా ప్లాన్ చేసి ప్రేక్షకులకు మూవీ రీచ్ అయ్యేలా చేశాడు. ఆ సినిమా మేము అనుకున్నదానికంటే ఎక్కువ సక్సెస్ అయ్యింది. తమ్ముడు రిజల్ట్ మీద కాన్ఫిడెంట్‌గా ఉన్నాం.. అయితే ఎంత రేంజ్ హిట్ అవుతుందనేది మాత్రం రిలీజ్ రోజునే తెలుస్తుంది’’ అని దిల్ రాజు ఈ మీడియా సమావేశంలో చెప్పుకొచ్చారు.

స్వేచ్ఛ ఈ – పేపర్ కోసం https://epaper.swetchadaily.com/ ఈ లింక్ క్లిక్ చేయగలరు