Dhandoraa: ప్రేమ ఎప్పటికీ గొప్పది. ఆ విషయం ఎన్నో సినిమాలు, ఎన్నో ప్రేమ జంటలు నిరూపించాయి. ఓ అబ్బాయి అమ్మాయిని ప్రేమించ‌టం క‌ష్టం కాక‌పోవ‌చ్చు.. కానీ ఆ అమ్మాయి నుంచి ప్రేమకు గ్రీన్ సిగ్నల్ పొందాలంటే మాత్రం నానా తిప్ప‌లు ప‌డాల్సిందే. ‘ఐ ల‌వ్ యు’ (I Love You) చెబితే, చెప్పిన త‌ర్వాత ప్రేయ‌సి ఏమంటుందోన‌ని.. ఎంత టెన్షన్ పడతారో చెప్పడానికి మాటలు సరిపోవు. అలాంటి స‌మ‌యంలో ప్రేమికుడికి ప్రేయ‌సి ఓకే చెప్పేస్తే.. ఎలా ఉంటుంది? ప్రపంచాన్ని జయించినంత ఆనందంతో.. ప్రేమికుడి మ‌న‌సు ఎలా ఊయ‌ల ఊగుతుందో ప్రత్యేకంగా చెప్పాల్సిన అవసరమే లేదు. ఇద్ద‌రు క‌లిసి ఎవ‌రికీ తెలియ‌కుండా క‌ళ్ల‌తో మాట్లాడుకునే మాట‌లు, సైగ‌లు ఎంత చక్కగా ఉంటాయో.. అలాంటి ప్రేమికులు ప‌య‌నం ఎలా ఉంటుందో తెలుసుకోవాలంటే మాత్రం ‘దండోరా’ (Dhandoraa) సినిమా చూడాల్సిందేనంటున్నారు ఆ చిత్ర మేకర్స్.

Also Read- Mana Shankara Vara Prasad Garu: ‘మన శంకరవరప్రసాద్ గారు’ నుంచి బ్లాస్టింగ్ అప్డేట్ వచ్చేసింది.. ఏంటంటే..

హ్యుమ‌ర్ ట‌చ్‌తో పాటు మంచి సోష‌ల్ మెసేజ్

‘కలర్ ఫొటో’, బ్లాక్‌బ‌స్ట‌ర్ మూవీ ‘బెదురులంక 2012’ చిత్రాల‌ను నిర్మించి అంద‌రి దృష్టిని ఆక‌ర్షించిన‌ లౌక్య ఎంట‌ర్‌టైన్‌మెంట్స్‌పై ర‌వీంద్ర బెన‌ర్జీ ముప్పానేని (Ravindra Benerjee Muppaneni) నిర్మిస్తోన్న తాజా చిత్రం ‘దండోరా’. శివాజీ, న‌వ‌దీప్‌, నందు, ర‌వికృష్ణ‌, మ‌నికా చిక్కాల‌, మౌనికా రెడ్డి, బిందు మాధ‌వి, రాధ్య‌, అదితి భావ‌రాజు త‌దిత‌రులు నటిస్తోన్న ఈ చిత్రానికి ముర‌ళీకాంత్ (Murali Kanth Devasoth) ద‌ర్శ‌కుడు. ఈ చిత్రం డిసెంబ‌ర్ 25న గ్రాండ్‌గా ప్రేక్షకుల ముందుకు వచ్చేందుకు సిద్ధమవుతోంది. ఇప్పటికే విడుదలైన పోస్టర్స్, ప్రమోషనల్ కంటెంట్‌ సినిమా భారీ హైప్‌ని పెంచేశాయి. హ్యుమ‌ర్ ట‌చ్‌తో పాటు మంచి సోష‌ల్ మెసేజ్ ఉన్న సినిమాగా ఈ ‘దండోరా’ ఉంటుందని మేకర్స్ చెబుతూ వస్తున్నారు. డిఫ‌రెంట్ ప్ర‌మోష‌న‌ల్ కంటెంట్‌తో భారీగా అంచనాలు ఏర్పడిన ఈ సినిమా నుంచి తాజాగా ‘పిల్లా ఇట్టసూడవే’ అనే లిరిక‌ల్ వీడియో సాంగ్‌ను (Pilla Song) మేకర్స్ విడుదల చేశారు. ఈ సాంగ్‌ని గమనిస్తే..

Also Read- Bigg Boss Telugu 9: రీతూ- పవన్‌లను మళ్లీ టార్గెట్ చేశారుగా.. ఈ వారం ఎలిమినేటైంది ఎవరంటే?

తెలంగాణ గ్రామీణ నేప‌థ్యంలో..

‘దండోరా కొట్టుకుందురో.. గుండెల్లో కొత్త‌గుందిరో
నింగి నేల ఇలా.. దారి కుదిరిందెలా
క‌ళ్లారా చూడ‌బోతినో.. క‌ల్లోలం లాగ ఉంట‌దే
దాగి దాగి అలా ద‌గ్గ‌రైపోయావే ఇలా
పిల్లా ఇట్ట‌సూడ‌వే.. తొంగి న‌న్ను చూడ‌వే..’ అంటూ సాగిన ఈ పాట మ‌న‌సుల్ని హ‌త్తుకునేలా ఉంది. మార్క్ కె రాబిన్ స్వరాలు సమకూర్చిన ఈ పాట‌ను అదితి భావ‌రాజు, అనురాగ్ కుల‌క‌ర్ణి ఆలపించారు. ఈ పాట‌కు పూర్ణా చారి సాహిత్యం అందించారు. ప్రేమికుల మ‌న‌సుల్లో దాగిన భావాల‌ను అందంగా ఆవిష్క‌రించిన పాట ఇదని, ఈ పాటపై నెటిజన్లు రియాక్ట్ అవుతున్నారు. తెలంగాణ గ్రామీణ నేప‌థ్యంలో మ‌న పురాత‌న ఆచారాలు, సాంప్ర‌దాయాల‌ను ఆవిష్క‌రిస్తూనే.. వ్యంగ్యం, హాస్యం, హృద‌యాన్ని హ‌త్తుకునే భావోద్వేగాల క‌ల‌యిక‌గా ఈ సినిమా ఉండబోతుందనే విషయాన్ని టీజ‌ర్‌తో మేకర్స్ తెలియజేశారు. త్వరలోనే ఈ చిత్ర ట్రైలర్‌ను విడుదల చేయనున్నారు.