Kondagattu Fire Accident: బ్రేకింగ్.. కొండగట్టులో భారీ అగ్ని ప్రమాదం..

Kondagattu Fire Accident : జగిత్యాల జిల్లా మల్యాల మండలంలోని కొండగట్టు ఆంజనేయస్వామి ఆలయ దిగువ ప్రాంతంలో శనివారం రాత్రి 11.30 గంటలకు అగ్ని ప్రమాదం జరిగింది. జగిత్యాల–కరీంనగర్ ప్రధాన రహదారిలోని కొండగట్టు శ్రీనాథ్ రెసిడెన్సీ సముదాయంలో ఉన్న 20 దుకాణాలకు మంటలు అంటుకున్నాయి. వీటిలో ప్లాస్టిక్ వస్తువులు, ఆటబొమ్మలు ఎక్కువగా ఉండటంతో మంటలు వేగంగా వ్యాపించాయి.

అగ్ని ప్రమాదం సమాచారం అందుకున్న వెంటనే విద్యుత్ శాఖ అధికారులు విద్యుత్ సరఫరాను నిలిపివేశారు. అనంతరం పోలీసులు సంఘటనా స్థలానికి చేరుకుని పరిసర ప్రాంతాన్ని ఖాళీ చేయించి, అగ్నిమాపక సిబ్బందిని అప్రమత్తం చేశారు. జగిత్యాల నుండి ఒక్కటి కాకుండా రెండు అగ్నిమాపక వాహనాలు చేరుకుని మంటలను అదుపులోకి తీసుకునేందుకు ప్రయత్నించాయి. మంటలను పూర్తిగా ఆర్పేయడానికి కొంత సమయం పట్టిందని అధికారులు తెలిపారు.

ఈ అగ్ని ప్రమాదానికి గల కారణం బయటకు రాలేదు. షార్ట్ సర్క్యూట్ కారణమై ఉండొచ్చని ప్రాథమికంగా అనుమానిస్తున్నప్పటికీ, నిజమైన కారణం దర్యాప్తు అనంతరం మాత్రమే వెల్లడవుతుందని పోలీసులు తెలిపారు. నష్టానికి సంబంధించిన ఖచ్చితమైన వివరాలు కూడా ఇంకా సేకరించాల్సి ఉంది. ఈ ఘటన రాత్రి సమయంలో జరిగినప్పటికీ ఆలయం, ప్రధాన రహదారికి సమీపంగా ఉండటంతో కొంతసేపు స్థానిక ప్రజల్లో ఉత్కంఠ నెలకొంది.