Ibomma Ravi investigation: సీపీ సజ్జనార్ విచారణలో ఐబొమ్మ రవి పొంతనలేని సమాధానాలు.. ఎంట్రీ ఇచ్చిన సీఐడీ..

Ibomma Ravi investigation: తెలీదు, గుర్తు లేదు, మరిచిపోయా కస్టడీలో మూడో రోజు విచారణలో భాగంగా దర్యాప్తు అధికారులు అడిగిన కీలక ప్రశ్నలకు ఐబొమ్మ రవి ఇచ్చిన సమాధానాలు ఇవి. ఆర్థిక లావాదేవీలు, పైరసీ రాకెట్‌లో ఉన్నవారి వివరాల గురించి గుచ్చి గుచ్చి ప్రశ్నించినా రవి సరై సమాధానాలు ఇవ్వలేదని తెలిసింది. అయితే, నిఖిల్ అనే స్నేహితుడి ద్వారా కొన్నిసార్లు తన చెల్లెలికి డబ్బు పంపించినట్టు చెప్పాడని సమాచారం. ఇక, మూడో రోజు విచారణలో హైదరాబాద్ కమిషనర్ వీసీ సజ్జనార్ స్వయంగా దాదాపు గంటపాటు రవిని ప్రశ్నించారు. మరో వైపు, ఈ కేసులోకి సీఐడీ కూడా ఎంట్రీ ఇవ్వటం గమనార్హం. ‘దమ్ముంటే నన్ను పట్టుకోండి’ అంటూ సవాల్ విసిరిన ఐ బొమ్మ నిర్వాహకుడు రవిని ఇటీవల హైదరాబాద్ సైబర్ క్రైం పోలీసులు అరెస్ట్ చేశారు. ఒక్క టాలీవుడ్ పరిశ్రమకే ఏకంగా రూ.3 వేల కోట్ల నష్టాన్ని మిగిల్చిన రవి నుంచి మరిన్ని వివరాలు తెలుసుకోవాల్సి ఉందని కోర్టు అనుమతితో పోలీసులు 5 రోజుల కస్టడీకి తీసుకున్నారు. మూడో రోజు విచారణలో భాగంగా పైరసీ వ్యవహారంలో ఎంతమంది సహకారం అందిస్తున్నారు?, ఆన్‌లైన్ బెట్టింగ్, గేమింగ్ యాప్‌ల నిర్వాహకులతో ఉన్న సంబంధాల గురించి ప్రశ్నించారు. అయితే, వీటికి రవి పొడిపొడిగానే సమాధానాలు చెప్పినట్టుగా తెలిసింది. కొన్ని ఆన్‌లైన్ బెట్టింగ్, గేమింగ్​ యాప్‌ల గురించి వివరాలు వెల్లడించినట్టు సమాచారం. అయితే, తాను ప్రమోట్ చేసిన 1ఎక్స్ బెట్ యాప్ నిర్వాహకుల గురించి ఎలాంటి సమాచారం చెప్పలేదని తెలిసింది.

Read also-Harman Sidhu Death: రోడ్డు ప్రమాదంలో ప్రముఖ పంజాబీ సింగర్ హర్మన్ సిద్ధూ మృతి..

పొంతనలేని సమాధానాలు

విచారణలో అడిగిన ప్రశ్నలకు ఐబొమ్మ రవి పొంతన లేని సమాధానాలు చెబుతున్నాడని అదనపు కమిషనర్ (క్రైమ్స్) శ్రీనివాస్​అనధికారికంగా చెప్పారు. యూజర్​ఐడీలు, పాస్‌వర్డుల గురించి ప్రశ్నిస్తే గుర్తు లేదు.. మరిచిపోయా అని జవాబు ఇచ్చినట్టు తెలిపారు. దాంతో ఎథికల్ హ్యాకర్ల సహాయంతో హార్డ్ డిస్కులు, పెన్‌డ్రైవ్‌లను తెరిచే ప్రయత్నాలు చేస్తున్నామన్నారు. ఇప్పటివరకు జరిపిన విచారణలో మెయిన్​ సర్వర్లు ఫ్రాన్స్, నెదర్లాండ్స్‌లో ఉన్నట్టుగా వెల్లడైందని సమాచారం. రవికి దేశ విదేశాల్లో 35కు పైగా బ్యాంక్​అకౌంట్లు ఉన్నట్టు ఇప్పటికే వెల్లడైంది. అయితే, ఖాతాల నుంచి జరిపిన లావాదేవీలకు సంబంధించి రవి ఎలాంటి వివరాలు వెల్లడించలేదని తెలిసింది. దీంతో, రవికి చెందిన అకౌంట్ల వివరాలు, వాటి నుంచి జరిగిన లావాదేవీల సమాచారాన్ని ఇవ్వాలంటూ దర్యాప్తు అధికారులు ఆయా బ్యాంకులకు ఈ-మెయిళ్లు పంపించారు. ఇక, విచారణలో విదేశాల్లో తిరగటం తనకు ఇష్టమని రవి చెప్పినట్టుగా తెలిసింది. అందుకే ప్రతి పదిహేను రోజులకు ఒకసారి వేర్వేరు దేశాలకు వెళ్లేవాడినని చెప్పినట్టు సమాచారం. అయితే, పైరసీ వ్యవహారాల కోసమే రవి తరచూ ఆయా దేశాల్లో తిరిగినట్టుగా అధికారులు భావిస్తున్నారు. ఈ క్రమంలో ఏయే దేశాలకు? ఎన్నిసార్లు వెళ్లాడు? అన్న వివరాలను సేకరిస్తున్నారు.

Read also-Rajini and Kamal: రజనీకాంత్, కమల్ హాసన్ ప్రాజెక్ట్‌కు ఈ కష్టాలేంటి? దర్శకుడే లేడా?

సీఐడీ ఎంట్రీ..

తాజాగా ఐబొమ్మ రవి కేసులో సీఐడీ ఎంట్రీ ఇచ్చింది. ఐబొమ్మ, బప్పం వెబ్‌సైట్లలో ఆన్‌లైన్ బెట్టింగ్, గేమింగ్ యాప్‌లను ప్రమోట్ చేయటం ద్వారా రవి కోట్లాది రూపాయలు సంపాదించుకున్నట్టుగా ఇప్పటికే వెల్లడైంది. ఈ డబ్బుతోనే మూవీ రూల్జ్, తదితర వెబ్‌సైట్ల నుంచి సినిమాలు కొని సాఫ్ట్‌వేర్ సహాయంతో హెచ్‌డీ క్వాలిటీలోకి మార్చి తాను నడుపుతున్న ఐబొమ్మ, బెప్పం వెబ్‌సైట్లలో అప్‌లోడ్ చేసినట్టుగా నిర్ధారణ అయ్యింది. ఈ క్రమంలో ఇప్పటికే పోలీసులు అతడిపై ఆన్‌లైన్ బెట్టింగ్, గేమింగ్ యాప్‌లను ప్రమోట్ చేసినందుకు కేసులు కూడా నమోదు చేశారు. సీఐడీలోని సిట్ ఇప్పటికే ఆన్‌లైన్ బెట్టింగ్, గేమింగ్ యాప్‌ల కేసులను విచారిస్తున్న విషయం తెలిసిందే. ఈ క్రమంలోనే రవి ప్రమోట్ చేసిన ఆన్‌లైన్ బెట్టింగ్, గేమింగ్ యాప్‌ల వివరాలు ఇవ్వాలని సైబర్​క్రైం పోలీసులను సిట్ అధికారులు అడిగినట్టుగా తెలిసింది. వివరాలు అందగానే కేసులు నమోదు చేయాలని సిట్ అధికారులు నిర్ణయించినట్టుగా సమాచారం.