BRS women wing: బీఆర్ఎస్ మహిళా విభాగ అధ్యక్షురాలి పదవి ఎవరికి?

BRS women wing: పోటీపడుతున్న గులాబీ మహిళా నేతలు

భవన్ కు గతంలో ఎప్పుడూ లేని విధంగా క్యూ
వారం రోజులుగా సందడి
ఇప్పటికే సత్యవతి, పద్మాదేవేందర్ రెడ్డి, సునీతాలక్ష్మారెడ్డి, కవిత పేర్ల పరిశీలన?
మరికొందరు సైతం ఆశిస్తున్న నేతలు

తెలంగాణ బ్యూరో, స్వేచ్ఛ: బీఆర్ఎస్ పార్టీకి మహిళా విభాగ అధినేత (BRS women wing) దొరకడం లేదు. పార్టీ అనుబంధ సంఘం మహిళా విభాగం అధ్యక్షురాలి పోస్టు చాన్నాళ్లుగా ఖాళీగా ఉంది. దీంతో మహిళా సమస్యలపై గళం వినిపించేవారు కరువయ్యారు. పార్టీకి 60 లక్షల మంది సభ్యత్వం ఉందని చెబుతున్నా సమర్థవంతురాలు లేకపోవడంతోనే నియమించలేదనే ప్రచారం జరుగుతోంది. ప్రధాన ప్రతిపక్షంగా ఉన్నప్పటికీ మహిళా అనుబంధ సంఘం బలోపేతంపై దృష్టిసారించకపోవడంపై విమర్శలు వ్యక్తమవుతున్నాయి. అయితే మొదటి నుంచి పార్టీలో పనిచేస్తున్నవారికి ఈ పదవి ఇస్తారా?, లేదా? అనేదానిపై విస్తృతంగా చర్చ జరుగుతోంది.

రాష్ట్రంలో బీఆర్ఎస్ పార్టీ ప్రధానప్రతిపక్షంలో ఉంది. ప్రభుత్వం చేసే ప్రజావ్యతిరేక విధానాలను ఎప్పటికప్పుడు ఎండగట్టడంతో పాటు ప్రజలకు ఏ సమస్య వచ్చినా అండగా నిలబడి పరిష్కరించాల్సిన బాధ్యత ఉంది. అయితే, గత 20 నెలల కాంగ్రెస్‌ పాలనలో తెలంగాణలో 2 వేలకు లైంగికదాడి ఘటనలు జరిగాయని బీఆర్ఎస్ పార్టీ ఆరోపిస్తుంది. అయితే మహిళల పక్షాన పోరాటం చేయాల్సిన పార్టీ అనుబంధ సంఘానికి మాత్రం అధ్యక్షురాలు లేకపోవడం విమర్శలకు తావిస్తోంది. పార్టీకి 60 లక్షల సభ్యత్వం ఉందని చెబుతున్నప్పటికీ అందులో పోరాట పటిమ కలిగిన, నాయకత్వ లక్షణాలు ఉన్న మహిళలు లేరా? అనే ప్రశ్న పార్టీ నేతల్లోనే ఉత్పన్నమవుతోంది. పార్టీ అధిష్టానం ఎందుకు కాలయాపన చేస్తుంది, ప్రతిపక్షంలో ప్రభుత్వం అనుసరించే విధానాలపై ఎప్పటికప్పుడు పోరాటం చేయాల్సి ఉన్నా ఎందుకు మహిళా కమిటీపై నాన్చుడు ధోరణి అవలంభిస్తుందనేదానిపై పార్టీ నేతలే చర్చించుకుంటున్నారు.

16నెలలుగా అధ్యక్షురాలి పోస్టు ఖాళీ

గులాబీ పార్టీ అనుబంధ సంఘం మహిళా కమిటీ రాష్ట్ర అధ్యక్షురాలిగా పనిచేసిన గుండు సుధారాణి గతేడాది ఏప్రిల్ 25న పార్టీకి, అధ్యక్ష పదవికి రాజీనామా చేశారు. కాంగ్రెస్‌లో చేరారు. అప్పటి నుంచి ఈ పోస్టు ఖాళీగానే ఉంది. అయినప్పటికీ ఈ పదవి భర్తీపై అధిష్టానం దృష్టిసారించడం లేదనే చర్చ జరుగుతుంది. మహిళకు కాంగ్రెస్ ఎన్నికల్లో ప్రకటించిన 6 గ్యాంరెటీల్లో ఒకటి మహాలక్ష్మి పథకం. ఈ పథకంలో ప్రతి మహిళకు నెలకు రూ.2500 ఇస్తామని ప్రకటించింది, కానీ ఇంకా అమల్లోకి రాలేదు. దీనిపై ప్రభుత్వాన్ని పార్టీ మహిళా సంఘం నుంచి ప్రశ్నించేవారే కరువయ్యారు. దీనికి తోడు మహిళలపై జరుగుతున్న దాడులు, లైంగిక ఘటనలపై కార్యచరణ చేపట్టేవారు లేక భరోసా కల్పించేవారే కనిపించడం లేదు. సుమారు 16 నెలలుగా అధ్యక్ష పోస్టు ఖాళీగా ఉన్నా అధిష్టానం మాత్రం చోద్యం చూస్తుంది. త్వరగా కమిటీ వేయాలని పార్టీ మహిళా సభ్యులే అధిష్టానాన్ని  కోరుతున్నారు.

Read Also- OG concert rain disruption: వరుణుడి ఎఫెక్ట్ తో నిరాశపరిచిన ‘ఓజీ’ కాన్సర్ట్.. మరీ ఇన్ని అడ్డంకులా..

పనిచేస్తున్న వారికి ప్రియార్టీ ఇస్తారా?

ఉద్యమకాలం నుంచి పార్టీలో పనిచేస్తున్నవారు కొందరు ఉన్నారు. అయినా కొందరికి అవకాశాలు ఇవ్వలేదు. కొందరికి మాత్రం పార్టీ ఎంపీలుగా, ఎమ్మెల్యేలు, జడ్పీచైర్ పర్సన్లు, కార్పొరేటర్లు, మున్సిపల్ చైర్మపర్సన్, మార్కెట్ కమిటీల అధ్యక్షులుగా ఇలా అవకాశం కల్పించింది. అయితే కొందరు పార్టీ మారి తిరిగి` గులాబీ గూటికి చేరారు. అయితే పార్టీ అధిష్టానం ఎవరికి అవకాశం కల్పిస్తుందనేది చర్చనీయాంశమైంది. పార్టీలో ఇప్పటికే చాలా మంది మహిళా నేతలు మహిళా అధ్యక్షురాలి పోస్టుకోసం ప్రయత్నాలు చేస్తున్నట్లు సమాచారం. కొందరు తనకు అవకాశం ఇవ్వాలని పార్టీ అధిష్టానాన్ని కోరినట్లు ప్రచారం జరుగుతుంది. ముఖ్యంగా ప్రధానంగా మాజీ మంత్రి సత్యవతి రాథోడ్, మాజీ ఎమ్మెల్యే పద్మాదేవేందర్ రెడ్డి, ఎమ్మెల్యే సునీతాలక్ష్మారెడ్డి, మాజీ ఎంపీ కవిత పేర్లు వినిపిస్తున్నాయి.

వీరితో పాటు తుల ఉమ, అనితానాయక్, మన్నె కవిత, సుశీలారెడ్డి, గుండ్రాతి శారదాగౌడ్, నంగు సుమలత, దీపికా యుగేందర్ ఇలా పలువురు సైతం పదవి ఆశిస్తున్నారు. అయితే గత వారంపదిరోజులుగా తెలంగాణ భవన్ కు మహిళా నేతలు క్యూ కడుతున్నారు. ఎమ్మెల్సీ కవిత బీఆర్ఎస్ పార్టీకి రాజీనామా చేసిన తర్వాత ఆమె చేసిన విమర్శలను మహిళా నేతలు తిప్పికొట్టారు. బతుకమ్మ ను పురస్కరించుకొని పోస్టర్ ఆవిష్కరణ, సంబురాల రోజూ మహిళలు భారీగా తరలివచ్చారు. మహిళలతో తెలంగాణ భవన్ లో సందడి నెలకొంది. అయితే ఎవరికి పార్టీ అధిష్టానం ఆశీస్సులు ఉంటాయనేది చర్చనీయాంశమైంది.

Read Also- Telangana Anganwadi: అంగన్వాడీలను ప్రభుత్వం రెగ్యులర్ చేయాలి.. 1వ తేదీన అంగన్వాడీలకు వేతనాలు చెల్లించాలి

అధినేత తీరుపై పార్టీలో చర్చనీయాంశం

పార్టీ బలోపేతంపై కేసీఆర్ ఇంకా చర్యలు చేపట్టలేదు. అనుబంధ కమిటీలపై దృష్టిసారించలేదు. ఎప్పుడు పార్టీపై ఫోకస్ పెడతారనేది స్పష్ట లేదు. అయితే పార్టీ అన్ని అనుబంధ కమిటీలు వేస్తారా? లేకుంటే అనుబంధ కమిటీకి అధ్యక్షులను నియమించి పూర్తి కమిటీని పెండింగ్ లో పెడతారా? అనేది సస్పెన్స్. ఇప్పటికే నెలల తరబడి అధ్యక్ష పోస్టు ఖాళీగా ఉన్న మహిళా కమిటీని అన్ని కమిటీలతో పాటే వేస్తారా? ముందు ప్రకటిస్తారా? అసలు కమిటీని వేస్తారా? వేయరా? ఏం చేస్తారు… అధినేత ఎలాంటి నిర్ణయం తీసుకుంటారు అనేది పార్టీలో విస్తృతంగా చర్చజరుగుతుంది. ఏదీ ఏమైనప్పటికీ తొలుత మహిళా కమిటీని నియమించాలని, మహిళలపై జరుగుతున్నదాడులపై గళం ఎత్తవచ్చనే అభిప్రాయంను పలువురు వ్యక్తం చేస్తున్నారు. అయితే అధినేత కేసీఆర్ స్థానిక సంస్థల ఎన్నికలు రాబోతున్న తరుణంలో ఎవరికి బాధ్యతలు అప్పగిస్తారనేది హాట్ టాపిక్ గా మారింది.